Puipate
Mizoram UPC puipate Rev C.Lalremsanga General Superintendent, Rev Hc.Lalthlamuana General Secretary leh Rev Gospelthanga General Treasurer-te chuan Pathianni July ni 12 hmang hian Kanghmun leh Reiek Bial an tlawh dawn a, heng Bial pahnih Kohhranpui hruiatute nen inkawmna an nei ang.
General hruaitute hian Kanghmun Bial Pastor Quarters sak mek a hmunah an en bawk ang.
Covid-19 hrileng avang a kohhran hoten Biak In a Pathian fak a inkhawmna, hun rei tak chhung kan neih theih tawh loh avangin General hruaitute hian a theih ang a Bial hrang hrang a kal a, kohhran mipuite tlawh an tum a ni.
General Missions Department
July ni 5 Pathianni khan Rev Pc.Laltanpuia Secretary General Missions Department chuan ATI Durtlang tlawhin Missions campaign a nei a, ATI zirlaite chu India leh khawvel ram dang ah te rawngbawl a tul zia leh heti lam a rilru siam thar deuh deuh turin a chah.
General Missions Department Secretary hi unaunu Christina Lalremruati China Missionary leh unaunu Lalnunkimi Cambodia Missionary ten an tawiawm a ni.
He inkhawmah hian ATI zirlaite chuan Crusade Fund atan thawhlawm an lakhawm a, cheng singkhat
Chu Secretary, General Missions Department hnenah an hlan nghal bawk.
Rev Pc.Laltanpuia hi July ni 12 Pathianni hian Aibawk kohhran a tlawh dawn a, Missions Campaign a nei ang.
ATI
Mizoram UPC Bible zirna Apostolic Theological Institute chuan Graduation Day an hmang.
July Ni 7, Thawhlehni khan ATI Chapel Durtlangah Graduation Day hi hman a ni a, Rev Thangliansanga, Principal chuan inkhawm a kaihruai a, Durtlang Bialtu Pastor Rev C.Lalawmpuia’n tawngtaina neiin hunserh a hmang.
He Graduation Day-ah hian Mizoram UPC Executive Chairman Upa Andrew Laldingliana, Upa C.lalropianga Chairman, ATI Board leh ATI Student Union hruaitute atangin thusawi ngaihthlak a ni a,
Upa Andrew Laldingliana Executive Chairman chuan, Zirlai Graduate tharte chu Kohhran innghahna ban pawimawh tak an nih avangin, tha thlah lo a Pathian tan a rawngbawlna chhunzawm zel turin a chah a, kohhran, khawtlang leh Ram tan a mi tangkai nih chu kan mawhphurhna a ni a ti.
Zirlai hlawhtlinna chang tharte hi General Superintendent Rev C.Lalremsanga’n Certificate, Graduate in Theology a hlan a , Rev Hc Lalthlamuana General Secretary chuan lawmpuina thilpek a hlan bawk.
Kum 2020 a ATI zirlai Graduate tharte hi mi 20 an ni a, tun dinhmunah First year zirlai mi 21 leh Second year zirlai mi 13 an awm mek a ni.
Apostolic Theological Institute-ah hian Mizo leh English Section awmin, English Section hi September thla a Season thar tan tur a ruahmanna kalpui mek a ni a, Mizo section pawh nakum 2021 February thla-ah tan leh a ni ang.
ZIrlai hlawhtlinna chang tharte lawmpuina inkhawmah hian ATI-in Annual Magazine an buatsaih ‘Palai’ tih chu Rev.C.Ramsangvawra Secretary General SS Department chuan Pathian hnenah hlanna a nei bawk.
Graduation Day-ah hian khawvel hun tawn mek Covid-19 hrileng avanga inkhuahkhirhna kenkawh mek anih avangin, Zirlai chhungte pawh sawm an ni lova, Mizoram UPC puipate leh ATI Board member chauh an tel a ni.
Season chawlh chhung hian ATI Boys Hostel sak mek chu chhunzawm a ni bawk a ang.
Champhai Bial
Champhai Bial Kahrawt Kohhran-ah ni 5 Pathianni khan baptisma rawngbawlna neih ani a, Lalpa Isua hmingin mipariatin Baptisma an chang a ni.
Baptisma rawngbawlna hi Bialtu Pastor K.Lalawmpuia'n a nei a, kohhran dang atangin mithar pahnih a seng bawk.
Champhai Bial-ah hian Unaunu Malsawmtluangi Ralte chu rawngbawlin a awm mek a,
A rawngbawlna kal zelah Baptisam chang thar hi mi 25 an awm tawh a ni.
KAWNPUI BIAL
July ni 5 Pathianni vek khan New Khamrang preaching point chu Bialtu Pastor Rev Rokuma leh Upa C.Hmingthandanga Bial Secy leh Upa Zaihmingthanga Bial Missions Chairman te chuan a tlawh a, kum chanve sum audit neihpuiin sum vawn dan leh thil pawimawh tak takte an zirho bawk.
Hemi ni a kalkhawmte hian tlai lamah ruai an kilho bawk.
New Khamrang Preaching point hian Bial a Budget an neih an tlin tawh bawk a ni.
Kawnpui Bial rorelna in, Pastor Quarters tih changtlun nan a bungrua lei nise a tih chu, Kawnpui bial whatsapp group-ah appeal neiin sum khawn a ni a, Bial chhung Kohhran mipui inphal tak takte kaltlangin Refrigerator tha tak mai lei a ni a, July ni 8 Nilaini khan Pastor Quarters-ah dah a ni.
Upper Assam Field
Upper Assam Field Mesaki kohhranah pawh July ni 15 Pathianni khan ring thar pahnih Mizoram ah lawmluh an ni bawk.
LUNGSEN BIAL
Lungsen Bial Tlabung-ah July ni 5 Pathianni hmang khan baptisma rawngbawlna Bialtu Pastor-in a nei a, mi 8 in Lalpa Isua hmingin baptisma an chang a ni.
Bialtu Pastor hian Tlabung Venglai kohhranah nauhlan rawngbawlna a nei bawk.
Lungsen bialtu Pastor Lalhmingchhuanga hi Upa H. Vanlalsanga, Bial chairman leh Unaupa F. Lalṭhakima te nupa Lungsen a mite chuan an ṭawiawm a ni.
SENVON BIAL
Churachandpur District Senvon Bial-ah mithar sengkhawm mek zel a ni.
Senvon Bial Lailak kohhranah July ni 7 Thawhlehni zan khan kohhran dang atangin chhungkaw khat mi panga awmna chu Mizoram UPC-ah lawmluh an ni a, Bialtu Pastor Ramdinsanga’n Lailak Kohhran Biak In ah mitharte hi hriak thihin a tawngtai a, Tualchhung kohhran hruaituten Pastor hi an tawiawm a ni.
Pathian malsawmna changin Kumin chhung hian Senvon Bial ah hian mithar 17 sengkhawm an ni tawh a, ram lak beihpui thlak chhunzawm mek zel a ni bawk.
LUNGLEI 'S' BIAL
Lunglei ‘S’ Bial Sunday School Department chuan Board meeting July ni 5 (Pathianni) khan Pastor Quarters ah an nei a, Upa PL Biakmawia, Bial Chairman chuan a telpui.
Meeting hi T.Upa N.Lalfakzuala, Chairman Bial Sunday School Department chuan a kaihruai a,
an thurel langsar zual zingah Covid 19 hrileng avang Sunday School department-in hma a lak theih tak lovah chuan, General lam a Budget an neihte, Bial Sunday School Department sum aṭanga pektlak nise tihte, September ni 1 Pathianni hmang a Bial Sunday School Department Inkhawmpui Ramthar Veng Kohhran a ruat lawk pawh, hun tawn mekin a zir loh avangin Intihsiakna awm lova Rorel inkhawm neih nise tihte an pass a ni.
July ni 7 (Thawhlehni) khan Ramthar Veng Kohhran te chuan an Biak In sak lai mek chhunzawmin, Varanda chung slab chhun hnatlang an nei a. Kohhran member thawkchhuak an ṭhahnem hle,
Electric Veng Kohhrante pawhin Biak In an sak chhunzawm zel a, Kumin hian peihfel hman an tum bawk.
Hrileng avang a Biak In khar leh inkhawm chhunzawm theih a la nih loh avangin, Lunglei ‘S’ Bial chhung a Department hrang hrang, Bial PYD, Bial Missions Department leh Bial Kohhranpui te chuan Inkhawmpui an neih hman tak loh chu Bial Committee hmalakna in a rual a Rorel Inkhawm Electric Veng Kohhran Biak In ah neih mai nise an ti a, a hun leh ni Bial Committee-in a ruat ang.
