United Pentecostal Church
of Mizoram

Pastoral Board

July ni 22 Nilaini khan Mizoram UPC rorelna sang Pastoral Board chu Conference Hall, General Headquarters Office-ah an thukhawm a, meeting hi vawi 91-na niin, Rev.C.Lalremsanga General Superintendent chuan a kaihruai.

Pastoral Board thukhawm chuan Mizoram UPC hnuai a thawktu tur Pastor pahnih lak nise an ti a, pawmpuina Executive Committee-ah an thlen ang.

Heng bakah hian Puithiam kaihhnawih chungchang pawimawh tak tak meeting-ah hian an ngaihtuah a ni.

Pastoral Board Chairman hi General Superintendent a ni a, General Secretary chu ziaktu a ni nghal bawk.

Member-te hi Executive Chairman, General Treasurer, District tin aiawh pakhat theuh, Sub Pastoral Committee Chairman leh Executive Committee-in a ruat mi panga te an ni a,

Pastoral Board hian Mizoram UPC hnuai a Pastor-te Transfer chungchang leh Pastor lak thar ngaite a awm in an ngaihtuah thin a ni.

Executive Committee

Mizoram UPC hnuai a committee sang ber Executive Committee thutkhawm vawi 61-na chu July ni 23 Ningani khan Conference Hall General Headquarters Office-ah neih a ni a, Upa Andrew Laldingliana Executive Chairman chuan a kaihruai.

Rorel tan hmain Rev C.Lalremsanga General Superintendent chuan thuchah tawi sawina leh rorel turte hlanna a nei a, Rev Gospelthanga General Treasurer hnen atangin kum chanve sum dinhmun report ngaihthlak a ni bawk.

January atanga June thla chhung hian kum 2020 atan a Sawmapakhat Budget 50.4% General Headquarters Office-ah chhunluh a ni a, Buhfaitham Budget pawh 90% hmuh tawh ani.

Executive Committee thutkhawm vawi 61-na ah hian thu pawimawh tak tak chhawpchhuah a ni a,

Kum 2020 General Assembly leh

General LAD inkhawmpui chungchangte,

Danpui Commission din chungchangte leh ATI English Section chungchangte chu thurel langsar zualte an ni a.

Executive Committee chuan khawvel hun tawn mek Covid 19- hrileng avanga kan him tlan zawk nan kum 2020 General Assembly chu neih rihloh nise an ti a, Revival inkhawm bakah Rorel inkhawm pawh nei lovin kum tawp Executive Committee chauh thutkhawm mai nise tha an ti a,

General LAD inkhawmpui N.Mualcheng hmun a neih tur pawh kumin atan neih rih loh mai nise an ti bawk.

Heng bakah hian Meeting chuan Danpui Commission Member pasarih (7) awmna din a remti a,

Pastoral Board meeting-in Pastor pahnih lak thar nise a tih chu Executive Committee hian a pawmpui bawk a ni.

Kum chanve Executive Committee thukhawm chuan English Section kum 2020 session leh October leh November thla chhung a District inkhawmpui hrang hrang awm turte pawh kumin atan chuan neih rih loh mai nise an ti a,

Rorel inkhawm neih erawh District tinte ruahmanna ah a dah thung a ni.

Gen SS Department

General SS Department buatsaihin Aizawl khawpui chhung a PTSS Superintendent-te chuan seminar an nei.

July ni 18 Inrinni khan Conference Hall General Headquarters Office -ah Seminar hi neih a ni a, Aizawl khawpui chhungah hian Puitling Sunday School Superintendent mi 48 awmin, Seminar a tel hi mi 25 an ni.

He Seminar hi Rev. C. Ramsangvawra, Secretary, General SS Department chuan a kaihruai a, Rev. F. Lalnghakliana Chairman General SS Department leh Rev. Vanlalfela Sailo EBM te chu Resource Persons-an ni a,

session 2-ah ṭhen niin, chawhma ah hian Rev. F. Lalnghakliana’n- ‘Zirtirna pek dan’, Superintendent-te mawhphurhna tih leh SS hmasawnna ngaihtuah tih thupui hmang te in zirtirna a pe a,

chawhnu hunah Superintendent-te hriat tur, SS ngaihpawimawhna tih leh Sunday zing thu puan chungchang tih thupui hmangin Rev. Vanlalfela Sailo chuan paper a present bawk.

Sawi zauna hun te hmangin, Superintendent kalkhawmte chuan Sunday School an kalpui dante kalkhawmte hmaah an tarlang a, hlawk takin hun an hmang.

Seminar-ah hian Rev C.Ramsangvawra Secretary, General SS Department hnen aṭangin General SS sum dinhmun ngaihthlak a ni a, kumin atan a Bial tinin General a Budget an neih cheng nuai sawmpali singkhat sangnga chu kum chanve chhung hian cheng nuai sarih singriat sanghnih zariat sawmli chhun luh a ni tawh a, Day thawhlawm atangin cheng nuaihnih singruk sanghnih zathum sawmriat pakhat hmuh a ni tawh bawk a ni.

Seminar hi Rev. Gospelthanga, General Treasurer chuan a telpui a, kum chan ve Mizoram UPC financial report a pe bawk.

General SS Department buatsaih Seminar-ah hian chhimtu te nen an vaiin mi 40 chuang an tel a ni.

L&PB

Literature & Publication Board chuan July ni 20 – 21 chhung khan L&PB hnuai a lehkhabu tihchhuah tur hrang hrang te endik hna thawkin Workshop an nei.

Workshop thawhkhatna ah hian

‘Synoptic Gospel’ (ATI Zirlaibu) Rev Vanlalsipaia ziah,

‘Kan danglamna te’ Upa R. Lallawmzuala ziah leh

‘Kawhhmuhtu’ Upa R. Lalropuia ziahte chu endik an ni a,

Synoptic Gospel ATI zirlaibu chu

Rev. HT Vanlalengmawia leh Upa R. Lallawmzuala ten endik hna thawkin,

Kan danglamna te tih chu Rev. C. Lalremsanga

Leh Pastor Lalhmunngheta ten an endik bawk.

Kawhhmuhtu tih lehkhabu

Upa R. Lalropuia ziah chu

Tk. Lianhmingthanga leh Upa F. Vanlalchama ten endik hna an thawk bawk.

Workshop thawhhnihna ah hian

ATI zirlaibu tur, Lehkhathawn 1-na, Rev. R. Laldawngliana buatsaih chu

Rev. C. Liansanga leh Pastor Lalhmunngheta ten endik velehin

‘Chanchin zirna 1-na’, Rev. R. Laldawngliana ziah tho ATI zir tur chu

Rev. C. Liansanga leh Rev. Zoramthara ten an endik bawk.

Heng lehkhabu tha tak takte hi chhuah theih a peih fel a ni a, workshop neih rual hian kum 2021 NPSS

Zirlai tur revised nghal a ni.

GENERAL PYD NEWS

Mizoram UPC ṭhalai pawl "Pentecostal Youth Department" chuan General PYD hruaitu hlui Upa K.Vanlalvena, MP (Rajya Sabha)-a thlan thar chu lawmpuina thilpek an hlan.

Upa K.Vanlalvena hi kum 2003-2004 chhung khan General PYD Vice President nihna a lo chelh tawh a, hruaitu hlui India ram rorelna sang a ṭhu tur an nei hi General PYD chuan ropui an ti hle a,

July Ni 19 (Pathianni) khan General PYD hruaitute hian Upa K.Vanlalvena te chenna Legislators Home, Tuikhuahtlangah kalin lawmpuina hun an hmang a,

Upa Vanlaldinthara, President General PYD chuan he hun hi kaihruaiin T.Upa Lalroenga, Vice President chuan hunserh a hmang a, T.Upa Dr.Zonunmawia, General Secretary hnen aṭangin fuihna thu ngaihthlak a nih bakah Upa K.Vanlalvena’n thu sawina hun a nei bawk.

He hunah hian General PYD hruaitute bakah Executive Board member engemawzat an tel a ni.

Ni 19 July, 2020 (Inrinni)-khan Social Wing Committee, General PYD chuan

Unaunu Lalhmunsiami te in, Dawrpui Vengtharah meeting pawimawh tak an nei a,

T.Upa Lalroenga, Ex-Officio Vice President General PYD ni bawk chuan a telpui.

Unaupa Mesak Vanlalthlana, Vice Chairman kaihruai meeting chuan

Blood Donation Camp June Ni 27 (Inrinni) a Social Wing Committee, General PYD in a buatsaih chu thlir letna an nei a,

Aizawl khawpui chhung PYD ten Aizawl Civil Hospital Blood bank tan Blood donation Camp hlawhtling tak an nei thei chu lawmawm an ti hle.

Thisen pe tur a kal, General PYD hruaitute, Documentation Committee te leh Aizawl khawpui chhung bial hrang hranga kan hruaitute leh member zawng zawngte bakah Sairang Biala tanga lo kalte chungah Social Wing Committee chuan lawmthu an sawi a ni.

Blood Donation Camp ah hian Thisen Unit 264 pek a ni a, thisen petute hi mipa 200 leh hmeichhia 64 an ni.

Meeting chuan mi bik chawimawina Kum 2020 chhung hian neih leh nise an ti a,

PYD member July, 2019 aṭanga July, 2020 inkara mi hlawhtlingte chu General PYD hmingin lawmpuina hlan tur a ni a,

Chawimawi phu ni a kan hriatte chu August, 2020 ral hmain Social Wing Committee hruaitute hnenah hriattir tur ani ang.

Heng bakah hian

Mizoram UPC Kohhran Channel a chhuah tur leh General PYD Youtube channel-a dah tur Talk Show buatsaih chungchang an ngaihtuah bawk a, thupui tur leh sawihona a tel turte an ruat fel nghal a ni.

Kawnpui Bial

Kawnpui bial chhung a department hrang hrang Account-te July ni 19 Pathianni khan kum chanve audit a ni a, tluang tak a neih zawh a ni.

Kawnpui bial hian General Budget Sawmapakhat, cheng nuai sawmthum pahnih singhnih (₹ 3,220,000/-) an neih chu kum chanve chhung hian cheng nuai sawmhnih pakhat singnga sangruk zali sawmriat pariat (₹2156488/-) an chhung lut tawh a,

General Missions Budget pawh 49% an chhunglut tawh bawk.

Heng bakah hian General SS leh Buhfaitham budget engemaw zat an chhung lut tawh a ni.

RABUNG BIAL

Rabung Bial rorel inkhawm chu July ni 13 Thawhṭanni khan Aiduzawl Mizoram UPC Biak Inah neih a ni a,

rorel palai mi 37 kalhawm ten Bial chhung hmalakna tur pawimawh tak tak an rel.

Rorel inkhawm hi Bial Chairman Tirhkoh K.Lalfakliana'n a kaihruai a,

Tualchhung tin ten report an pe a , Kum 2019 Inkhawmpui leh kum 2020 Bial rorel inkhawm inkara member boralte sunna hun, Bialtu Pastor K.Zoramchhanthanga’n a nei bawk.

Rabung bial rorelna chuan

Kum 2021 Bial Inkhawmpui Rabung kohhranah a nghat a,

Budget hrang hrang - Sawma pakhat, District Budget, leh Bial Budget te, tualchhung tinah a ṭhen fel nghal bawk.

Rabung Bial rorelna chuan Pastor Quarters thawm ṭhatte an rel bawk a ni.

Rabung Bialah hian Kohhran Pali - Rabung, Aiduzawl, Khualen leh Pamchung te awmin member 745 an awm mek a ni.

LUNGLEI 'S' BIAL

Lunglei ‘S’ Bial hruaitute chu July ni 19 (Pathianni) chawhnu khan Pastor Quarters ah an thukhawm a,

Meeting hi Upa PL Biakmawia, Bial Chairman chuan a kaihruai a,

Bial Committee-in thuneihna a pek angin,

Covid 19 hrileng avanga Bial leh Department hrang hrang inkhawmpui an neih theih tak loh chunchangte an ngaihtuah a,

Meeting chuan Rorel Inkhawm chauh neih nise an ti a, hetiang hian ruahmanna an siam.

July ni 24 (Zirtawpni) ah Bial PYD rorel Inkhawm Chanmari Kohhranah,

Ni 25 (Inrinni) ah Bial Missions Department rorel Inkhawm Farm Veng Kohhranah,

Ni 26 (Pathianni) ah Bial kohhranpui rorel Inkhawm Electric Veng Kohhranahte an nei anga,

Rorel inkhawm neih a piang hian General Missions Department pualin thawhlawm an lakhawm bawk ang.

N.VANLAIPHAI BIAL

N.Vanlaiphai Bial LAD chuan Leilet kohhranah July ni 19 Pathianni khan Bial inkhawmpui rorelna bawhzuiin Seminar an nei a, 'Isua Pathianna' leh 'Tui Baptisma' tih thupui hmangin Bialtu Pastor HV Lalzuithangan zirtirna a pe.

Seminar ah hian Bial chhung atangin member mi 25 an kalkhawm a,

Bialtu Pastor nupui Unaunu Lalzikpuii, T.Upa.H .Lalthlamuanpuia Bial PYD President leh Tirhkoh K.Laldingngheta Bial PYD Secretary te chuan an telpui bawk a ni.

KOLASIB VENGLAI BIAL

Kolasib Venglai Bial a Tumpui Kohhran chuan November thla hian Silver Jubilee lawm turin ruahmanna an siam mek a, hun tawn mek hripui avang a harsatna thleng mek chuan ruahmanna awmsa a tihbuai an hlau hle.

Ni 21 Thawhlehni a Souvenir Sub Committee thukhawm chuan Jubilee pual a Souvenir buatsaih tur erawh kaltlang pui nise an ti a, August thla chhung a peihfel nise an ti a ni a ni.

Souvenir siamna atan hian Kohhran pui leh Dept hrang hrang ten sum an thawhkhawm a, Souvenir Sub-Committee-te hian sumtuak hnatlang an nei thin bawk.

Kolasib Venglai Bial Bukvannei Kohhran te pawh Biakin sak chhunzawm mekin a ban an tawh a,

tunlai hian hnatlangin an bei ngawrh thei hle a ni.