General Superintendent Rev. P. Lalrinawma chuan Serchhip Bial Hebron kohhran Biak In thar chu December ni 20 Inrinni hian a hawng dawn.
General Superintendent hi naktuk hian Serchhip panin a zin chhuak dawn a, Pathianni thleng a cham ang.
General Treasurer Rev. Rokhuma chu Inrinni December ni 20 hian Dona kohhran Biak In Meghalaya Bial a mi chu Pathian hnena hlanna leh hawnna nei turin a zin chhuak dawn a. Thawhtanni khian Aizawl a lo let leh ang.
Puipa Committee
Puipa Committee chuan Hruaitu thar Charge inhlan hun January ni 7, 2026 Nilaini a programme hman dn tur a ruahman a,
Upa F. Lalremmawia, Executive Committee kaihhruaina hnuaiah neih a ni ang.
General Headquarters hruaitu thar charge in hlan inkhawmah hian
General Superintendent leh General Secrretary kal chhuak tur leh a tharte hnen atangin thu sawi ngaihthlak a ni dawn a ni.
General Assembly
Mizoram UPC ro relna sang ber General Assembly R. Dengthuama Hall-a nghah chu tluang taka neih zawh a ni a, kumin hian General Assembly hi Headquarters Bial in an thleng a ni.
General Assembly hi December ni 12 Zirtawp ni chhunah ro rel inkhawm a bul tan a ni a,
Mizoram UPC Executive Chairman Upa F. Lalremmawia'n kaihruaiin, Inrinni nen nihnih chhung ro relna hi an nei a,
Kum 2026 Mizoram UPC Budget pumpui atan cheng nuai sangthum zaruk sawmnga leh pasarih, sing riat sanghnih zali sawmli pali chu an pawm.
General Assembly ro rel inkhawmah hian kohhran kal zelna tur atana rawtna pawimawh tak tak Agenda 37 chhawp chhuah a ni a. An thu rel langsar zual zingah Mizoram UPC kohhran inkaihhruaina a boundary then nan a District tih hman mek chu a hming thlak niin 'Area' tih chu pawm a ni a, Mizoram UPC Puipa Executive Chairman leh General Superintendent post-te chu mi pakhatin tum khat bak chelh theih tawh loh tura rel a ni.
Project 2030 ram lak beihpui thlakna tur atana duan chu kum 2026 atanga hman tan rawtnate,
General revival team Budget Head hran nei a mumal taka din chhunzawmte, Senior Tirhkoh nih theihna kum 2022 Executive Committee-in a duan tawh Danpui a khung rawttna te, Mizoram UPC hnuaia inkhawmpui hrang hrang, hun in ang a neih rawtnate leh General Assembly ro rel palai ni velo chhimtute tan a, a bika thutna tur ruahmante chu Mizoram UPC General Assembly ro rel thu pawm langsar zualte an ni a.
General Assembly chuan Tualchhung kohhran pathum hming thlak rawtna pawmin, Bawngkawn Shalom chu Bawngkawn West kohhran ti a thlak a ni a, Sakawrdai kohhran pawh Sakawrdai headquaarters kohhran tih tawh tur a ni ang.
Heng bakah hian Imphal Bial tih thin chu Kangpokpi bial ti a thlak niin, Shillong Bial ni thin chu Meghalaya Bial ti a hming thlak a ni a, Kanchandpur Bial tih thin pawh Naising Para Bial tiin General Assembly chuan a hming thlak rawtna a pawm a ni.
Mizoram UPC General Assembly hi nakumah hian Bungkawn Bial In an thleng dawn a, ruat lawk sa ang chuan kum 2027 General Assembly chu Thuampui Bialah nghah a ni.
Kumin General Assembly-ah hian Pastor pali, A. Lalhmingsanga, F. Lalnienga, Ramdinsanga leh Vanlalduhsakte chu Ordination pek an ni a, General Superintendent Rev. P. Lalrinawma’n tawngtai sakna a nei a ni.
Mizoram UPC General Assembly-ah hian revival inkhawmah Rev. Biakhmunrem, Tripura District Supervisor, Upa FH Lalramliana, Chairman P&FB, Upa F. Lalremmawia Executive Chairman, Upa R. Zanghninglova leh Rev. P. Lalrinawma General Superintendent-te hnen atangin Pathian htuchah ngaihthlak thin a ni a, General Assembly hi Decemberni 14 Pathianni zan khan a tiak a ni.
Kumin chhunga Mizoram UPC hmalakna lian leh hmasawnna langsar zualte lo ngaithla ila.
Kum 2025 chhung hian Mizoram UPC kohhran thar hmun 20 ah, Mizoram chhungah 15 leh State pawnah 5 Lalpan min pe a, mi thar 2617 Mizoram UPC ah lawmluh niin, nau piang thar hi 644 an awm bawk.
Chutih rual chuan Kohhran chhungkuaah mitthi 248 kan nei thung a ni.
Mizoram UPC hmalakna langsar zual zingah Assembly Centre Hall sak mek a ni a, Pastor Quarters thar hlak 19 sak mek a ni bawk a, tunah hian Pastor Quarters 14 chei that mek leh sak chhunzawm mek a awm bawk a ni.
Kum thar kohhran hmachhawp lian zingah Hyssop Recreation Centre, Lungverh hmun a sakte a tel a, Aizawl Municipal Corporation atangin ‘Rain Water Harvesting Scheme’ hnuaiah Tuizem lian Litre nuai chuang dawng Assembly Centre Zonuam-ah sak zawh tawh niin, a dang pakhat sak leh mek a ni.
Gen Missions Dept.
General Missions Department Executive Board chu December ni 18 Ningani khan General Headquarters Office Committee Room-ah an thu khawm a, Puipa ten telpuiin Dept. Chairman Upa Lalthlamuana Hnamte chuan a kaihruai.
General Missions Dept. Executive Board chuan Nagaland Field Gaspani hmunah ram lei a rel a, Guwahati Field-a thawktu Pastor Sibimal Marak pension a chhuak tur thlahna programme Garo Hills, Tura ah buatsaih an rel bawk a, Pastor pension thlahna hun hi General Headquarters aiawhin Department Chairman Upa Lalthlamuana Hnamte chuan a telpui dawn a ni.
Bookroom Board
Mizoram UPC Bookroom nghaktu tur Bookseller pakhat kum 2026 February-2027 January (kum khat chhung) atan lak a ni dawn a, January ni 20, 2026 thleng dilna hun hawn a ni.
Diltu chuan lehkhapuanah dilna ziakin, Bio data chiang taka tarlan tur a ni a, Bookroom manager Malsawmdawngliani, General Headquarters Office Staff hnenah Office hun chhungin thehluh tur a ni a, mahni lawina kohhran committee hriatpuina thil tel tur a ni.
Diltu chu zirna lamah HSLC chin, zuk leh hmuam a fihlim, Kum 18-40 inkar an ni tur a ni.
Bookseller lakna Personal Interview hi January ni 22, 2026 Ningani ah Mizoram UPC General Headquarters office ah neih tur a ni ang.
LITERATURE & PUBLICATION BOARD
Mizoram UPC L&PB chuan December ni 16 Thawhlehni khan Committee Room, General headquarters Office Zonuam-ah meeting an nei a, lehkhabu tih chhuah turte thlir hovin, saptawnga lehkhabu ziah ‘Fishers of Men’ Pastor Andrew L. Singson ziah chu chhuah sak an rem ti a, kum 2026 May thlalah Workshop neih an rel a ni.
Heng bakah hian L & PB Guidebook thar chhut hun tur leh a copy zat tur chungchang an sawi ho bawk a, copy 50 tih chhuah phawt a, bu khat Rs. 50 a hralh an rel a ni.
L&PB thu khawm chuan L & PB kal tlanga lehkhabu tih chhuah ni lo te chu kohhran official function-ah tlangzarh tawh loh nise an ti a, L & PB Guidebook thu hma hruaiah hei hi ziah lan an remti bawk a ni.
Foreign Mission Board
Mizoram UPC Foreign Missions Board chu December ni 16 Thawhlehni chhun khan General Treasurer Office-ah an thu khawm a. Foreign lama rawngbawlna zau zawk neih dan turte an sawiho.
Board meeting hi Chairman Tirhkoh Lalramchhuanga’n a kaihruai a, an thu rel langsar zingah
Missionary Christina Vanlalremruati chu Cambodia a rawngbawl turin China atanga koh kirte a tel a,
Foreign Missions hnuai Myanmar ram Matupi hmuna thawk mek Pastor Daipiangthanga chu a dil angin December ni 31, 2025 hian pension a chhuah tir an remti bawk a ni.
GENERAL PYD
General PYD Executive Board chuan December ni 15 Thawhṭanni zan khan meeting an nei a, President Upa Dr.Zonunmawia’n kaihruaiin, PYD General inkhawmpui ro rel bawhzui ngaite an sawiho va, an thu rel lang sang zual zingah
General PYD hnuaia committee peng Documentation committee chu a hming thlakin Media & Documentation committee vuah an rel a,
Kum 2026 chhunga General PYD hminga Tirhkoh pakhat rawih tur a pass tawh chu Puipa meeting ah rawih dan tur rawtna thlen an rel bawk.
PYD Inkhawmpui lianin Pentecost meichher chanchinbu Circulation Manager ruat belh tur a pass tawh chu, kum 2026 a Circulation Manager atan Henry Lalnunpuia Ainawn veng chu General PYD Executive Board chuan a ruat a,
PYD inkaihhruaina bu hman mek chu ennawn a siamṭhat an rel bakah
General PYD hnuaia committee peng hrang hrangte Account kum tawp audit chu January ni 12, 2026 khian Headquarters Sunday School Hall-ah neiha n rel bawk a ni.
Mizoram UPC General Headquarters Office kum 2025 atana kharna inkhawm neih a ni.
December ni 19 Zirtawpni khan General Headquarters Office Conference Hall-ah kumin atana Office kharna hun hman a ni a, General Superintendent Rev. P. Lalrinawma’n he hun hi kaihruaiin fuihna thu a sawi a, Puipa kal chhuak tur General Secretary Rev. T. Laldingliana leh Office Superintendent Upa R. Lallawmzuala te hnen atangin thu sawi ngaihthlak a ni bawk a, Krismass thil pek Office Staff ten pawn lam atanga cake an dawn chu he hunah zai niin, Office kharna hun hi General Treasurer Rev. Rokhuma’n tawngtaina in a ti tawp a ni.
Mizoram UPC General Headquarters Office hi kum thar January ni 6 Thawhlehni ah dawr theih a hawn leh a ni ang.
