United Pentecostal Church
of Mizoram

GENERAL LAD

Mizoram UPC Tanpuitu Hmeichhe Pawl inkhawmpui lian, kum khat dana neih thin chu Zirtawpni zan October ni 23 atanga ni 25 Pathianni zan thleng khan Lunglei Farm Veng UPC Mutipurpose Centre-ah hman a ni.

Inkhawmpui vawi 29-na hi unaunu C. Renghlupuii, President General LAD chuan a kaihruai a, palai lawmna leh inkhawmpui hlanna Rev. Lalruatfela, Lunglei South Bialtu chuan a nei a, inkhawmpui tan zan hian Remlalthari Bawngkawn hnen atangin Pathian thu ngaihthlak a ni a, Buhfaitham lawmman sem a ni.

Inrinni nilengin President C. Renghlupuii kaihhruaina hnuaiah ro rel inkhawm an nei a, kum 2027 LAD General Board chu Bazar Bial Armed Veng South kohhranah an nghat. General LAD Inkhawmpui ro relna chuan:

1. Cancer Hospital Zemabawk ah General LAD hminga Rs. 50,000/- a luan chhuah an rel a,

2.Hyssop Recreation Centre (Ruihhlo ngai enkawlna hmun) dinna atana Budget-ah Rs. 1 Lakh (Nuai khat) an ruahman bakah member tinah Rs. 50 khawn an rel bawk.

3.Mission Field-a Biak In sakna atan LAD Day Ip atanga sum lut hman rawtnate,

4. Chhungkaw Maicham Bu thar buatsaihte.

5. Zuk leh hmuama fihlimna kawngah nasa zawk a hmalakte.

6. Inkhawmpui thlengtu puihna member tinah Rs.50 kumtin khawn tawhte.

7. Project 2030 (Crusade & Evangelism) puala Rs.50 member tinah Kum 2027 chhunga khawnte.

8. Ruihhlo ngaite puala Ram pum huap Tawngtaina thla khatah vawi khat tal neihte chu General LAD inkhawmpui ro rel langsar zualte an ni a. General Assembly a thlen turin LAD General hruaitu atan bial leh tualchhunga OB lo ni tawhte chauh ruat ni tawh rawh se tih chu 2/3 Majority in an pawm bawk a ni.

General LAD ro relna chuan Kum 2027 Budget atan cheng Nuai 46, sing 5 (Rs. 4,650,000/-) chu Bial 76-ah sem darh turin an passed a ni.

Inrinni zan atangin Revival inkhawm an hman chhunzawm a, Upa F. Lalremmawia Executive Chairman-in thuhril rawngbawlna a nei a, Pathianni chawhmaah General Superintendent Rev. Ngurthanpara Sailo, Pathianni chhunah C. Renghlupuii President Gen LAD leh Pathianni zanah Rev. Thangliansanga Principal, ATI ten rawngbawlna an nei bawk a ni. Hmeichhe inkhawmpui lianah hian inkhawmpui palai kum 75 chin chunglam chawimawina hun neih a ni a, General Secretary Rev. C. Lalawmpuia’n Pathianni zingah member boral sunna hun a nei bawk a ni. General LAD inkhawmpui hi kohhran YouTube channel Pentecost Media-ah Live a pek chhuah thin niin, Pathianni zan khan a tiak a ni.

Lunglei Farm venga hman zawh tak General LAD inkhawmpuiah hian palai in report mi 2300 an awm a, ro rel palai mi 1240 kalin mikhual in report lo mi enegamw zat an awm ni a hriat a ni a, inkhawm tam ber tumin mi 3872 an inkhawm a ni. General LAD kum puan thupui hi ‘I PUAN IN HMUN CHU ZAUH RAWH’ Isaia 54:2 thu a ni.

Area Inkhawmpui

Kohhran hnuaia Area inkhawmpui hman mek zel a ni a. Pathianni November ni 1 hmang hian North Mizoram, Hmarthlang leh Siaha Area ten inkhawmpui an hmang dawn a, October ni 30 zan atangin inkhawmpui hi hman tan a ni.

North Mizoram Area inkhawmpui hi Kanghmun Bialah hman a ni a, General Secretary Rev. C. Lalawmpuia’n a hmanpui.

Hmarthlang Area chuan Kolasib Diakkawn Bialah hmangin, General Treasurer Rev Rokhuma’n a hmanpui thung a, Siaha Area inkhawmpui hi Southern Zone Secretary rev. Gospelthanga’n a hmanpui a, Niawhtlang Bialah nghah a ni.

ATI

ATI atanga B.Th Degree hmu thar mi 19 an awm.

APOSTOLIC THEOLOGICAL INSTITUTE chuan GRADUATION DAY October ni 29 Ningani khan ATI Chapel Durtlangah an hmang a, mi 19 hnenah Bachelor of Theology (B.Th.) Degree pek niin, an zingah hian David Vanlalruatkima, a pa Vanlalrinchhana, N. Mualcheng chu ‘O’ Grade-ah pass-in pakhatna a ni.

ATI Graduation Day hi Rev. Thangliansanga, Principal chuan a kaihruai a. Pastor Lalhmunthara, Durtlang Bialtu in hunserh hmangin, ATI Board Chairman, Upa R. Vanlalruata leh ATI Student Union President unaupa David Vanlalruatkima te hnen aṭangin thusawi ngaihthlak a ni. Dean Rev. B. Lalchhanhima a hnen aṭangin Report leh Result ngaihthlak a ni a, Rev. Thangliansanga, Principal in Graduate tharte hnenah Certificate hlanin, fuihna leh ṭawngṭai sakna a nei a ni. Graduate Topper hnena pek ṭhin DL Nunpuia Award chu unaupa David Vanlalruatkima hnenah Rev. C. Lalawmpuia, General Secretary in a hlan a, zirlai zinga mark hmu sang ber hnena pek ṭhin Vanlalthlangdika Award chu First Year zirlai unaupa Vanlalhriatpuia Sailo hnenah Rev. Rokhuma, General Treasurer chuan a hlan bawk a ni.

Kumin hian ATI-ah zirlai mi 44 awmin First year-ah zirlai 8, Second Year-ah zirlai 17 leh Third Year-ah zirlai 19 an awm a, an vai hian an passed vek a ni.

Bachelor of Theology (B.Th.) Degree hmu tharte:

1. David Vanlalruatkima

2. C. Lalrinzuala

3. C. Lalbulliana

4. Rotluangpuia

5. Lalhriatzuala

6. VL. Hriatpuia

7. Kamgouthang Guite

8. Lalhruaitluanga

9. Isaac Hmingchullo

10. F. Lalramzauva

11. Emmanuel VL. Chhuanliana

12. F. Lalropuia

13. Pauminthang

14. Henry Lalbiakmawia

15. Lalhmangaihsanga

16. C. Lalnuntluanga

17. F. Lalnunmawia

18. H. Lalnunmawia

19. Abraham VL. Hruaizela te an ni.

# ATI Board chu October ni 29 Ningani vek khan an thu khawm a, kum 2026 Budget an ruahman bakah hmalakna tur pawimawh tak tak an sawiho.

Kum 2027 session atana Application fees an ti danglam a, ATI campus-a waiting shed sak thatte an rel a ni. Kum 2027 ATI Academic Session hi February ni 8-ah tanin Registration Day hman a ni dawn a. ATI a luh diltute tan Written Examination leh Personal Interview February ni 3 ah ATI Office Durtlang-ah neih a ni dawn a, February ni 4 leh ni 5 ah Admission tih fel tur a ni.

Gen PYD & L&PB

"Thu leh hla kutpui" hman zawh tak thlir letna neiin October ni 28 (Nilaini) chawhnu dar 1 khan, General PYD leh Literature & Publication Board te chuan Committee Room, General Headquarters Office, Zonuamah Joint meeting an nei.

Joint Meeting hi Rev. Hc Lalthlamuana, Chairman -in a kaihruai a, T.Upa Mesak Vanlalthlana, Secretary hnen aṭangin report ngaihthlak a ni. August ni 6 & 7 hmanga "Thu leh hla kutpui" Dawrpui Multipurpose Centre-a neih zawh tak chu thlirletna neiin kum 2027-a Oneness Literature tih hmasawnna tur programme an sawiho. Joint Meeting chuan Thu leh hla kutpui hman zawh takah hmasawnna tam tak hmuh niin, a hlawhtling hle niin an hria a, kohhran chhungkua mai bakah kohhran pawn lam pawhin an hlutpui hle niin an hria a, Kum 2027 project atan "Thu leh hla kutpui" buatsaih leh an rel bawk a ni. Pentecost Literature tih hmasawnna atan hian L&PB leh General PYD te kum eng emaw zat an lo thawk ho tawh a ni.

L&PB

L&PB buatsaih UPA RODINGLIANA NITE HLAWHTLING TAKA HMAN A NI Pentecost Hla Kungpui, Upa Rodingliana Nite chu October ni 15 (Ningani) zan khan, Mizoram UPC Office Conference Hall, Zonuamah hman a ni a, a hmuna leng lo mipui thahne tak kalkhawmin, kohhran mipuiin an hlut hle a, Pentecost Media YouTube Channel-ah live-a pek chhuah niin, thlirtu an thahnem hle a ni. Upa Rodingliana Nite-ah hian a hla sak ho a nih bakah, zai thiam tak takten mawi takin an sa bawk a, thlarau lam hla nen hlim taka hun hman a ni a. Upa Rodingliana chanchin ngaihnawm tak tak ngaihthlak a ni bawk. L&PB chuan Upa Rodinglian Nite buatsaih anih theih nana sum tam tak sponsor-tute chungah lawmthu an sawi a, He programme atana tha leh ngaihtuahna sengtu zawng zawngte leh programme ngai hlutu, Upa Rodingliana chhungte leh kohhran mipuite chungah an lawm hle a ni.