United Pentecostal Church
of Mizoram

General hruaitute

Lir nghing tuarte thlamuan turin General hruaitute an feh chhuak.

Champhai District, Khawbung tlang dunga lir nghing tuarte thlamuan turin July ni 25 (Inrinni) khan

General hruaitute, Puipa atangin Rev Gospelthanga General Treasurer,

Rev C.Ramsangvawra Secretary, General SS Department leh Rev Pc Laltanpuia Secretary, General Missions Department-te Khawbung panin an chhuak a, tluang takin an tum ram an thleng a ni.

Kohhran mipuiten kan hriat angin kuminah hian Khawbung tlang dungah vawi tam tak lir nghingin,

Biak In leh chenna in engemawzat a chhia a,

Mi tam tak thlabarin an awm mek a ni.

Khawchhak tlang dunga harsatna tawk mek kohhran mipuite thlamuan turin kan hruaitute hi an feh chhuak a, mi thahnemngai engemawzatin an tawiawm bawk.

General hruaitute hi Khawbungah kalkhawm hmasain,

Chuta tang chuan group 3-ah an insem darh a,

Khaw thenkhat Khawtlang hruaitute hnenah tuarpuina leh ṭanpuina sumte an hlan a ni.

Group 1

Rev. Gospelthanga, General Treasurer team-te Upa Lalbiakmawia, Tuichangral District Chairman, Upa R. Kaphranga, Khawzawl vengpui leh Unaupa Laltlanzova, Khatla te chuan

Khawbung, Dungtlang leh Vaphai kohhrante an tlawh a, Ni 27 Thawhlehni khan Khawzawl vengthar bial a Chawngtlai kohhrante tlawhin a hmunah an riak nghal a ni.

Group 2

Rev. Pc. Lalṭanpuia, Secretary

General Missions Department kaihhruai Tirhkoh Lalmuanpuia Vaiphei, Nagaland Missionary, unaunu Christina Vanlalremruati China Missionary leh unaunu R. Lalnunkimi Cambodia Missionary te chuan

Vangchhia, Zokhawthar, Ruantlang leh Champhai kohhrante an tlawh thung a,

ni 27 khan Khawzawl Vengpui kohhrante tlawh lehin zan hun an hmanpui a ni.

Group 3

Rev. C. Ramsangvawra, Secretary

General SS Department hi Upa Hranghluna N. Mualcheng chuan a ṭawiawm a,

Buang, Lianpui leh Dilkawn kohhrante an tlawh a,

Chawngtlaiah zan an hmang thung a,

General hruaitute hi,

Khawbung bial leh Dilkawn Bialtu Pastor leh bial hruaituten lo buaipuiin, an tawiawm ve zel a,

July ni 28 Thawhlehni khan dam takin Aizawl an lo let leh a ni.

Lir nghing avanga harsatna tawk mekte,

thlamuan tura General hruaitute an kal hi Khawchhak tlang dung a kohhrante chuan ropui an tiin, an thla a muang hle a, an chungah an lawm hle a ni.

Area Secretary

Rev Dr.Ngurthanpara Sailo, Area Secretary Southern Zone, Mizoram UPC Sub Headquarters Lunglei thutchilhtu ni bawk chu July ni 30 Ningani khan Thingfal bial tlawhin a zinchhuak.

Area Secretary hian Tawpui South-a rawngbawl tur a rawih Tirhkoh C.Lalhmudika chu, a rawngbawlna tur hmunah a dah nghal dawn a, Ni 31 Zirtawpni hian Lunglei-ah a let leh ang.

Tunah hian Rev Dr.Ngurthanpar Sailo hian Thingfal bial hi a hmui mek tel mek a ni.

General SS Department

General SS Department chuan

July ni 30 Ningani khan Conference Hall, General Headquarters Office-ah

Executive Board meeting vawi 176-na an nei a,

Rev F.Lalnghakliana Chairman chuan meeting hi kaihruaiin,

General SS Department hmalakna tur hrang hrang chhawpchhuah a ni.

Chung zingah chuan Childrens meet chungchangte,

Hall sak tanpuina dilna lo lutte,

General SS Board chungchang leh chumi atan a Agenda turte leh Sunday School exam chungchangte chu an thurel langsar zualte an ni a,

General SS Executive Board chuan Exam question-te, Aizawl khawpui chhung a Superintendent-te pual a Seminar neih zawh takte leh Kum chanve Budget luh dante an thlirho nghal a ni.

GENERAL LAD

General LAD Executive board meeting vawi 162-na chu

July ni 29 Nilaini khan Headquarters Kohhran Biakin, Tuikhuahtlangah

Neih a ni a,

Unaunu Laldingliani President General LAD chuan a kaihruai a,

Mizoram UPC puipate Rev C.Lalremsanga General Superintendent leh

Rev Gospelthanga General Treasurer ten an telpui.

General LAD Executive Board meeting-ah hian

Covid-19 hrileng avanga kum chanve Executive Committee-in kum 2020 General leh District level inkhawmpui reng reng neih loh nise, rorel inkhawm chauh nei a palai inruat tur a a tih angin palai ruatna an nei a,

Bial tin OB atangin aiawh pakhat (1) theuh inruat nise, kan hun tawn mek boruak thlir chungin a tul anga ennawn leh nise an ti a,

Rorel Inkhawm neihna hmun atan Bethlehem Vengthlang Kohhran Biakin an ruahman a,

October ni 22 ah neih nise an ti a,

He hunah hian Kum 2021-2022 LAD Thupui bu tlangzarhna hun an nei bawk ang.

Hemi atan a Budget leh agenda thehlut hun atan September 2020 thla ral hma an ruat bawk.

Meeting chuan Kum 2022 LAD General Inkhawmpuina hmun atan Sairang a ruat bawk a,

Heng bakah hian

Bethani Childrens Home enkawlna Rs. 4,00,000/- , Pentecost Meichher enkawlna Rs. 60,000/- leh Woolen Carpet leina tur Rs. 10,000/- chu remchang hmasa berah pek turin meeting chuan a passed bawk.

LITERATURE & PUBLICATION BOARD

Literature & Publication Board meeting vawi 173-na chu July ni 29 Nilaini khan

Conference Hall General Headquarters Office, Tuikhuahtlangah neih ani a,

Rev.C.Liansanga Chairman, L&PB chuan kaihruaiin,

Puipate Upa Andrew Laldingliana Executive Chairman leh

Rev Hc.Lalthlamuana General Secretary ten an telpui.

Meeting-ah hian Budget siam rem chungchangte,

Penetcostal Jubilee Editor khawl hman mek repair ngai chungchangte,

Projector lei chungchangte an ngaihtuah a,

Heng bakah hian L&PB hnuai a Lehkhabu tihchhuah turte endiktu tur an ruat bawk.

a) Zawlnei Jona lehkhabu zirna- Pastor Lalngaizuala ziah, endiktu atan a unaupa Misael

Lalremtluanga (setting), Tk. Lianhmingthanga leh Upa F. Vanlalchama-te,

L&PB OB Meeting-in a lo ruat chu Board Meeting chuan rem a tihsak a,

b) Hmangchang- unaunu Remlalthari lehkhabu ziah endiktu atan Upa R. Lalropuia (setting),

Rev. Thangliansanga leh Pastor Lalhmunngheta te ruat an ni bawk.

c) Sabengtung no-Pastor Lalhmingchhuanga ziah endiktu atan Rev. Hc.

Lalthlamuana (setting), Rev. C. Lalremsanga leh Upa R. Lalropuia te chu meeting chuan a ruat bawk a,

d) Pentecost ni ropui tak chu-Pastor Lalhmingchhuanga ziah tho chu endiktu atan

Upa R. Lallawmzuala (setting), Rev. C. Liansanga leh unaupa Misael Lalremtluanga te ruat

an ni bawk.

e) A ti tlat a-Rev. R. Laldawngliana ziah, endiktu atan T. Upa Lalmuanpuia

(setting), Rev. Hc. Lalthlamuana leh Upa F. Vanlalchama te ruat an ni a,

f) Mi nung pathum-Rev. R. Laldawngliana ziah bawk chu, endiktu atan T. Upa

Lalmuanpuia (setting), Rev. Thangliansanga leh Tk. Lianhmingthanga te ruat an ni.

Geenral LAD Thupui zirbu “Thih thlenga rinawm” tih

Rev. C. Lalremsanga ziah chu endiktu atan

Upa R. Lallawmzuala (setting), Pastor Lalhmunngheta leh unaunu Malsawmdawngliani

(Treasurer, L&PB) te chu meeting chuan a ruat a, lehkhabu endik hna hi September ni 15, 2020 ral hma a zo turin meeting chuan endiktu turte a ngen a ni.

M&PB

Media & Publicity Board meeting vawi 46-na chu July ni 28 Thawhlehni khan

Conference Hall General Headquarters Office-ah neih a ni.

He meeting hi Rev H.Lalrawnkima, Chairman M&PB chuan a kaihruai a,

Puipa Rev C.Lalremsanga General Superintendent chuan a telpui bawk.

Meeting-ah hian Media hmalakna tur hrang hrangte chhawpchhuakin sawiho a ni a,

M&PB in Social Media inkaihhruaina dan a siam,

Kum chanve Executive Committee, July ni 23, 2020 a neih zawh takin a pawmpui chu, chak taka bawhzui nise an ti a,

Mizoram UPC Pastor pensioner-te Media kaltlang a, anmahni kawmna neihchhunzawm zelte,

Kohhran chhungkua a zai mite tan hamthatna siam sakte leh

Pathian thu a zawhna neite tan a chhanna hun Programme buatsaihte an rel a ni.

BAZAR BIAL

Hripui leng avangin Bial hrang hrang ten inkhawmpui an nei hman lova,

Bazar Bial pawhin ruat lawk ang a kum 2020 Bial inkhawmpui April thlaa an neih theih tak loh chu,

July ni 18 Inrinni khan rorel inkhawm chauh neiin Bial kal zel dan tur leh hmalak dan turte an ngaihtuah.

Bazar Bial kohhranpui rorel inkhawm hi Armed veng south Kohhran SS hall-ah

Neih a ni a,

Upa Lalbulliana, Bial Chairman chuan kaihruaiin,

Bial chhung atangin rorel palai mi 36 an tel a ni.

Rorel ni hian kum 2019-2020 inkhawmpui inkara member boral sunna

Rev. R. Lalnghaksanga, Bialtu chuan a nei bawk.

Agenda 15 chhawpchhuah zingah hian, Bial PYD inkhawmpui neih hun tur sawnte,

inkhawmpui report bu siam a nih ațanga Secretary report neih tawh lohte,

inkhawmpui thlen kim zana tualchhung tin Secretary report pek thin chhunzawm thar leh te,

bial chhung Department inkhawmpui thu passed,

programme hmanna atana tualchhung kohhrana dil kher ngai lova hriattir mai nise tihte chu Bazar Bial rorel inkhawmin Agenda an pawm langsar zualte an ni a,

kum 2020-2021 budget pumpui atan Rs 71,78,401 (Nuaih sawmsarih pakhat, singsarih, sangriat, zali leh pakhat) chu an passed bawk.

Rorelna chuan Kum 2021 Bazar bial inkhawmpui chu April Pathianni hnuhnung ber hmang khian Ramthar Kohhranah a nghat bawk a ni.

July Ni 19 (Pathianni) khan, Bazar Kohhran NPSS Hall-ah

Bazar Bial PYD Board an thukhawm a,

hrileng (Covid-19) avanga bial PYD inkantawn an neih theih tak loh chu

sawrkar thuchhuak ngaichang chung a hun remchang hmasa bera ngaihtuah ṭhat nise an ti a,

Silver Jubilee lawmna puala Indoor Games leh Outdoor Games neih tura an lo rel

tawh te, Bial huapa Silver Jubilee lawmna ruai ṭheh leh revival programme nei tura an lo rel tawh pawh kan hun tawn mekin a zir loh avangin ṭhulh mai nise an ti a,

Meeting chuan hemi atana sub committee an lo din tawh chu a ṭhiat nghal bawk.

Bazar Bial PYD hian Silver Jubilee lawmna, a kharna inkhawm erawh neih ngei an tum a,

Meeting chuan remchang hmasa berah ngaihtuah that an tum a ni.

Heng bakah hian Bial PYD inkhawmpui February thla a neih thin, HSLC leh HSSLC exam nen a insut thin avanga Bial kohhranpui inkhawmpui rorelna a sawn an dilna chu pawm a ni a,

Bazar Bial PYD Board chuan March Pathianni hnuhnung ber chu Bial PYD inkhawmpui neih hun atan a rawtin, BIal kohhranpui Committee-ah thlen nise an ti bawk.

Meeting-ah hian GPYD in September Ni 23 (Nilaini) a General Board meeting a koh huna chhawpchhuah tur Agenda engemawzat an rel bawk a ni.

Upper Assam

Ni 26 Pathianni khan Upper Assam field chhunga Lamajan kohhran ah Sacrament rawngbawlna Field Pastor C.Ramchhanmawia’n a nei a, kohhran mipui an kal thain, Pathian thlarau awmpuina hnuaiah hlim takin hun an hmang a ni.

Ringlo miten Lal Isua an hmuh theih nan a tawngtaipui tur leh rawngbawltute tan a bang lova dil sak turin Mizoram UPC kohhran mipuite min ngen tak meuh a ni.

KHAWBUNG BIAL

Khawbung Bial-ah July ni 25 khan General hruaitute kalin,

Lir nghingin a tihbuai, bial chhung a kohhran mipuite thlamuanin,

tanpuina an hlan.

Khawbung Bial chhunga

Vaphai biakin leh khaw hrang hrang a in engemaw zat lirnghing hian a tichhia a,

Chungte chu a hmunah kalin General hruaitute hian an enfiah a,

Vaphai bakah hian, Dungtlang leh Khawbung ahte hun hmangin, kohhran te hian chawhlui an kilpui a, inkawm khawmnate neiin, General hruaitute hian kohhran hote hnenah leh Khawbung Bial chhung a Village Council-te hnenah tanpuina sum an hlan bawk a ni.

Khawbung bial PYD rorel inkhawm chu Vaphai kohhranah July ni 25 Inrinni khan neih a ni a,

Rorel palai mi 43 kalkhawmte chuan Bial hmalak zel dan turte relin,

Kum 2021 Bial PYD inkhawmpui Khawbung kohhranah an nghata,

bial chhung atanga Bible school kal chhuak tawh te leh kal chhuak mai turte chawimawina thilpek hlante,

Bial PYD whatsapp Group kaltlanga Rampawna luanchhuahte,

Bial PYD hminga bial chhunga Biakin sak anihchuan, work camp emaw sumfaia tanpuina pek nise tihte leh Bial PYD hminga Pastor Quarters-ah, Refrigerator dahte chu Khawbung Bial PYD rorel langsar zualte an ni a,

Hrileng avanga Bial inkhawmpui neih hman anih tak loh avangin rorelna inkhawm chauh an nei thei a ni.

Vairengte Bial

Ni 26 Pathianni khan Vairengte Headquarters Kohhran Biakin ah a duh a piangte tan Baptisma rawngbawlna buatsaih a ni a, he hun hi Bialtu Pastor Rev. HC. Jacoba'n a kaihruai a, Tirhkoh Malsawmliana'n Baptisma Rawngbawlna a nei a ni.

Baptisma khur hawn ni hian kohhran chhung atangin mi 18-in Lalpa Isua hmingin hnim phumin Baptisma an chang a, Kohhran mipui thahnem tak kalkhawmin, Pathian thlarau awmpuina hnuaiah hlim takin hun an hmang a ni.

LUNGLEI 'S' BIAL:

Lunglei ‘S’ Bial chhunga Kohhranpui leh Department hrang hrangte chuan,

Hrileng avanga Inkhawmpui an neih hman tak loh chu

Kalphung pangai lo ang deuhvin kumin atan Rorel inkhawm chauh neih a ni.

Lunglei ‘S’ Bial PYD rorel inkhawm chu

July ni 24 (Zirtawpni) khan Chanmari Biak Inah an nei a.

Rorel palai 53 kalkhawmin, Pastor B.Lalchhanhima (Bialtu Pastor), Upa F.Lalliansanga (Bial Secretary) leh unaunu F.Lalneihthangi (General PYD Assistant Secretary) te chuan an telpui a,

Anni bakah hian Lunglei 'S' Bial chhunga General PYD Committee peng member awmte, T.Upa N.Lalfakzuala leh unaunu K.Lalmuanpuii, Social Wing Committee leh T.Upa T.Lalhmangaihzuala, member Pentecost Meichher Editorial Board te chuan an telpui bawk.

Rorel Inkhawm hi session 2 ah then a ni a,

Thawhkhatna hi Upa J.Lalzekima, Bial PYD President chuan kaihruaiin, chawhnu lamah unaupa Lalruatsanga, Bial PYD Vice President chuan a kaihruai bawk.

Lunglei ‘S’ Bial PYD rorel inkhawm chuan kum 2021 Bial PYD Inkhawmpui chu

March Pathianni hmang khian Ramthar Veng Kohhranah a nghat a,

ATI pual Budgetah ₹3,000 dah te an passed bakah thu pawimawh tak tak an rel a ni.

Lunglei ‘S’ Bial PYD hian kum 2020-2021 Budget atan ₹145,630 an ruahman bawk.

Rorel Inkhawmah hian kum 2019-2020 chhunga PYD member boral sunna hun hman a ni a,

Inkhawmpui inkarah hian PYD member 3 boral an awm a ni.

Bial PYD rorel inkhawmah hian General Missions pual ₹3,200 leh Bethani Childrens Home pualin ₹2664 lakhawm a ni bawk.

Tlai lamah Rorel palaite hian Chanmari PYD ten an buatsaih Chawhlui an kilho nghal a ni.

Lunglei 'S' Bial chhungah hian PYD dinna Tualchhung Kohhran 6 awmin PYD Member 243 (Mipa 165 leh Hmeichhia 78) an awm mek a,

Zuk leh hmuama fihlim thar kuminah mi 3 awmin Zuk leh hmuama fihlim hi mi 48 an awm mek bawk.

General PYD leh General LAD te Joint Official Magazine Pentecost Meichher chu 140 copies an la mek a,

135 Copies an sponsor bawk.

Lunglei ‘S’ Bial PYD hian Kum 2019-2020 chhungin ₹2,89,176 an thawkchhuak a ni.

Bial Missions Department Rorel Inkhawm pawh July ni 25 (Inrinni) khan Farm Veng Biak Inah neih a ni a, vawi 17-na a ni.

He Rorel inkhawmah hian palai 32 an kal a,

Pastor B.Lalchhanhima (Bialtu Pastor), Upa PL Biakmawia (Bial Chairman), Upa F.Lalliansanga (Bial Secretary) leh Upa N.Biakmawia (Bial Treasurer) te chuan an telpui.

Upa Lalhmuzuala Sailo, Chairman Bial Missions Department chuan Rorel Inkhawm a kaihruai a

Rorel turte hlanna Upa PL Biakmawia, Bial Chairman chuan a nei bawk.

An thurel langsar zual zingah April 2-4 chhunga kum 2021 Bial Missions Department inkhawmpui Farm Veng Biak In a neih te,

Bial huap Financial Campaign neih te, Mission Field a Work Camp nei tura hmalakna kal mek, Covid 19 hrileng avanga thulhte a tel a,

Kum 2020-2021 Budget atan ₹65,300 an pawm bawk.

Rorel ni hian General Missions pualin thawhlawm lakkhawm a ni a, ₹3340 hmuh a ni.

Lunglei 'S' Bial ah hian Missions Department dinna tualchhung 6 an awm mek a.

Kum 2019-2020 chhung hian Lunglei 'S' Bial Missions Department te hian ₹110,062 an thawkchhuak a, heath hian General Missions Department-in target a tuk a tello a ni.

Tun dinhmunah Lunglei 'S' Bial Missions Department te hian General Target ₹252,500 an nei mek a. Tualchhung hrang hrangte leh Bial Department Inkhawmpui thawhlawm te nen ₹158,710 chhunglut tawhin, ₹93,790 hmabak an la nei a ni.

Lunglei 'S' Bial kohhranpui Rorel Inkhawm vawi 24-na July ni 26 (Pathianni) khan Electric Veng Kohhran Biak Inah neih veleh a ni a,

Rorel palai mi 50 an tel thei a ni.

Upa PL Biakmawia, Bial Chairmanin chuan rorel inkhawm hi a kaihruai a, Pastor B.Lalchhanhima, Bialtu Pastor chuan Rorel Inkhawm hlanna neiin, kum 2019-2020 Inkhawmpui inkara member boral mi 10 te sunna hun a hmang bawk.

Lunglei ‘S’ Bial Kohhranpui rorelna chuan Kum 2021 Inkhawmpui chu April ni 30 – May ni 2 chhung a neih turin Electric Veng Kohhranah a nghat a,

Pastor Quarters Property lei nan a Bial Department-tin ah target siamte leh thu pawimawh tak tak an rel a ni.

District Committee a thlen tur Agenda 1 an passed bakah,

2020-2021 Budget atan ₹3,668,619 an ruahman bawk

Lunglei 'S' Bialah hian tualchhung Kohhran 6 leh Preaching point 2 a awm mek a,

Member 778 awmin, Kohhran Upa 25,Tual Upa 26,Senior Upa 5 leh Tirhkoh License kawl mek mi 6 an awm bawk.

Kumin chhung hian Lunglei ‘S’ Bialah mithar 20 chuang sengkhawm an ni a,

Baptisma chang thar mi 39 awmin, Ruai nena Pathian Chawimawina vawi 7 an nei bawk.

Pentecostal Jubillee hi 110 Copies an la mek a ni.

Tun dinhmunah Sawmapakhat Target ₹2,800,000 aṭangin ₹2,156,813 an pe tawh a, ₹643,187 an la hmabak a,

Heng bakah hian General Missions Department Target ₹252,500 aṭangin ₹158,710 an pek tawh bakah Buhfaiṭham leh General SS Department target an neite an khum tawh bawk a ni.

Mamit Bial

Mamit Bial chuan August thla, Rammut thla lo thleng turah hian

bial chhung a Kohhran la din lohna Vawngawnzo (Pathiantlang) hmunah Rammu turin an in buatsaih mek a, tunah hian Rammut na tur sum tuak nan,

Tualchhung Kohhran tinte hnenah remchan dan ang zel a sum thawh khawm turin ruahmanna a kalpui mek a ni.

Thalraubo sengkhawm anih ngei theih nan tlang hrang hrang a rinna a unaute tawngtaipui turin min sawm a ni.

KAWRTHAH BIAL

Covid 19 avanga kohhran inkhawm neih theih nilo mahse Kawrthah Kohhranah chuan July Ni 8 (Nilaini) zan ațang khan kohhran Committee-te kaihhruaina in,

Zan lam Inkhawmna kan neih thin hunbi a herchhuah apiangin kohhran in tin ah Home Crusade neih thin a ni a,

Bialtu Pastor, Upa leh Tirhkoh ten rawngbawlna a chhawkin an nei thin a ni.

Ni 22 (Nilaini) zan atang khan kohhran member a duh apiang te tan Home Crusade hi chhim ve theihin hawn zau a ni a,

Home Crusade hi chhunzawm mek zelin, Kohhran ten hlawkthlak an ti hle a ni.

Kawrtethawveng kohhran te pawhin Village Level Task Force-te phalna in,

July Ni 12 (Pathianni) zing ațang khan Home Crusade an nei țan.

Kohhran member leh pawn lam mi atangin Crusade chhimtu hi an țhahnem thei hle a,

Crusade hi Zan tin neih thin niin,

kohhran in mai bak ah, kohhran pawn lam atang te pawhin sawmna a awm avangin hmanpui zel a ni.

Home Crusade-ah hian Tirhkoh Ramhmingthanga, Delhi Missionary chu Speaker ah hman a ni a,

A ni hnen atang hian Pathian thu țha tak tak ngaihthlak țhin a nih bak ah,

Thuthlung zirhona te neih țhin a ni.

Kawrtethawveng Kohhran ten Crusade hi an hlawkpui hle a,

Ni 21 (Thawhlehni) zan khan Home crusade chu an titawp ta a ni.

KOLASIB VENGLAI BIAL

Kolasib Venglai Bial LAD te chuan General LAD rorelna bawhzuiin July ni 19 (Pathianni) khan Nileng ṭawngṭaina hun an hmang.

Tualchhungtinah a rualin LAD te hian he hun hi an hmang a,

Kohhran thenkhat a huhova hmang an awm bawk.

Venglai Kohhran leh

Ṭumpui Kohhran LAD te chuan an Biak In ah an nei a,

Bukvannei, Bethel leh Saihapui 'K' Kohhran LAD te pawhin a huhovin Bethel Biak Inah an hmang bawk.

Nileng tawngtai inkhawm hi Hmarveng leh Saidan Kohhran LAD-te chuan Hmarveng Biak Inah an hmang thung a ni.

LAD member Tualchhungtin a Nileng ṭawngṭaina hun hmangte hi an vaiin mi 61 an ni a, Bialtu Pastor Rev P.Lalrinawma, kohhran Upa thenkhat leh mithahnemngai engemawzatin an hmanpui a ni.

Kolasib Venglai Bial PYD te chuan July Ni 26 Pathianni khan Venglai Kohhran Biakin ah Board meeting an nei a,

General Board Agenda turte leh Kumpuan thupui chungchangte an sawiho.

Heng bakah hian kum 2020 Bial PYD inkhawmpui rorelna in a passed takte leh Budget an neihte an ennawn a,

hripui leng avanga Programme duansa thenkhatte chu meeting hian thulh mai nise an ti a ni.

Tun dinhmunah Kolasib Venglai Bial ah hian PYD membership fee pe hi mi 255 an awm mek a, General a sum chhunluh tur an neih te leh report pek ngaite August 2020 chhung hian pek vek an tum bawk.

N.VANLAIPHAI BIAL

N.Vanlaiphai Bial PYD chuan July ni 26 Pathianni khan Bial huapin

Seminar an nei.

He Seminar hi N.Vanlaiphai Kohhran Biak In ah nghah a ni a,

"Isua Pathianna" leh "Thuthlung" tih thupui hmangin Bialtu Pastor HV.Lalzuithanga’n zirtirna pein,

Bial chhung atangin PYD member mi 34 an kalkhawm thei a ni.

Resource person zirtirna tha tak hnuaiah kalkhawm ten hlawk takin hun an hmang a,

Pathian thu lama an hriatfiah loh laite zawhna hun an nei bawk.

Kalkhawmte hian tlai lamah ruai an kilho nghal ani.