United Pentecostal Church
of Mizoram

Puipa Committee

Mizoram UPC Puipa Committee thutkhawm vawi 286-na, March ni 17, 2020 a neih chuan tunlaia hri leng mek COVID-19 chungchangah Mizoram Sawrkarin Kohhran min ngenna angin, April ni 1 & 2, 2020 a Pastor Seminar neih tur chu thu leh awm hma atan thulh mai nise an ti a. Heng bakah hian Bial, District leh General huapa puipunna ang chi inkhawmpui leh Revival-te huaihawt rih lo nise an ti bawk.

Mizoram UPC Puipa meeting chuan Covid-19 hi a darh zel loh nan leh ram leh ram leh hnam a lo him zel theih nan Kohhran mipuite nasa tak a tawngtai turin a ngen a, March ni 22 Pathianni hian ram pum huap tawngtaina nei turin Kohhrante a ngen a ni.

Literature & Publication Board meeting vawi 171-na chu March ni 18 Nilaini khan General Superintendent Chamber-ah neih a ni a, Rev. C. Liansanga, Chairman L&PB kaihhruai he meetingah hian GPYD hnuaia Documentation Committee-in L&PB aiawh member pakhat an zinga tel tur ruat tura an rawn ngen angin, T.Upa Lalmuanpuia, Secretary L&PB chu an ruat.

Heng bakah hian Pentecostal Jubilee Editorial Board atanga lehkha an hmuh chu sawi ho a ni a, thawktu indaih lohna awmte ngun taka ngaihtuahin Board meeting chuan Circulation Manager atan mi pahnih Puipate Committee-ah dil a, anni hi Pentecostal Jubilee Editorial Board member ni nghal turin an ti bawk.

L&PB buatsaih tur Oneness Literature Meet a Literature Awareness thupui leh ziaktu turte meeting chuan hengte hi a thlang bawk:

Kohhran nihna dik - Rev. Thangliansanga

Thalaite leh tunlai khawvel - Misael Lalremtluanga

Pathian thu dik hmanga kohhran humhim- Pastor Lalhmunngheta

te an ni.

L&PB meeting chuan General Sunday School Department ngenna angin NPSS zirlaibu kum 1-na kum 2021-a zir tur, revise-tu turte a ruat bawk a,

Beginners Department: Upa Vanlalchama

Primary Department: Misael Lalremtluanga

Junior Department: Upa R. Lalropuia

Intermediate Department: Rev. Thangliansanga

Senior Department: Upa R. Lallawmzuala

Doctrine Department: Rev. Hc. Lalthlamuana te an ni a.

May thla ral hma a endikna zo turin Meeting chuan a ngen a ni.

Tunah chuan Bial chanchin thar lo ngaihthlak chhunzawm ila:

Churachandpur Bial

Churachandpur bial LAD te chuan an bial inkhawmpui rorelna ang in, March ni 12 LAD Day chu Bial huapin an hmang. Day lawmna hi Venglai kohhran Biak Inah buatsaih a ni a, chhun leh zanah hman a ni. Ni 12 Ningani chhun khan programme hun hnihah thenin, hun khatnaah hian Day thuchah chhiarchhuahna, LAD thil tum sawi rualna te an nei a, bialtu, Pastor K. Lalhmingsangzuala hnen atangin Pathian thuchah an ngaithla bawk. LAD member kalkhawmten Thupui hrang hrang hmangin tawngtai rualna an nei bawk a ni.

Chawhnu lamah intihhlimna hun hmangin, thiam thil hmuhnawm leh hlimawm tak tak an thlirho a, zan riah an kilho nghal a ni. Churachandpur Bial LAD te chuan Zan lamah revival inkhawm hman chhunzawmin, Bial Secretary Upa Lalneikung chuan thuhril rawngbawlna a nei a, kham lo takin hun an hmang.

KAWNPUI BIAL

Kawnpui Bial LAD te pawhin March ni 12 LAD Day chu Bial huapin an hmang a, Bial chhung atangin LAD member mi 48 an kalkhawm a ni. Day lawm ni hian Bialtu Pastor, Rev. Rokhuma’n LAD flag a pawt pharh a, “'Nu pawimawhzia' tih thupui hmangin kalkhawmte zirtirna a pe bawk.

Kawnpui Bial LAD te chuan Day pual hian Kawnpui Damdawiin ah damlo leh thawktu te chhun ei tur Artui leh Thingpui an sem bawk a, hemi ni hian Day lawmnaa kalten ruai an kil ho nghal a ni.

Kawnpui Bial PYD te chuan inkhawmpui vawi-25 na chu Kawnpui Chhim Veng kohhran Biak Inah March ni 15 Pathianni hmang khan an nei. Inkhawmpuiah hian Bialtu Pastor, Rev. Rokhuma chu Speaker-ah hman a ni a, Bial mipuiten hlawk takin hun an hmang a ni.

Kawnpui Bial PYD inkhawmpui rorelna chuan, kum 2021 Bial PYD inkhawmpui chu Kawnpui Hmar Veng Kohhranah a nghat a, kumin chhunga Bial huap revival neihte, PYD member zirnaa hlawhtlingte chawimawina pekte, Pastor Quarters thawm that nana Rs. 5,000/- dahte leh Missionary support-na atan a thlatin Rs 500/- dahte an rel a. Kum 2020-2021 Bial budget atan Rs. 88,804/- inkhawmpui chuan a pawm bawk. Kawnpui Bial PYD inkhawmpui neih chhung hian Unaunu Remlalnghaki leh Unaunu Rochanhlu-i te chuan zaia rawngbawlna an nei thin a ni.

Vairengte Bial:

Vairengte bialah pawh inkhawmpui rorel bawhzuiin, Bial chhunga Kohhran hrang hrang LAD-te chuan March ni 12 an Day chu mahni remchan danin an hmang. LAD Day chu Vairengte Headquarters Kohhran LAD te chuan an Biak In sak lai mekah Rawra chhuin hnatlang an nei a, member thahnem tak an thawkchhuak a ni.

Kawngthar Kohhran LAD te pawhin Biak Inah Day thuchah chhiarchhuahnate neiin, intihhlimna nen Day lawmna hun an hmang bawk.

Nagathol Kohhran LAD te chuan zaihona leh intihhlimna nen Day pualin hun an hmang a ni.

Thingsulthliah Bial:

March ni 13-15 chhung khan Thingsulthliah bial Mission Department inkhawmpui chu Bial Headquarters Thingsulthliah Kohhranah hman a ni a, Inrinni ni 14 khan rorel inkhawm an nei.

Kum 2021 Bial Ramthim inkhawmpui Tuikhurhlu kohhrana neihte,

Bial pawn fehchhuahte,

Missionary Support neihte chu rorel langsar zualte an ni.

Kum 2020 chhunga Thingsulthliah Bial Mission Department Budget atan Rs.1,20,500 ruahman a ni bawk.

SAIRANG BIAL

Sairang Biala Sihhmui hmunah LAD Day March ni 12 chu Sairang bial LAD te chuan bial huapin an hmang. Day lawmna hi Sihhmui a Bethani Childrens’ Home-ah hman a ni a, Bial LAD te hian naupangte hun hmanpuiin, chawhnu lamah infiamna chi hrang hrang nen Kohhran tin LAD te chuan intihsiakna an nei bawk.

Tlai lamah Day lawmna ruai kalkhawmten an kilho bawk a ni.

Sairang Bial LAD te hian zan lamah Sihhmui Kohhran Biak Inah inkhawmna an neih chhunzawm bawk.

Ni 14 Inrinni khan Sairang kohhran LAD leh PYD te chuan inchung (Slab) chhungin sum tuak hnatlang an nei a, member thahnem tak an thawkchhuak a ni. Sairang Bial PYD hian kumin hian Silver Jubilee lawmna ropui tak a buatsaih an tum mek bawk.

Sairang Dinthar kohhranah Ni 15 Pathianni khan mi thar pariat Mizoram UPC-ah lawmluh an ni a, an zing a pakhatin sual ngaihdamna Baptisma a chang bawk.

LAWNGTLAI BIAL:

Lawngtlai bial LAD Inkhawmpui vawi 24-na, March ni 13 Zirtawpni zan atanga Council veng Kohhran Biak In-a neih chu, Ni 15 Pathianni zan khan a tiak.

He Inkhawmpui hi unaunu A.Lalramdinthangi, President bial LAD chuan a kaihruai a, unaunu Lalthazuali, Aizawl chu speaker-ah hman a ni. Speaker hnen atangin Pathian thu leh Pathian fakna hla mawi tak tak ngaihthlak thin a ni a, Kohhran hote'n hlawk takin inkhawmpui an hmang a ni. Speaker hi unaupa Vanlalhruaia, Aizawl Dinthar leh unaunu Zosangliani, Lunglei Electric vengte chuan an tawiawm a, zaia rawngbawlna an nei bawk a ni.

Inkhawmpui chhung hian tualchhung tin LAD-te chuan LAD Thuvawn (Deut.6:4-9) hmangin tihsiakna an nei a, inkhawmpui thlengtu, Council veng Kohhran LAD-te chu pakhatna niin, Chandmary Kohhran LAD leh Vengpui Kohhran LAD-te chuan an dawt a ni. Kohhran hrang hrang LAD-te hnen atangin inkhawmpuiah hian group zai mawi tak ngaihthlak thin a ni bawk.

Pathianni chawhma inkhawmah Missions pual thawhlawm khawn niin, Rs.11,435/- lakkhawm a ni a. An rorel langsar zualte chu :

Kum 2021 Bial LAD Inkhawmpui chu Lawngtlai, Vengpui Mizoram UPC Biak In-ah nghah a ni a.

Pastor Quarters-ah Waterfilter leh a hunna tur dah a rel bawk.

Ramthin puan/sum General-a chhun luh tur atan Rs.3,000/- Budget-a khung te,

thla a thar apiangin chawlhni hmasa ber tlaiah chawnghei tawngtai neih thin nise tih te,

Bethani Childrens’ Home leh Apostolic Theological Institute (ATI)-ah tanpuina Rs.5,000/- ve ve hlan nise tih te,

Kum 2020 chhung a Seminar cum Revival neih nise tih te chu rorel langsar zualte an ni a.

Heng bakah hian :

Tirhkohte Thiltih bu atanga Bible ralchhan buatsaih te,

Buhfaitham tham tha te hnenah lawmman pek nise tihte leh

Bethani Childrens’ Home puala LAD member tinah Rs. 30/- khawn tur chu a rang lama bawhzui nise tihte an rel bawk.

He inkhawmpui hian kum 2020 Budget atan Rs.1,85,383/- a pawm bawk.

Tin, he Inkhawmpuiah hian kum 2019 chhunga Buhfaitham tham thate hnenah lawmman sem a ni a, lawmman pakhatna chu Unanu Hmingthantluangiin lain, No 12,000 a tham a, hei hi Rs.45,000/- hu a ni.

Pahnihna hi unaunu H.Malsawmkimi niin, No 3373 a tham a,

pathumna unaunu H.Lalramthianghlimi hian No 3341 a tham bawk.

Lawngtlai Bial LAD in kum 2019 a Bible ralchhan a buatsaihah Unaunu Hmingthantluangi chu pakhatna a ni a, unanu V.Laldinpuii leh unaunu H.Lalsangveli te chu pahnihna niin, unanu Rosiami’n lawman pathumna a la thung a ni.

Heng Bible ralchhan lawmman hi inkhawmpui ah hian sem a ni bawk.

SERCHHIP BIAL

March ni 13-15 chhung vek khan Serchhip Bial LAD Inkhawmpui vawi 25-na chu Hebron Kohhran Biak Inah hman ni.

Inkhawmpuiah hian Upa David Lalpartlana, Aizawl chu Speaker-ah hman a ni a, Speaker hi Aizawl atangin mi pahnihin an tawiawm bawk.

Inkhawmpui tan zan hian Palai lawmna leh inkhawmpui hlanna Bialtu Pastor Lalnghinglova’n a nei a, Inrinni nilengin rorel inkhawm an nei a ni.

Unaunu Laldinpuii, bial LAD President chuan rorel inkhawm kaihruaiin, Upa T.Sangthanga, bial Chairman chuan rorel inkhawm Pathian hnenah a hlan bawk.

Rorel palai mi 50 kalkhawmte chuan Agenda 19 lut zingah 10 an pass a, kum 2020-2021 budget atan Rs 1,46,400/- an pawm bawk a ni.

Inkhawmpui report atanga a landanin, Serchhip bial ah hian, LAD member 174 an awm mek a ni.

Headquarters Bial

Headquarters bial inkhawmpui vawi 53-na chu March ni 15 Pathianni hmang khan Lawipu veng Kohhranah neih a ni.

He inkhawmpui hi March ni 13 Zirtawp zan khan hman tan a ni a, Rev H.Lalrawnkima, Bialtu Pastor chuan inkhawm kaihruaiin, Inrinni rorel inkhawm Upa Lalnienga, Bial Chairman chuan a kaihruai bawk.

Zirtawp zan inkhawmah Upa Rochungnunga Bial Treasurer chuan inkhawmpui hlanna a nei a, Bial chhung a Department Secretary te hnen atangin report ngaihthlak a ni.

Inkhawmpui tan zan hian Tk.F.Malsawmkima, Bungkawn chuan thuhril rawngbawlna a nei a ni.

An rorel langsar zualte chu

Kum 2021 Bial inkhawmpui Tlangnuam kohhranah a nghat a,

Bial huap Camping buatsaihte,

Revival Peniel kohhranah Bial huap a neihte,

Bial chhung kohhran din lohna hmunah rawngbawltu dah nise tihte a ni a.

Heng bakah hian Rorelna sang zawka thlen tur Agenda panga an nei bawk a, kum 2020-2021 Budget atan cheng nuaihnih sangsarih zariat (Rs.2,07,800/-) an pawm a ni.

Inrinni zanah Tk Rohnuna Sailo chuan thuhril rawngbawlna a nei a,

Pathianni chawhmaah Upa FH Lalramliana hnen atangin Pathian thu ngaihthlak a ni bawk.

Rev C.Liansanga Chairman L&PB chuan Pathianni chawhma inkhawmah Pentecostal Jubilee Campaign a nei bawk a ni.

Pathianni chawhnuah Bialtu Pastor Rev H.Lalrawnkima’n Sacrament rawngbawlna a nei a, a ni hnen atang hian zan inkhawmah Pathian thuchah ngaihthlak a ni bawk.

Headquarters Bial inkhawmpuiah hian Bethani Childrens’ Home pualin thawhlawm Rs.2,510/- leh General Missions Department pualin Rs.11,500/- lakkhawm a ni a.

Upa Andrew Laldingliana Executive Chairman Mizoram UPC chuan Pathianni zan inkhawm a hmanpui bawk. March ni 15 Pathianni zan khan he inkhawmpui hi a tiak a ni.

RUANTLANG BIAL :

Ruantlang Bial LAD inkhawmpui vawi 25-na tluang tak a neih zawh a ni.

He inkhawmpui hi March Ni 13-15 Pathianni hmang khan Ruantlang Kohhran Biak In-ah neih a ni a, Rengdil bialtu Pastor Lalhmunsiama chu Speaker-ah hman a ni a, Speaker hi Tirhkoh Lalremzuala leh Tirhkoh Lalzawmpuia ten an tawiawm a ni.

March ni 14 Inrinni khan Bial President Unaunu Lalhmingchhuani kaihhruaina hnuaiah rorel inkhawm neih a ni a, Bial Chairman Upa. S.Lalramliana'n telpuiin, rorel inkhawm Pathian hnenah a hlan a.

An rorel langsar zual zingah :

Kum 2021 Inkhawmpui Ruantlang Biak Ina nghah te,

Pastor Quarters property lei nan Budget-ah Rs. 10,000/- dah te,

Kum 2020 chhunga Melbuk Biak Ina Bial huap Seminer Cum Revival buatsaih te,

Bial LAD hminga kum 2020 chhung atana Missionary 1 chawm ve ni se tih te chuan memberte a ti phur thar hle a ni.

Kum 2020-2021 budget atan Rs. 70,000/- an pawm bawk.

Ruantlang Bial LAD te hian kum 2019 General Budget leh Buhfaitham Budget an neihte chu an khum bawk a, 2020 pawh hian khum leh vek an tum a ni.

Bial LAD Secretary report ah hian, Ruantlang Bialah LAD member mi 167 an awm mek a, kum 2019 chhung khan member 5 boral an awm a ni.

BILKHAWTHLIR BIAL:

Bilkhawthlir Bial chuan March ni 6 - 8 chhung khan Bial Ramthim inkhawmpui vawi 25-na, Bilkhawthlir Kualmawi Kohhran Biak Inah an hmang a, Inkhawmpui chhung hian thuhril tura ruat:

Pastor Lalrinmawia Varte, Bialtu Pastor;

Tirhkoh Emmanuel Lalthianghlima, Saiphai Hmarveng;

Upa Lalchhuanawma, Saipum;

Upa Lalduhsanga, Buhchangphaite chuan thuhril rawngbawlna an nei a ni.

Bilkhawthlir Bial Missions Department inkhawmpui rorelna chuan Kum 2021 Bial Ramthim Inkhawmpui chu Buhchangphai Kohhranah a nghat a,

Foreign Missions support-na atan budget ah Rs. 4,000/- dah te,

Saiphai Hmarvengah work camp neih nise tih te,

Ramthim pual tan bial chhung Kohhran tinah chawnghei tawngtai neih nise tihte an rel a.

Kum 2020 Budget atan cheng Nuaikhat singli sangnga (Rs. 1,45,000/-) an pass bawk.

Bilkhawthlir Bial PYD chu Silver Jubilee lawm turin an inbuatsaih mek a, hemi atana sum tuak hnatlang March ni 9 (Thawhtanni) khan Bilkhawthlir Dawr vengah PCC Flooring chhungin hnatlang an nei a, bial chhung thalai mi 80 chuang thawk chhuakin, Bial Mission inkhawmpui palai riak lut engemaw zat te chu chamin an hnatlangte an pui bawk a ni.

March ni 14 Inrinni khan Bilkhawthlir Bial Sunday School Department chuan Bial inkhawmpui rorel bawhzuiin Saiphai Kohhran Biak Inah Sunday School zirtirtute pualin bial huap Seminar an buatsaih a, Rev. C. Ramsangvawra, Secretary, General Sunday School Department chuan hmanpuiin, Resource person niin Tirhkoh Liansangkima, Executive Board Member leh Unaunu Laltanpuii, Bethany Childrens’ Home a thawktu leh unaunu Zorinfeli, Kolasib te chuan an tawiawm bawk.

Bial chhung atangin Seminar hmang tur hian Sunday School zirtirtu mi 56 an kal a ni.

Bazar Bial:

Bazar Bial Missions Department inkhawmpui vawi 17-na tluang tak a hman a ni.

He inkhawmpui hi March ni 13-15 Pathianni hmang khan Ramthar Kohhranah neih a ni a,

Bial Missions Department Chairman Upa K. Lalrammawia'n inkhawmpui hi kaihruaiin, ni 13 Zirtawp zan khan Rev. R. Lalnghaksanga'n inkhawmpui hlanna a nei a, Upa C. Vanlalnghaka, Ramthar Kohhran Chairman chuan palai lawmna a nei bawk.

Inkhawmpui tan zan hian Bazar Kohhran Pavalai Pawlte chuan zai a rawngbawlna an nei a, Kohhran hrang hrang atangin report ngaihthlak chhunzawm a ni.

Bazar bial chhungah hian member 856 an awm a, kum 2019 chhung a General Missions budget an neih Rs 4,03,000/- chu, Rs 9,649/-in an khûm a ni.

Bazar Bial Missions Department Inkhawmpuiah hian Immanuel Ramtharnghaka, Bawngkawn chu Speaker-ah hman a ni a, Unaunute C. Lalmuanpuii Ramthar, Laizaitinthangi Bazar, Pc Lalrammawii Armed veng South leh Lalengpuii Dawrpui te bakah Dawrpui Kohhran PYD te chuan inkhawmpui chhung hian zai rawngbawlna an nei a ni.

Bazar Bial Mission Department inkhawmpui rorelna chuan, Bial huap revival neihte,

kum 2020 Krismas thil pek Missionary, volunteer-a kalte puala budget Rs 50,000/- dah te,

bial chhung leh pawnah thuthlung puanchhuahna neih te a rel a.

Kum 2020 budget pumpui atan Rs 5,16,600/- a pawm bawk. Kum 2021 Bial Missions Department inkhawmpui chu Bazar Kohhranah hman a ni ang.

Khawhai Bial:

Khawhai Bial SS Department Inkhawmpui chu March ni 15 (Pathianni) hmang khan Biate Kohhranah neih a ni a, he inkhawmpui hi March ni 13 Zirtawp zan khan hman tan niin, Bial chhung a Kohhran hrang hrang naupang SS Department chuan intihsiakna an nei a ni.

Khawhai Bial SS Department rorelna chuan kum 2021 Bial SS inkhawmpui Khawhai kohhranah a nghat a, Bethani Childrens’ Home Tanpuina atan Rs.3,000/- pek nise an ti bawk. Kum 2021 Budget atan Rs. 39,500/- rorelna chuan a pawm a ni.

Inkhawmpuiah hian Pathianni tlaiah naupangte tan Variety Programe buatsaih a ni a, Khawhai Bial chhunga SS Naupang kalkhawmten Special Items neiin hun hlimawm tak an hmang bawk a ni.

Khawzawl Vengpui Bial:

Khawzawl Vengpui Bial Inkhawmpui vawi 11-na tluang tak a neih zawh a ni.

Hmuncheng kohhran a neih zawh tak, Khawzawl Vengpui Bial inkhawmpui chu March ni 13 Zirtawpni zan khan hman tan a ni a, inkhawmpui tan zan hian Bial chhung Kohhran hrang hrang Secretary ten report an pe a, Upa Vanlaltlana (Arro Kohhrana lawi) hnen atangin Pathian thu ngaihthlak a ni.

Inrinni nilengin rorel inkhawm an nei a, an rorel langsar zual zingah,

Kum 2021 Inkhawmpui chu Vengpui kohhrana nghah te,

Pastor Quarter’s thawmthat leh bungrua lei te,

Missionary support-na atana budget siamte a tel a.

Kum 2020 budget atan cheng nuai sawm singhnih sangriat zahnih sawmthum panga (Rs.10,28,235/-) inkhawmpui rorelna chuan a pawm bawk.

Inrinni zanah Upa Lalhlimpuia (Khawzawl Vengpui) hnen atangin Pathian thuchah ngaihthlak a ni a, Pathianni chawhmaah bialtu Pastor J. Zothansangan thuhril rawngbawlna a nei a, Pathianni chawhnuah Lalpa Zanriah (Sacrament) kil ho a ni.

Inkhawmpui tawp zan hian Bial Treasurer Upa R. Kaphranga hnen atangin Pathian thuchah ngaihthlak a ni bawk.

Inkhawmpui report-a tarlan danin Khawzawl Vengpui Bialah hian Kohhran 7 awmin, Member 523 an awm mek a ni. Khawzawl Vengpui kohhran chuan tunlai hian Biak In sak chhunzawmin, bang rem tur tlem an la hmabak a, hun reilote hnuah zawhfel an beisei a ni. He Biak In sakna atan hian General Headquarters atangin cheng nuai hnih tanpuina an dawng a ni.

Khawzawl Lungvar kohhran, February 19, 2020 a din chu, Biak In hmun tur laih chhunzawm zel a ni a, Upa K. Lalthantluanga (Zonuam ) chuan bul tan sakin, Biak In hmun hi a thlawnin a laihsak a, Kohhran hoten Diesel man chauh chawiin, Lalkhawngaiha Khawzawl vengthar, kohhran danga mi chuan Biak In hmun la rual rem chiahlo laite a laih that sak leh bawk a ni.

Hmuncheng kohhran chuan chhungkaw tin ah thawhlawm khawnin Biak In thutthleng tur an tuak a, Baktawng atangin thutthleng thar 20 an lei bawk.

SIAHA BIAL:

Siaha Bial chhunga New Siaha Kohhran LAD te chuan Day pualin March ni 11 Nilaini tlai khan chaw nghei tawngtai an nei a, March ni 12 LAD Day lawmna chu zan lamah hmangin, President Unaunu C. Zioni'n inkhawm a kaihruai a, Bialtu Pastor F. Lalthakima'n hmanpuiin, hunserh a hmang a ni.

LAD Secretary Unaunu Ramngaizuali'n Day thuchah chhiarchhuahna a nei a, Upa Bialkhuma, Adviser hnen atangin thuchah tha tak an ngaithla bawk.

Day lawm naah hian intihhlimna chi hrang hrang nen hun hman a ni a, Unaunu Kimtei leh unaupa C.Lianmawia ten zai rawngbawlna a nei a ni.

New Siaha Kohhran Committee chuan Naupang pual Camping March Ni 9 – 13 chhung khan a buatsaih a, Adulam Ministry ten rawngbawl neiin, Speaker Tk. Lalnunthara, hnen atangin Pathian thu ngaihthlak thin a ni. Camping hi Ni 13 Zirtawpni khan tih tawp a ni a, Ni 15 Pathianni zan khan Campers te pualin inkhawm buatsaih chhunzawm a ni a, Speaker Tk.Lalnunthara’n mi pakua sual ngaihdamna tui baptisma a chantir a ni. New Siaha East II (Preaching point)-ah Biak In sak chhunzawmin hnatlang neih chhunzawm mek zel a ni. Ni 12 LAD Day chu New Siaha East II LAD te chuan tlai lamah chaw nghei tawngtaina an nei a, zan lamah inkhawm an nei bawk.

Day pual inkhawm hi Unaunu Lalramengi, President chuan a kaihruai a, Secretary Unaunu Lalnunthianghlimi'n day thuchah chhiarchhuahna neiin, unaunu Lalvenhimi Asst. Secretary hnen atangin Pathian thu ngaihthlak a ni.

LAD day lawmna hi Upa leh rawngbawltu ten an hman pui a, inkhawm banah thingpui ruai an kil ho a ni.

New Siaha East II Kohhranah hian March ni 15 Pathianni khan kohhran dang atangin Tk.Lalnunthara’n mi pakhat baptisma a chantir a, Upa K.Rehena, Kohhran Chairman chuan Mizoram UPC ah a lawmlut a ni.

Phura kohhran LAD te pawhin March ni 12 LAD Day chu urhsun takin chaw nghei tawngtaina an hmang a, zan lamah an Day pualin inkhawm an buatsaih bawk. President Unaunu Beinoi'n inkhawm a kaihruai a, T.Upa.Lalengpuia'n tawngtaina neiin, Day thuchah chhiar chhuahna a nei a ni. Secretary S.Nanui hnen atangin LAD dinhmun leh hmalakna report ngaihthlak a ni bawk. Upa H. Lalthara leh Tk. K.Lalthansangate hnen atangin LAD thiltum leh kumpuan thupui hmangtein fuihna thu tha tak tak ngaihthlak a ni.

Thiahra Kohhran LAD te pawhin March ni 11 zan atang khan Day pualin inkhawmna an nei tan a, Ni 12 ah a lawmna pui ber chhang ruai nen hmangin, inkhawm banah zaikhawmnate an neih chhunzawm a ni.

Lengpui Bial:

March ni 15 (Pathianni) khan Lengpui Bial chhunga Dilzawl khuaah merber thar kohhran dang atangin mi 13 Bialtu Pastor P. Lalrothanga'n Mizoram UPC ah a lawmlut a, Baptisma rawngbawlna neiin, Bialtu Pastor hian mi 21 a chantir a, nausen 3 Pathian hnenah a hlan bawk.

Bial LAD inkhawmpui rorel bawhzuiin, March ni 14-15 Pathianni hmang khan Lengpui Kohhran LAD te chuan Hmunpui Kohhran an tlawh a, member thahnem tak kalin Pathian awmpuina hnuaiah hlimtakin hun an hmang ani.

March ni 14 (Inrinni) khan Hmunpui Kohhran PYD te chuan sum tuak nan blanket sûk hnatlang Tlawng lui ah an nei a, Blanket 90 chuang suin, member thahnemtak an thawkchhuak a ni.

Rabung Bial:

Rabung Bial Mission Department Inkhawmpui vawi 26-na chu March ni 13-15 chhung khan Rabung Mizoram UPC Biak Inah tluang taka hman a ni. He Inkhawmpuiah hian thuhril rawngbawlna hun hmang tur a ruatte, Unaupa F.Lalremliana, Upa H.Laltlanmawia, Pastor K.Zoramchhanthanga, Upa F. Vanlaldinga leh T.Upa V.Chalnghaka te hnen atangin Pathian thu ngaihthlak a ni.

Rabung Bial Mission Department inkhawmpui rorelna chuan, kum 2021 Bial Mission Department Inkhawmpui chu Rabung kohhranah bawk a nghat a, kum 2020 Budget pumpui atan Rs.1,06,100/- a pawm bawk. Pathianni zan Inkhawmah Bialtu Pastor K. Zoramchhanthanga'n Missionary Support-na atan Campaign a nei a, mi thahnem ngaite hnen atangin cheng singthum sangnga (Rs. 35,000/-) a tlingkhawm a ni.

KOLASIB VENGLAI BIAL:

Kolasib Venglai Bial Inkhawmpui vawi 25-na chu March 13-15 chhung khan Tumpui Kohhran Biak In ah neih a ni. Speaker atan Bialtu Pastor, Rev P. Lalrinawma hman a ni. Kolasib Venglai Bial Inkhawmpui report-a a lan danin, bial chhungah Kohhran 7 leh Preaching Point 1 a awm a, kohhran member mi 1067 an awm bawk. Kum 2021 Bial inkhawmpui March Ni 19-21 chhung a, Bukvannei kohhran a neihte, Bial hminga Mission field a luanchhuahte, Machuduara (Birpara) hmuna Biak In sak mek Chhunzawm thuai nise tihte chu Kolasib Venglai Bial inkhawmpui rorel langsar zualte an ni a, kum 2020-2021 budget atan cheng nuai li singruk zakua, sawmli pali (Rs 4,60,944/-) an pawm a ni.

KAWRTHAH BIAL

Kawrthah Bial inkhawmpui vawi 25-na chu March Ni 13–15 chhung khan W. Bunghmun kohhranah neih a ni a, Rev C.Lalremsanga General Superintendent, Mizoram UPC chuan hmanpuiin W.Bunghmun Kohhran Biak In thar Pathian hnenah hlanin a hawng bawk. Ni 13 Zirtawpni chhunah rorel inkhawm neih a ni a, zan inkhawmah Upa Vanneia Pudaite, Chaltlang chuan thuhril rawngbawlna a nei a.

West Bunghmun Biak In hawnna chu Ni 14 Inrinni khan neih a ni a, Rev C.Lalremsanga General Superintendent chuan hawngin, Biak In thar lawmna ruai tlai lamah kohhran mipuiten an theh bawk. He Biak In hi General puihna atanga sak a ni a, Member 110 an lawi mek a ni.

Inkhawmpuiah hian Inrinni zan atanga Pathianni zan thleng khan Rev C.Lalremsanga’n thu hril rawngbawlna a neih chhunzawm a ni. Kawrthah Bial inkhawmpui rorelna chuan bial chhung Kawrtethawveng-a Bialin Tirhkoh rawngbawl tura a rawih mek chu chhunzawm zel ni se a ti a, bial hmalaknaa Tuidam Biak In bul lungrem nise an ti bawk.

Pathianni zan inkhawmah Kawrtethawveng-a Tirhkoh rawihna tur appeal neih a ni a, Thawhlawm cheng sing hnih sang hnih zathum (Rs.22,300/-) hmuh a ni. Kawrtethawvengah hian Tirhkoh Zion Ramngaihzuala Venghlui chu Kawrthah Bial chuan rawngbawl turin a ruai mek a, March ni 15 (Pathianni) tlaiah Baptisma rawngbawlna neih niin, Tirhkoh Zionramngaihzuala hian mi 2 baptisma a chantir a ni.

Kawrthah Bial chhungah hian Kohhran 3 leh Preaching point 1 awmin, Kohhran Member 340 an awm mek a, kum 2020 sawma pakhat Budget cheng nuai sawm pahnih (Rs 12,00,000/-) leh Missions Budget cheng nuai khat leh sang khat (Rs 1,01,000/-) an nei a ni.

Kum 2021 Bial inkhawmpui chu Kawrtethawveng kohhran ah an nei ang.

Dinthar Bial:

Dinthar Bial S.S. Department buatsaihin March ni 15 (Pathianni) Chawhnu khan Dinthar S.S.Hall ah, Bial chhunga Kohhran hrang hrang NPSS Department a Intermediate atanga Doctrine Department-te pualin ‘Zirna’ tih thupui hmangin Awareness Campaign hlawhtling tak a neih a ni.

He inkhawm hi Upa Lalnunsanga, Chairman, Dinthar Bial S.S. Department chuan a kaihruai a, Unaupa Mesak Vanlalthlana, Vice Chairman, Social Wing Committee, General PYD chu Resource Person a ni.

Dinthar Bial chhung atangin naupang 94 he hun hmang tur hian an kal khawm a ni.

COVID-19 chungchang a Kohhran hrang hrang hmalakna

Puipa Committee-in Mizoram UPC Tualchhung kohhran hrang hrangte COVID-19 chungchang a hmalakna turah, thuneihna a pek angin, Aizawl khawpui chhunga Kohhran thenkhatte chuan Biak In khar nise an ti a.

Headquarters Kohhran, Tuikhuahtlang chuan March ni 31 thleng inkhawm leh puipunna lam thil huathawt loh nise a ti a, Biak In erawh a duh apiangte tlawh theihin an hawng thung a ni.

Chaltlang Kohhran pawhin March ni 31 thleng inkhawmna neih rih loh nise an ti a, mimala tawngtaina hmang duh tan erawh chuan englai pawhin Biak In hi hman theih a ni thung. Chaltlang Kohhran Committee chuan rawngbawlna mamawhtu, a duh apiangin an koh theih turin an awm thu thu chhuah siamin an tarlang thung. Hetih lai hian an tualchhunga chhungtin ten a tam thei ang ber a maicham buatsaih turin Kohhran Committee chuan a ngen a ni.

Tuikual Kohhranah pawh mipui awmkhawmna ang chi ruat lawkte thulh rih a ni a, Khawtlang hruaituten ruahmanna an siam angte zawm theuh turin Kohhran mipuite an ngen bawk a ni.

Siaha Bial Committee pawhin Bial chhung a Kohhran hrang hrangte chu March ni 22 Pathianni hian tawngtai rualna nei turin a ngen a, Social Media a thu post darh chungchangah mipuite fimkhur turin a ngen bawk.

Khawbung Bial PYD inkhawmpui pawh Covid-19 avang hian thulh rih a ni.