United Pentecostal Church
of Mizoram

HRUAITUTE PROGRAMME

Executive Chairman Upa F. Lalremmawia chu February ni 6 Zirtawpni khan Lawngtlai Bial Revival Crusade cum Seminar hmanpui turin a zin chhuak a. Zanin atang hian revival crusade-ah Speaker a ni ang a, Inrinni hian Seminar a neih pui bawk ang.

Executive Chairman hian Pathianni zan thleng hian rawngbawlna a nei dawn a ni.

General Superintendent Rev. Ngurthanpara Sailo chu Lunglei Area Superintendent thlanna neih puiin February ni 4 Nilaini khan a zin chhuak a. Ni 6 Zirtawpni khan Aizawl a lo let leh. General Superintendent chuan February ni 8 Pathianni hian Suaka Veng kohhran Durtlang Bial chu a tlawh ang.

General Secretary Rev. C. Lalawmpuia chu February ni 6 Zirtawpni khan Thingsulthliah kohhran Rawngbawltute Retreat beih pui turin a zin chhuak a. Pathianni a cham ang.

General Treasurer Rev. Rokhuma chuan February ni 7 Inrinni zan hmang hian Kanghmun kohhran a tlawh bawk ang.

General SS Department Chairman Upa Lalnuntluanga Sailo chu February ni 1 Pathianni hmang khan Sunday School Campaign neiin Lawngtlai biala Council Veng Kohhran leh Bethel Veng kohhran bakah Thingfal kohhrante a tlawh a, Pastor Lalruatkima, Thingfal Bialtu-in a ṭawiawm a ni. General SS hruaitute hian Tualchhung kohhran hrang hrangah Sunday School kai hun inang tlanga neih a nih theih nan leh Sunday School hming ziak tun aia kan tam theih zawk theihna tur lam hawiin SS Campaign hi an nei a ni.

Upa Lalnuntluanga Sailo hi February ni 7 hian SS Campaign nei leh turin Hnahthial Bial, Chanmari kohhran, Electric Veng kohhran leh Thiltlang kohhrante tlawhin a zin chhuak leh dawn a. Pathianni a cham ang. General SS Dept. Chairman hi Upa H. Lalremruata, EBM leh Upa K. Rosangzuala, EBM te chuan an tawiawm a ni.

ATI Board

ATI Board chuan Kum 2026 Session atana zirlai lakna Written leh Interview chu february ni 4 Nilaini khan ATI Campus Durtlangah an nei a, First Year atan zir lai 10 an la thar. February ni 9 Thawhtanniah Registration Day ATI Campus-ah neih a ni ang.

Bethani Chlidren’s Home Society Board

Bethani Children’s Home Society Board chu February ni 5 Ningani khan Home Sihhmuiah an thu khawm a, General Secreatry leh General Treasurer-te chuan an ho. Home Board thu khawm chuan kum 2025 hmalaknate thlir letin Home-a seat 25 an neih mek chu 50 ah tih pun anih theih nana chak taka hmalak an rel a. Naupang Sponsorship kal pui mek chu kumin hian chhunzawm an rel bawk. Heng bakah hian Home compound chhunga pawn lam mi te Lirthei riah thin chungchang an sawiho bawk a, Bethani Childrens Home Society Board chuan pawn lam lirtheite chu dah remtih sak tawh loh an rel a, hei hian kohhran lirthei a huam lo a ni.

Gen SS

General SS Dept. hnuaia Consultation Committee-te chu kum 2028-a NPSS Zirlaibu buatsaih dan tur ngaihtuahin a vawi khat nan February ni 5 Ningani zan khan Upa Lalnuntluanga Sailo, Chairman, General Sunday School Department, Consultation Committee Chairman ni bawkte In, Ainawn Vengah an thu khawm a, chak zawk a hmalak dan turte ngaihtuahin sawiho zau takin an nei a, member an kal tha hle a ni.

KHAWTHLANG AREA

Khawthlang Area a rawngbawl tur a rawih tharte tirh chhuahna inkhawm neih a ni. February ni 4, Nilai zan khan Dinthar Biak in ah Khawthlang Area chhunga rawngbawl tur, Tirhkoh ramtlan 4 leh Revival Team 2-te tirhchhuah inkhawm neih a ni a, inkhawm hi Upa K. Rosangzuala, Khawthlang Area Chairman-in a kaihruaia, Rev. PC Parliana, Khawthlang Area Superintendent-in rawngbawl turte Tirhchhuahna neiin thuchah a sawi a ni. Rawngbawl tur tirhchhuah inkhawm ah hian Rev. Rokhuma, General Treasurer, Pastor Andrew L. Singson, General Missions Secretary, Khawthlang Area chhunga Bialtu Pastor, Bial leh tualchhung hruaitute, North Mizoram Area hruaitute leh Kohhran mipui engemaw zat an tel a, Rochanhlui Ainawn veng hnen aṭangin fakna hla ngaihthlak a ni.

Khawthlang Area chhunga Tirhkoh leh revival team rawngbawl tura tirhchhuahte chu:- 

Kaleba Revival Team Speaker. : Tk. TC Lalmuantlinga, Hunthar

Dy. Speaker : Vanlalmawia, Chaltlang Lily Veng

Member. : Albert Lalchhuansanga, Ramhlun Sports Complex

Daniela Revival Team Speaker. : Tk. Lalrindika, Dinthar

Dy. Speaker. : Tk C.Lalramngaia, Dinthar

Member. Lalmuanawma, Dinthar

TIRHKOH RAWIH tharte

1. Tk. J. Lalpekhlua, Awmna tur : Damparengpui, West Phaileng Bial

2. Tk. Vanlalhriatpuia, Awmna tur : Vawngawnzo/Bualzau, Mamit Bial

3. Tk. Vanlalhmingsanga, Awmna tur : Tumpanglui, Kawrthah Bial

4. Tk. Lalrawngbawla, Sihṭhiang, Rengdil Bial ah te rawng an bawl dawn a ni.

TUICHANGRAL AREA

Tuichangral Area Sub-pastoral board leh Area chhunga pastor te chuan inkawm hona Khawzawl Vengthar Biak In ah February Ni 3 (Thawhlehni) khan an nei. He inkawm hona hunah hian Tuichangral Area chhunga Pastor 9 te an tel a, Sub-Pastoral Board member 7, Area aiawh Pastorral Board member pakhat an tel bawk. He hun hi Upa BS, Mawia. District Chairman leh Rev Zion Ramngaia. District Superintendent-te chuan an ho a ni. Tuiangral Area chhunga Pastor te leh Sub Pastoral Board member te chuan Area chhunga rawngbawlna kawngah thawhhona ṭha zawk a awm theih nan leh Kohhran hmasawnna tur hrang hrang an sawihova, bial tin atangin rawngbawlna report an pek bakah hruaituten fuihna thu an sawi a ni.

# Inkawmhona an neih zawh hnu hian Tuichangral Area Committee-te an thu khawm bawk a. kum 2026 Tuichangral Area Inkhawmpui programme ruahmanin, Kum 2026 chhung a Tuichangral Area Revival board hruaitu thlanna an nei. Kum 2026 Tuichangral Area Inkhawmpui Ruantlang hmun a neih turah heng mite hi Thusawitu atan a ruat an ni. Zirtawp zanah Upa Biakhmingthanga Aiduzawl Rabung bial. Inrinni rorel lo inkhawmah Tirhkoh Vanlaldinmawia Chawngtlai, Khawzawl Vengthar bial. Inrinni zanah Pastor Lalnunthara Hnahlan bialtu. Pathianni chawhma General hruaitute pual Pathianni chawhnuah Pastor Lalnghinglova Khawbung bialtu. Pathianni zanah Rev . Zion Ramngaia Area Superintendent te chuan thuhril rawngbawlna an nei ang. Tuichangral Area Committee chuan Kum 2026 chhung a Area Revival board Hruaitu atan heng mite hi an ruat bawk.

1.Chairman : Pastor Lalnunthara Hnahlan bialtu.

2.Vice Chairman: Upa R.Zosangliana Melbuk Ruantlang bial.

3. Secretary: Tirhkoh Lalrinzuala Laizo Zote , Champhai bial.

4.Treasurer: Pastor Lalfamkima Dilkawn bialtu te an ni.

Lunglei Area

Lunglei Area Superintendent thlanna General Superintendent-in a neih pui. February ni 5 Ningani khan Lunglei Chanmari Kohhran, Sunday School Hall ah Lunglei Area Superintendent thar thlanna neih a ni a. General Superintendent Rev. Ngurthanpara Sailo chuan inthlanna hi a kaihruai a, Southern Zone area Secretary Rev.Gospelthanga leh Pastor C.Lalramnghaka ten an tawiawm a, Lunglei Area Superintendent thar atan Rev. HV.Lalzuithanga (Thingsai bialtu Pastor) chu thlan a ni . Lunglei Area Superintendent ni lai transfer anih tak avangin Area Superintendnet thar tur thlanna hi neih a ni. He mi ni vek hian Area Committee hnuaia Pentecostal Crusade Committee(PCC) te chu thu khawmin Lunglei Area chhunga rawngbawlna kawnga hmalak zel dan tur leh hmachhawp an neihte an sawi ho a ni.