United Pentecostal Church
of Mizoram

Upa Lalzirliana, Chairman General Missions Department chu August ni 12 – 17 chhung hian Missions Field tlawhin a zin chhuak dawn a, Haflong a tlawh bakah hian, Manja kohhran Quarters a tlawh dawn a. Medziphema Kohhran ram leh Biak in a hmunah kalin a enfiah bawk ang. General Missions Dept. Chairman hian a cham chhung hian Pailapool Kohhran te inkhawmna leh an dinhmunte zirchiang turin a tlawh bawk dawn a ni. Upa Lalzirliana hi Ni 17 Thawhtanni khian Aizawl a lo let leh ang.

Rev. Andrew L. Singson Secretary, General Missions Dept. chu Central India Workers Seminar cum Conference, Jankapuri, Delhi a nghah hmanpui turin August ni 14 hian a zin chhuak dawn a, a cham chhung hian Agra kohhran ram hungna tur a en fel bawk ang. Missions Secretary hi August ni 20 hian Aizawl a lo let leh dawn a ni.

General Missions Dept.

Arunachal Pradesh Missions Field-a tirhchhuah tur Missionary thlahna inkhawm August ni 9 Pathianni hian neih a ni dawn. Ziro, Arunachal Pradesh a Missionary atana a lak thar, Tirhkoh Lalduhsaka, Kolasib Venglai tirhchhuahna inkhawm chu General Missions Dept chuan Pathianni chawhnu hian Chawlhhmun kohhran Biak In ah a buatsaih dawn a, he hun hi Upa Lalzirliana, Chairman General Missions Dept. chuan a kaihruai ang a, Mizoram UPC General Superintendent Rev. Ngurthanpara Sailo chuan fuihna thuchah sawiin, Missionary tirhchhuah tur tawngtai sakna a nei bawk ang.

#Missionary tirhchhuah tur Tirhkoh Lalduhsaka pual hian August ni 6 Ningani khan General Superintendent Office-ah Training neih a ni a. Upa Lalzirliana Chairman General Missions Dept. chuan he hun hi kaihruaiin, Rev. Ngurthanpara Sailo, General Superintendent chuan fuihna thu leh rawngbawlna kawng a pawimawh tak tak zirtirna a nei a, Rev. Andrew L. Singson, Secretary General Missions Dept. hnen atangin Arunachal Pradesh ram dinhmun leh Culture-te in hrilhhriatna ngaihthlak a ni bawk. Missionary Tirhkoh Lalduhsaka hi August ni 13 hian Arunchal Pradesh panin Mizoram a chhuahsan dawn a, Kolasib Venglai PYD te leh mi thahnemngai engemaw zatin, rawng abawlna hmun tur Ziro thleng an thlah dawn a ni.

INKAWMHONA NEIH A NI DAWN

  Mizoram UPC Pastor-te leh AMC huamchhung a Upate chuan Thupui thlan bik hmangin inkawmhona, August ni 8 Inrinni chhun hian General Headquarters Office Conference hall-ah an nei dawn a. 1. Kohhranah harhna a lo thlen theih dan turte 2. Project 2030 chungchanga hmalak zel dan turte leh 3. Financial chungchangte chu inkawmhona tur Thupui atan hian thlan a ni.

THU LEH HLA KUTPUI

General SS Dept.

DOCTRINE QUIZ NEIH Leh A NI DAWN

General Sunday School Department buatsaihin November ni 16, aṭanga December ni 1 chhung hian, Mizoram UPC Office, Conference Hall, Zonuamah Doctrine Guiz buatsaih a ni leh dawn a, November ni 12 zan ah Khuhhawnna leh Draw neih a ni ang. Doctrine Quiz Organising Committee chu August ni 3, Thawhtan zan khan General Sunday School Department Secretary Quarters ah an thu khawm a, Quiz buatsaihna kawnga tul leh pawimawh tak tak an ngaihtuah. Quiz Organising Committee chuan Quiz in elna atan Doctrine Zirlaibu kum 2-na hman a rel a, Tualchhung in elna tur niin Team khatah Member 2 zel an awm ang. Quiz a tel turte chuan September thla chhungin General Sunday School Department Secretary, Rev. Lalngaizuala hnenah in report tur a ni. Doctrine Quiz Lawmman tur pawh hetiang hian ruahman an siam nghal a. Pakhatnain 20,000/- Pahnihnain 15,000/- Pathumnain 7,500/- an dawng dawn a ni. Quiz Organising Committee chuan Tualchhung tin Doctrine Department-te chu Quiz a tel vek turin a sawm a ni.

Jubillee Editorial Board

Mizoram UPC Thla tin chhuak Chanchinbu, Pentecostal Jubilee Editorial Board chu August ni 4 Thawhlehni khan Committee Room, General Headquarters Office-ah an thukhawm a. Mizoram UPC Executive Committee-in Pentecostal Jubilee chu a hming thar atan Pentecost Palai a pawm tak avangin, Editorial Board chuan Chanchinbu hming thar hmanga chhuah hun tur leh Registration buaipui chungchang an sawiho va, PRGI (Press Registrar General of India) ah registration nei tura hma lak an rel a, Kum thar 2027 January atanga Pentecost Palai tih hming a Chanchinbu chhuah hman ngei tura hma lak tha an ti a ni. Heng bakah hian chanchinbu in ngaihhlut a hlawh lehzual theih na turin, Video clip hmanga Campaign neih an rel bawk a ni.