United Pentecostal Church
of Mizoram

Puipate:

Mizoram UPC Puipate Rev. C. Lalremsanga General Superintendent, Rev. Hc. Lalthlamuana General Secretary leh Rev. Gospelthanga General Treasurer bakah Tirhkoh Lianhmingthanga Kohhran Driver-te chuan July ni 12 (Pathianni) khan Kanghmun bial leh Reiek bial tlawhin lângin an zin.

Puipate hian Kanghmun Bial a Pastor quarters sak mek te, Kanghmun Biak In, Lungphun leh Hreichuk biak in te bakah Reiek biak in sak mek leh Pastor Quarters te a hmunah kalin an en a,

Kohhran hote hmalakna avang a hmasawnna duhawm tak awmte chu lawmawm an ti hle a ni.

Puipa zinchhuakte hian Reiek leh Kanghmun Bial upate, Pastor quarters-ah kawmna an nei a, Kohhran hmasawnna leh dinhmun hrang hrang report an pek bakah,

Budget hrang hrang, Missions leh SS Department lam hawi te nen campaign-te neiin, tawngtaina urhsun takin an hmang bawk.

General Missions Department Secretary Rev Pc.Laltanpuia chu Pathianni lo awm tur July ni 19 hian Thingsulthliah Bial a tlawh dawn a, Mission Campaign a neih bakah Bial hruaitute nen inkawmhona an nei ang.

Audit

Mizoram UPC hnuai a Account hrang hrang Main, Department, Committee leh Board-te Audit a ni.

Kum chanve sum Audit-hi July ni 15 & 16 (Nilaini leh Ningani) khan Conference Hall General Headquarters Office-ah neih a ni a,

Audit thawhkhatna ah hian heng Main, Camping Centre, Assembly Centre, General Missions Department, Foreign Missions, General SS Department, Press, Bookroom, Legal Committee leh Education Board Account-te Audit a ni.

Ningani khan ATI, LAD, Bethani Children’s Home, Literature and Publication Board, Media & Publicity Board, Pandal Structure Committee, PYD, Social Wing Committee, Documentation Committee leh Pentecost Meichher sum dinhmunte Audit a ni bawk.

Mizoram UPC in Auditor kan neih mekte hi Upa K.Saitluanga Senior Auditor leh Upa Pc.Lalmuankima Junior Auditor te an ni.

ATI Board

Apostolic Theological Institute Board meeting vawi 184-na chu July ni 13 Thawhtanni

Khan Conference Hall-ah neih a ni a, ATI Board Chairman Upa C.Lalropianga’n a kaihruai.

Meeting-ah hian English Section chungchangte leh hmalakna tur hmachhawp hrang hrangte ngaihtuah a ni a,

English Section September thla a tan tur a ruahmanna awm tawh chu, Covid-19 hrileng avang a kan hun tawn mekin a zir tak loh avangin meeting chuan kumin atan kalpui rih loh nise an ti a,

Hostel Building sak mek chu a theih anga chhunzawm nise an ti bawk.

Meeting-ah hian thu pawimawh hrang hrang ngaihtuah a ni a,

Puipate Rev.C.Lalremsanga General Superintendent, Rev.Hc Lalthlamuana General Secretary leh Rev Gospelthanga General Treasurer te chuan an telpui bawk a ni.

PENTECOST MEICHHER

Pentecost Meichher, General PYD leh General LAD chanchinbu intawm enkawltu, Editorial Board-te chuan online hmangin meeting an nei a, hetiang hian Bial tinte hriat tur hetiang hian thu chhuah an siam.

Lockdown avanga Pentecost Meichher April leh May Issue Hard copy tihchhuah theih anih loh avangin kum khat lak man Rs.100 chu meeting chuan kumin atan Rs.80-ah a tihniam a,

June leh July thla Issue chu kawp a ni bawk ang.

Board Meeting chuan kumin atan Bial tinte chu copy 1, Rs.80/- a khawn turin a hriattir a ni.

Chanchinbu man hi i/c General PYD & LAD, General Headquarters office-ah thehluh theih reng a ni a, Meichher Account-ah pawh deposit theih a ni e.

Bank Account kaltlanga thawnte chuan Managing Editor phone No. 8257881339 ah hriattir nghal zel tur a ni ang.

General PYD Executive Board meeting-in Committee peng hrang hrangte August thla ral hmaa report pe vek tur a a ngen avangin, Pentecost Meichher chanchinbu lak man pawh August thla ral hmaa thehlut vek turin Bial tinte an ngen a ni.

Guwahati Field

Guwahati Field 13 Miles Adingiri Kohhranah July ni 12 Pathianni khan ringlo mi paruk sengkhawm leh a ni a, Missionary Philimon Hmar chuan Isua hmingin Baptisma a chan tir a, Mizoram UPC-ah lawmluh an ni.

Tripura

Tripura District Twikumba bial Akwbang Gorjao preaching point-ah July ni 9 khan ringlo mi pakhat chu Bialtu Pastor A. Vanlalpara Reang chuan Isua hmingin Baptisma a chan tir a, Mizoram UPC-ah lawmluh a ni bawk.

July ni 10 khan Chhattisgarh a missionary Tirhkoh Robert Singson S/o Rev Liankhawlal Singson chuan kawppui duhawm tak a nei.

Tirhkoh Robert Singson leh unaunu Hechin Khongsai D/o Upa Lalthang Zoar te chu Rev Biakhmunrema Darlong chuan Lalpa Isua hmingin Khumlung Biakin ah Kohhran dan thianghlimin a inneih tir a,

He inneih lawmpui tur hian kohhran mipui bakah Tripura district chhung a Pastor zawng zawng an kal kim a ni.

NI 12 Pathianni khan Tarungtwisa ah Baptisma rawngbawlna neih a ni a, mi paruk Bialtu Pastor A.Vanlalpara Reang chuan Isua hmingin Baptisma a chan tir a ni.

Sairang bial

July ni 11 Inrinni khan Sairang bial chuan Pastor Quarters-ah Bial sum Account hrang hrang te an Audit a, harsatna awmlova neih zawh a ni.

Ni 12 Pathianni zingkar khan Sihhmui kohhran ah mi thar pakhat unaupa Lalrawnkima chu kohhran dang atangin sengluh a ni a, lawmluh tawh sa unaupa Vanlalliana nen Lalpa Isua hming a baptisma chan tir an ni.

Lawmluhna leh baptisma rawngbawlna hi Tirhkoh A.Lalropuia Chairman Sihhmui Kohhran chuan a nei a, kohhran hruaitute leh member engemaw zatin an tawiawm a ni.

Kawnpui

Kawnpui Venglai LAD te chuan ni 12 Pathianni khan thlaithar thawhlawm lak khawmna an nei a, member thanem tak thawkchhuak in, thali thar eng emaw zat ken khawm ani a, heng thali tharte hi sum ah chantirin, Rs.5306/- an hmuchhuak a ni.

Thlai thar lakhhawm rual hian Bialtu Pastor Rev.Rokhuma’n naupang pahnih Pathian hnenah a hlan bawk.

Upper Assam

Ruah sur nasa in Assam ah tui lian a siam mek a, mi tam takin harsatna tawkin, Upper Assam Field a Mesaki kohhran te pawh an mangang hle a, tuilian hian Mesaki Kohhran Biak In chu a chim a ni.

Hmun tam takah tui hi a len avangin Upper Assam Field hruiatute pawh Mesaki kohhrante thlamuan a, harsatna an tawh mekte a hmunah kal a enfiah tur pawhin an tan chhuah ngaihna a awm rihlo a ni.

July ni 15 Nilaini khan Lekujalem kohhran ah General Mission Dept kaltlangin Crusade buatsaih a ni a, he rawngbawlna atang hian ringlo mi pahnih chu Isua hmingin baptisma chan tir an ni a,

Kohhran hruaituten Baptisma chang thar te hi Bible an pe a ni.

Lunglei ‘S’ Bial

Thangpui Kohhran Lunglei ‘S’ Bial ah member duhawm tak thlahliam a ni.

Sr.Upa C.Lalhmingliana, Kum 84 Ṭhangpui Kohhran tan a mi pawimawh tak chu July ni 12 Pathianni khan Typhoid avangin a boral a, a tuk ni 13 Thawhtanni khan Bialtu Pastor B.Lalchhanhima’n vuiin, Thangpui thlan mualah phum a ni.

Bialtu Pastor hi Upa PL Biakmawia, Bial Chairman leh unaunu C.Lalfakawmi, Bial LAD Assistant Secretary te chuan an tawiawm a ni.

July ni 12 (Pathianni) khan Lunglei ‘S’ Bial a Ramthar Veng Kohhrante chuan Kum Chanve Sum Audit tluang takin an nei bawk.

Khawhai Bial

July ni 12 Pathianni khan Khawhai Bial LAD te chuan General LAD ngenna bawhzuiin, Bial chhung kohhran tinah Tawngtai rualna an nei a, hlawk takin hun an hmang.

Tlangpui kohhranah July ni 14 khan baptisma khur hawn a ni a, Tk. Lalvensanga'n rawngbawlna neiin, Kohhran chhuangkua atangin mi 8 in Lalpa Isua hmignin Baptisma an chang a ni.

Bawngkawn Bial

Bawngkawn Bial chuan July ni 12 Pathianni chawhnu dar 3 khan Shalom Kohhran a lawi, Upa K.Vanlanvena, Member of Parliament Rajya Sabha, Mizoram State atan a thlan thar chu lawmpuina leh chawimawina thuziak an hlan.

He inkhawm hi Upa J.Lalramliana Secretary Bawngkawn Bial chuan a kaihruai a,

Lawmpuina thu ziak Tirhkoh H.Vanlalsawma Bial Treasurer chuan a hlan bawk.

He hunah hian Bialtu Pastor Rev PB Lalhmuliana'n thuchah ropui tak a sawi bawk a ni.

Upa Zoramthara Bial Chairman bakah Rev Chhunglawma Thuampui, Upa T.Vanlalvuana Bawngkawn, Upa B.Kawlvela Muanna, Upa Vanlalruata Zuangtui leh Upa F.Hranghluna Mualcheng te hnen atangin lawmpuina thu tha tak tak ngaihthlak a ni bawk.

Upa K.Vanlalvena hnen atangin lawmthu sawina bakah, a naupanlai atang tawh a, Pathian kaihhruaina a dawn ropui tak takte leh hun harsa a paltlang tam takte ngaihthlak ani bawk a,

‘khawvel ropuina zawng zawng aiin Kohhran hi a ropui zawk a, Van min hruai thlengtu tur anih avangin ka ngaihlu ber a ni a ti’.

Hemi ni a kalkhawmte hian Upa K.Vanlalvena te chhungkaw tan tawngtaina an nei a,

Pathian thlarau awmpuina nen hlapui an rem a ni.

He lawmpuina inkhawm hi Rev R.Lalthantluanga’n malsawm tawngtaina in a khar a ni.

Chawlhhmun Bial

Chawlhhmun Bial in March ni 20-22 chhung a Bial inkhawmpui neih an tum, Covid-19 hrileng avang a neih theih tak loh chu July ni 11 Inrinni khan Govt. Complex Kohhran Biak in ah rorel inkhawm chauh neih a ni a,

Bial chhung Kohhran Committee chin leh Department hrang hrang hruaitute an kal kim hle.

Upa Andrew Laldingliana Executive Chairman, Mizoram UPC Puipa chuan rorel inkhawm hi a telpui bawk.

Kum 2021 Chawlhhmun Bial inkhawmpui March ni 26-28 chhung a Sakawrtuichhun Kohhran a nghahte,

Kum 2021 atang chuan Bial inkhawmpui hlut leh zual a nih theih nan, bial chhung a kohhran zawng zawngah Sunday School neih tawh loh nise tihte,

Chawlhhmun Bial Industry, Preaching point Kohhran a Tirhkoh rawih mek chhunzawm zelte

Chu rorel langsar zualte an ni a,

Heng bakah hian rorelna sang zawk District Committee a thlen chhoh tur,

Mizoram UPC hian Jerusalem-ah Missionary dah turin hmalak ni rawh se tih leh General in Crusade fund atanga a rawihte lawmman tihsan nise tih te chu an pass bawk.

Chawlhhmun Bial hian Kum 2020 Budget atan Rs.72, 89, 500.00 /- (Nuai sawmsarih pahnih singriat sangkua zanga) chu lungrual tak in an pawm a ni.

Rorel tluang tak a neih zawh anih hnui Bialtu Pastor Rev.HV Lalzamlova’n Tawngtaina a nei a, rorel inkhawm tih tawp a ni.

Rorel palaite hian tlai lamah Chawhlui an kilho bawk.

Khawbung Bial

Khawbung Bial rorel inkhawm chu July ni 14 Thawhlehni khan Dungtlang Kohhranah neih a ni a,

Bial kal zel dan tur leh hmalakna tur pawimawh tak tak an ngaihtuah.

Rorelna chuan,

kum 2021 bial inkhawmpui Dungtlang kohhranah an ngaht a,

Bial In Tirhkoh a rawih mek chu rawih chhunzawn zel nise an ti bawk.

Covid-19 leh Lirnghing avanga Bial mipuite harsatna tawh mekah, Bial hruaituten Bial chhung Kohhran tinte tlawh chhuak se tha an ti a,

Pastor Quarters inchung, Rangva Rawng hnawih that na atan Budget-ah Rs 10,000 dah nise an ti bawk.

Heng bakah hian District Committee a thlen tur

Kohhranpui main account atang a 20% hi Missions Dept kutah lut tawh se, hei hi Kum 2022 atang a hman nise tihte an passed a ni.

N.VANLAIPHAI BIAL

Kum 2020 N.Vanlaiphai Bial PYD inkhawmpui rorelna bawhzuiin

July ni 12 Pathianni khan N.Vanlaiphai Bial PYD chuan Leilet Kohhranah Seminar a buatsaih a,

ISUA PATHIANNA' leh 'THUTHLUNG' tih thupui hmangin paper zirho a ni.

Seminar hi Sunday School Hall ah neih a ni a, Unaupa Vanlaldika'n kaihruaiin, Bialtu Pastor HV .Lalzuithanga chu resource person a ni a, PYD member mi 27 an kalkhawm thei a ni.

Bial PYD hruaitute T.UPA H.Lalthlamuanpuia, President, Tirhkoh K.Laldingngheta, Secretary , Unaupa PC.Vanlalchhanhima Treasurer leh Unaupa F.Laldanmawia Asst.Secretary te chuan Seminar hi an telpui a ni.

KOLASIB VENGLAI BIAL

Kolasib Venglai Bial Committee ruahmannain July ni 12 Pathianni khan Pastor Quarters ah Kum chanve sum Audit an nei a,

Bial sum leh Bial Department sum hrang hrangte harsatna awm lovin Audit zawhfel a ni.

Kolasib Venglai Bial Committee chuan hmachhawp hrang hrang neiin, chung zingah chuan Pastor Quarters thawm thatte, Kohhran ram Pastor Quarters leh Biak in hmunte a ranglam a tehfelte a tel ani.

Koalsib Venglai Bial Bukvannei Kohhran chuan Biakin sak hna an thawk mek a, thingzai hnatlang te neiin, Biak In ban tur hi an peihfel thawkhat tawh a ni.

Thinglian Kohhran te pawh hnatlang neiin, Tirhkoh Lalzedinga hovin tunlai hian hma an la nasa hle a, hnatlang thawkchhuak pawh an thahnem thei hle a ni.

BILKHAWTHLIR BIAL

Bilkhawthlir Bial rorel inkhawm chu July ni 11 khan North Chawnpui koohranah neih a ni a,

Palai mi 30 an kal.

Bilkhawthlir Bial rorelna chuan

Kum 2021 bial Inkhawmpui chu Saiphai Kohhranah a nghat a,

March ni 26 - 28 chhung khian neih ani ang.

Bial Relief Fund neihte, hmei atan a budget ah ₹ 10,000 dah nise tihte,

Hmarveng Kohhran, Saiphaiah Bial huap revival crusade neihte,

Pastor Quarters chaw ei dawhkan lei nan a Budget ₹ 8,000 dahte leh Bookshelf lei nise tihte chu rorel langsar zualte an ni a,

Heng bakah hian 'Hruaitu mawhphurhna' tih thupui hmangin bial chhung Kohhran tinah Seminar neih nise tihte leh Bial chhung ah ram beihpui thlak nise tihte an rel a ni.

Bilkhawthlri Bial rorelna chuan Kum 2020 Budget atan cheng nuai sawmpasarih singhnih sangruk zariat sawmnga (₹ 17,26,850/-) an pawm bawk a ni.

Bilkhawthlir bialah hian member 1216 awmin Kohhran in 252 an awm mek a ni.