General Secretary Rev. C. Lalawmpuia chu August ni 1 Inrinni hian Dilkawn Bial Revival hmanpui turin a zin chhuak dawn a. Pathianni zan thleng hian revival programme-ah Speaker a ni ang.
General Secretary hian a cham chhung hian Dilkawn Bial Pastor Quarters sak mek chu a hmunah kalin a enfiah bawk dawn a ni.
Rev. Andrew L. Singson Secretary, General Missions Dept. Chuan August ni 2 Pathianni zan hian Chawlhhmun Kohhranah inkhawmin Missions Campaign a nei ang.
ASSEMBLY CENTRE-AH HNATLANG NEIH A NI
Assembly Centre-ah Thingphun Hnatlang neih a ni.
August ni 31 Zirtawpni khan Assembly Centre leh Pandal Structure Committee bul tum in Assembly Centre-ah hnatlang neih a ni a.
Hnatlangah hian AC & PC member-te bakah ATI zirlai 44-te leh Mizoram UPC Office Staff-te an tel a, thingphun, Assmebly Hall sakna bungrua dah fel leh tuihna hai fai hna te thawh a ni.
Hnatlang bul tanna inkhawm tawi neih ah, Upa H. Lalrintluanga, AC&PC Chairman chuan hnatlang tura thawkchhuak zawng zawngte chungah lawmthu a sawi a, Assembly Centre chu a theih ang a chak a cheibawl mek a nih thu leh Assembly Hall sak mek report a pe a. Hall sak mek chhawng hnih Slab chhun tawh chu Motor dah theih tura ruahman a nih thu a sawi a ni.
Hnatlang hi Rev. Ngurthanpara Sailo, General Superintendent leh hruaitu dang ten an telpui bawk a
ni.
HYSSOP RECREATION CENTRE BOARD
Hyssop Recreation Centre Board chu July Ni 30 Ningani khan Recreation Centre sak chungchang a hmalak dan tur ngaihtuahin an thu khawm.
He ṭhut khawm hi General Headquarters Office Committee Room-ah neih niin, Upa Vanlaldinthara, Board Chairman chuan a kaihruai a, General Secretary Rev. C. Lalawmpuia’n a ho a ni.
Hyssop Recreation Centre Board Secretary report atanga a lan danin, recreation Centre sakna hmun tur Lungverh chu AMC area a nih avangin Dan ang a chin fel hmasak ngai a tam hle a, pawn lam atanga fund dawnna tur zawn pawh tun dinhmunah chuan buaipui a harsa rih a ni.
Hyssop Recreation Centre Board chuan kum 2027 budget turte thlir lawkin, General Headquarters atanga tanpuina lo kal tur bakah GLAD leh GPYD te chu an budget-a recreation Centre pual atana sum dah leh tura ngen an rel bawk a ni.
Hemi bakah hian Centre din dan tur ruahmanna awm sa chu, a len tham deuh avanga hun la duh rei tur chi a nih bawk si avang leh mamawhna a nasat tawh avanga kohhran mipui te nawrna awm chu, Board meeting chuan ruahmanna awm sa tibuai lova Assam Type-a Centre din mai tha an ti a, , a hmun ah kala zirchian hmasak an rel a ni.
ATI
Apostolic Theological Institute chuan 2nd Terminal Examination July ni 20 atanga ni 24 chhung khan an nei a. July ni 29 Nilaini khan result puan niin Third Term an tan lehnghal a ni.
ATI ah hian zirlai mi 45 an awm mek a, 2nd Terminal Examination-ah hian mi 10, O Grade-ah an passed a, A Grade-ah mi 23 passed-in, mi 12 te hi B Grade-ah an passed bawk a ni.
RAMMUT THLA
Kohhran programme pawimawh Rammut thla kan lo thleng leh ta a, Puipa Committee chuan Project 2030 kalpui mek anih angin, Pastor bakah kohhran upa leh Tual Upate chu ram mut thlaah hian riak chhuaka ram lak beihpui thlak ni se a ti a, Bial Committee ten uluk taka programme duang a, thahnem ngai tak a rammut thla hmang turin Bial leh tualchhung tinte min ngen a ni.
