General Superintendent Rev. P. Lalrinawma chu November ni 28 Zirtawpni khan Kolkatta a kohhran Building lei thar Pathian hnena hlanna leh hawnna nei turin a zin chhuak.
Building thar hawn tur hi chhawng thum niin a chung ber hi Kolkatta kohhran Biak In atan hman a ni dawn a, November ni 30 Pathianni hian Rev. P. Lalrinawma’n Pathian hnenah hlanin a hawng dawn a ni.
General Superintendent hi General Missions Department Secretary, Rev. Lalruatfela leh Treasurer Lalhmangaihzualin ten an tawiawm a, December ni 2 hian Aizawl an lo let leh ang.
Rev. Lalngaizuala Secretary, General SS Department chu November ni 28 Zirtawp zan atang khan Falkawn kohhrana Pathian chawimawina ah speaker a ni a, ni 30 Pathianni zan thleng hian rawngbawlna a nei dawn a ni.
General News
Mizoram UPC hnuaia Fixed Pay Pastor pahnih lakna tur Written Exam chu November ni 27 Ningani khan Conference Hall General Headquarters Office Zonuamah neih a ni a. Diltu mi 31 zingah mi 30 in written exam hi an hma chhawn a ni.
Fixed Pay Pastor diltu zingah hian a ti tha zual mi 10 te chuan December ni 9 Pastoral Board thutkhawmah Personal Interview an hmachhawn leh ang.
General SS
Mizoram UPC kohhran SS kum tawp exam chu November ni 30 Pathianni hian tualchhung hrang hrangah neih a ni dawn a. Puitling leh Naupang SS Dept. te a tam thei ang ber exam hmachhawn turin General SS Department chuan min ngen a ni.
Exam question leh endikna tur hi bial tinah thawn chhuah tawh niin, tihsual leh hmaih palh awm thei a ni a, zawhfiah duh emaw hriat chian duh nei chuan Secretary General SS Department engtik lai pawhin Whatsapp message emaw call hmangin biak theih reng a ni.
General PYD
PYD General Board Meeting chu Ainawn Kohhran Biak Inah November Ni 20 Inrinni khan neih a ni a.
Upa Dr. Zonunmawia, President General PYD chuan kai hruaiin, Mizoram UPC Puipa ten an hova,
Bial tin PYD president bakah Bial aiawh pakhat theuh atangin palai Mi 90 velin ro an rel a ni.
PYD General Board chuan
Kum 2027 PYD General Inkhawmpui, Kolasib Diakkawna hmuna neih tur chu a hun atan November Pathianni vawithumna an ruat a,
Ruihhlo ngaite pualin chawnghei țawngțai neih an rel bawk.
PYD General Board meeting-ah hian PYD member zingah Zuk leh hmuama fihlim an tam zawk theih nan Bial tinah nasa zawka hmalak an rel bawk a ni.
