United Pentecostal Church
of Mizoram

Puipate

Rev.C.Lalremsanga General Superintendent chu August ni 4 Thawhlehni khan Lunglei a Mizoram UPC Sub Office tlawhin a zinchhuak a, thawktute nen inkawmna neiin, mamawh leh tul angte an sawiho a, thawktute nen intuaitharna te an nei a ni.

General Superintendent hi Lunglei North leh Lunglei South Bial hruaitute nen inkawmna an nei bawk.

August ni 5 Nilaini khan Lunglei N bial Rahsiveng Kohhrana lawi, Unaupa C. Lalhmingthana te chhungkua, khuarel chhiatna tawkte chu an chenna in ah General Superintendent hian a tlawh bawk a,

Relief Fund atangin Mizoram UPC General Headquarters hmingin pawisa a hlan a ni.

General Superintendent hian Rahsi Veng Kohhran Biak In a hmun ah kalin a enpui bawk a, tawngtaina nen Pathian hnenah a hlan nghal a ni.

Rev C.Lalremsanga, General Superintendent hi August ni 5 khan Mualthuam North-ah riak in Bial hruaitute leh Upa te nen inkawmna an nei bawk a, ni 6 Ningani khan Aizawl a lo let leh a ni.

August ni 8 Inrinni khan General Superintendent-hi Champhai Bial fangin a zinchhuak bawk a,

Tirhkoh Lalsanglura, Upa Lalrinawma Sailo leh Tirhkoh Lianhmingthanga ten an tawiawm.

General Superintendent zinchhuak hian Ngur khua, Champhai Bial chhungah mithar 38 kohhran dang atangin a seng a, Mizoram UPC din a ni.

Rev C.Lalremsanga, General Superintendent rawngbawlna hi Champhai Bialtu, Pastor K.Lalawmpuian a tawiawm bawk a, Bialtu Pastor hian nau hlan rawngbawlna neiin, a kutah Lalpa Isua hmingin mi 7 in Baptisma an chang bawk.

Ngur Kohhran ding tharte inkhawmna atan Biak In tur, In dinglai leh ram zau tha tak awm bawk chu lei fel nghal a ni a, Kohhran hote an lawm hle a ni.

General Superintendent rawngbawl a zinchhuak hi August ni 10 Thawhtanni khan dam takin Aizawl a lo thleng leh a ni.

General Treasurer

Rev Gospelthanga, General Treasurer chu August ni 10 Thawhtanni khan

W.Phaileng Bial tlawhin a zin.

General Treasurer hian Pastor Quarters chhak lei min, Biak In nen a inkar a mi chu a hmunah kalin, harsatna an tawhte a enfiah a.

W.Phaileng BD0 leh Village Council hruaitute nen inkawmna neiin hmalak dan turte an sawiho a ni.

Rev Gospelthanga hian Phuldungsei a tlawh bawk a, Kohhran te nen inkawmna hun an nei bawk.

Secretary, Gen SS Department

Rev C.Ramsangvawra Secretary, General SS Department chu Ni 7 Zirtawpni khan Diltlang ‘S’ Bial tlawhin a zinchhuak a, Pastor H.Laltlankhuma Aibawk Bialtu chuan a tawiawm.

General SS Department Secretary hi ni 8 zingah Khawmawi Kohhranah hun hmangin, kohhran mipuite nen inkawmna an nei a, zan lamah Diltlang ‘S’ ah hun hmang velehin kohhran te nen inkhawmna hun an nei bawk.

Rev C.Ramsangvawra hian Hmunnuam leh Bungtlang kohhranah Pathianni hmangin

Ni 10 Thawhtanni khan Aizawl a let leh a ni.

Area Secretary

Rev Dr.Ngurthanpara Sailo, Area Secretary Southern Zone chu

August ni 9 Pathianni hmang khan Tleu khuaa Kohhran hote tlawhin a zin chhuak a, Pathianni khan Baptisma rawngbawlna neiin, zan lamah khawtlang huapin thuhril rawngbawlna a nei chhunzawm bawk.

Area Secretary hi Nilaini August ni 12 khan Lungsen Bial, Tlabungah rawngbawlna zau zawk nei turin a zin chhuak leh a, Pastor Zionramngaia, Lunglei North bialtu, Pastor Lalhmingchhuanga, Lungsen bialtu leh Upa H. Vanlalsanga, Lungsen bial Kohhranpui Chairman te chuan an țawiawm a,

August ni 13 Ningani khan Lunglei a let leh a ni.

Puipa Committee

Puipa Committee thutkhawm vawi 293-na rorel no.8 chuan Beihrual chungchangah hetiang hian thuchhuah a siam.

Puipa Committee chuan Beihrual chungchang nguntak a ngaihtuahin,

September Beihrual thla lo thleng tur chu a thlir a,

Kohhran hoten Beihrual chu hlawktak leh kim taka hman nise a ti a,

Chutihrual erawh chuan Covid 19 hrileng avanga Kohhran hoten inkhawmna hun kan neih theih tak loh avangin, General Headquarters atang chuan rualkhai taka ruahmanna siam theih ani lova, Puipa Committee chuan Tualchhungtin Kohhrante mahni remchan dan ang a ruahmanna siam a, Beihrual hlawk thei ang bera hmang turin a ngen a,

Zirbu chu Bialtu Pastor tinte kaltlang a ngaihven turin kohhran mipuite a chah bawk.

Kum 2020 Beihrual zirbu hi ‘Ringtu Nun’ tih a ni a, Rev.H.Lalrawnkima, Headquarters Bialtu Pastor buatsaih a ni.

Danpui Commission

Danpui Commission chu a vawikhatna atan August ni 7 Zirtawpni khan General Superintendent Office Chamber, General Headquarters Office-ah an thukhawm a, Upa Sawihlira Convener chuan meeting hi a kaihruai.

He thutkhawmah hian hruaitu thlanna neih a ni a, Danpui Commission Chairman atan Upa Sawihlira leh Secretary atan Rev.Thangliansanga te chu thlan an ni.

Danpui Commission hi Kum 2019 General Assembly chuan din nise a ti a, kumin Executive Committee kum chanve a neih chuan member tur ruatin,

Upa Sawihlira, Upa FH Ramliana, Upa C.Lalropianga, Upa J.Lalramliana, Rev C.Lalremsanga, Rev Thangliansanga leh Rev C.Liansanga te an ni.

General LAD

General LAD hruaitute chuan

August ni 11 (Thawhlehni) khan General LAD aiawhin Bethani Children's Home enkawlna tur (cheng nuaili) Rs 4,00,000/- , Pentecost Meichher enkawlna (cheng singruk) Rs 60,000/- leh Pandal Structure Committee hnenah, Woollen Carpet leina tur (cheng singkhat) Rs 10,000/- an hlan a,

He tanpuina sum hlanna inkhawm hi Conference Hall, General Headquarters Office-ah neih a ni a, General LAD hruaitute hian Department changtute hnenah pawisa fai hi an hlan a ni.

Staff Meeting

Mizoram UPC hnuaia thawktute chuan August ni 12 Nialaini khan

Kumin atana a vawihnih nan Conference Hall, General Headquarters Office-ah Staff Meeting an nei.

Meeting hi Rev.C.Lalremsanga, General Superintendent chuan a kaihruai a, ziaktu hi Upa RD Rothanzauva, Office Superintendent a ni.

Staff Meeting-ah hian Office inrelbawlna kalpui mek chungchangte, hmalakna tur hrang hrangte leh rawtna hrang hrangte sawiho a ni a,

Heng bakah hian

Thawktuten infuih tharna hun an hmang bawk.

Kan hun tawn mek, hrilengin nunphung a tihbuai avangin Staff meeting-ah hian Lunglei a Sub Office Staff-te leh Bethani Childrens Home, Sihhmui a thawktute erawh an tel theilo a ni.

GPYD Social Wing

Social Wing Committee atanga hriattirna kan han puang a nge.

Social Wing Committee, General PYD chuan kumin hian PYD member mi bik chawimawina a buatsaih leh dawn a, chawimawi turte hi

July, 2019 atanga July, 2020 inkar a hlawhtlinna changte an ni ang.

Social Wing Committee chuan tehfung a duang a, chawimawi tur a a thlante chu:

1. HSLC leh HSSLC Top 10 a tlingpha chin.

2. Graduate Level Topper.

3. ATI Graduate Topper.

4. Technical Line Topper (Graduate and above)

5. Master Degree Gold Medalist.

6. Ph.D leh M.Phil Degree.

7. Group ‘A’ Officer a tling chin MPSC, UPSC.leh adangte,

8. Sports : National Level (Gold Medalist), International level Participate chin

te an ni ang.

In report turte chuan, Hming pum, Pa hming, Khua/Veng, Hlawhtlinna leh

Kohhran lawina leh bial hming chiang takin a tarlang tur a ni.

Hming thehlut turte chuan August, 2020 thla chhung hian

Social Wing Committee hruaitute hnenah pek tur a ni.

SIAHA BIAL

Siaha District Crusade Committee ( SDCC ) hmalakna in Amotla (Rawmibawk ) Siaha bial ah Crusade neih a ni.

Crusade neihna hmun Amotla (Rawmibawk) hi June thla a member duhawm tak kan sun tak

Unaunu C.Chite, rinawm tak a Thuthlung a lo vawn tlatna khua kha a ni a,

July ni 1 Inrinni khan Siaha bial atangin mi 30 chuang, District Chairman Upa C.Lalropuia hovin Crusade chu an hmang a ni.

He Crusade-ah hian Tirhkoh Lalnunthara chu Speaker-ah hman a ni a, a hnen atang hian Pathian thu tha tak tak ngaihthlak thin a ni.

Inrinni zan atanga Crusade hman chu Upa.K.Rehena'n a kaihruai a,

Pathian thlarau awmpuina hnuaiah hlim takin hun an hmang.

Ni 2 Pathianni inkhawm chu

Upa C.Lalropuia District Chairman chuan a kaihruai thung a,

KRISTIANNA tih thupui hmangin Tirhkoh Lalnunthara chuan thuhril rawngbawlna a neih chhunzawm a ni.

Pathianni hian tlai lamah mual inkhawm neih chhnzawm a ni bawk a, PATHIAN PAKHAT thu ngaihthlak niin, zan lam thleng he Crusade hi neih a ni a,

Rawmibawk khawtlang mipui engemawzatin an tawiawm bawk.

SDCC in a buatsaih he Crusade hi

Amotla (Rawmibawk) Village Council leh MTP-te hnenah dilna thlen a ni a, an rem tihnaa neih a ni.

Champhai Bial

Champhai bial chhung, Mizoram UPC Kohhran la din lohna hmun Ngur khuaah

Kohhran thar din a ni.

August ni 9 Pathianni khan Ngur khuaa Kohhran pakhat atangin mi 38 te chu Mizoram UPC member ni turin sengkhawm an ni a, he hun hi Rev.C.Lalremsanga General Superintendent chuan telpuiin, mitharte hi lawmluhna a nei a ni.

Hemi rual hian Bialtu Pastor K.Lalawmpuia chuan Isua hmingin mi 7 Baptisma a chantir a, Nau- 9 hlanna a nei nghal bawk.

Ngur khua a Kohhran tharte inkhawmna tur Biak In atan General Headquarters chuan

In dinglai leh ram zau tak awm bawk chu, (cheng Nuaihthum) Rs. 3,00,000 sengin a lei sak a,

Ngur kohhran leh Champhai Bial Kohhran mipuite an lawm hle a ni.

August ni 9 Pathianni khan Bial hrang hrangah mithar sengkhawm a ni a,

Zemabawk bial, Falkland kohhranah chuan Bialtu Pastor Rev V.Rothuamluaia chuan mithar kohhran dang atangin mi 11 leh pem thar mi 9 te nen an vaiin mi 20 te chu Mizoram UPC ah a lawmlut.

Falkland-ah hian GPYD te chuan Tirhkoh Lalnunthara Ralte chu rawngbawl turin a ruai mek a ni.

Adengiri 13 Miles, Guwahati, Assam Field-ah pawh mithar mi 6 lawmluh an ni bawk.

Adengiri 13 Miles-ah hian Phillip Hmar chu rawngbawlin a awm mek a ni.

Pathianni vek khan Durtlang bial, Ramthar kohhranah mithar pahnih kohhran dang atangin Bialtu Pastor C.Lalawmpuian a lawmlut bawk.

Kolasib Diakkawn Bialtu Pastor R.Lalparvula chuan Tuitha Vengah mithar paruk a lawmlut bawk a, Bazar kohhranah pawh August ni 9 Pathianni vek khan Kohhran dang aṭangin mithar 3, bialtu Pastor Rev.R. Lalnghaksangan a seng bawk a ni.

SAIRANG BIAL

Sairang bial PYD hnuaia Silver Jubilee Sub Committee chuan Ni 9 Pathianni khan W. Serzawl Kohhranah meeting pawimawh tak an nei.

He meeting-hi T.Upa Laltanpuia’n a kaihruaia,

Tualchhung tin aiawh an kal tha hle a ni.

Bial PYD-in November ni 17 a Silver Jubilee an lawm tur chungchangte ngaihtuahin

hun hman dan turte an duang a,

tunlai kan hun tawn mek thlir chungin, Silver Jubilee lawmna chu

ropui taka neih nise an ti a,

he hunah hian Silver Jubilee Lung phun nise,

Sairang Bialtu Pastor leh Bial PYD hruaitu lo ni tawh zawng zawng te

chawimawina thilpek hlan nise an ti a ni.

Meeting chuan hun remchang hmasa berah Silver Jubilee pual hian thisen pek an rel bawk.

RABUNG BIAL

Rabung Bialtu Pastor leh Bial hruaitute ruahmannain,

August ni 9 Pathianni khan Aiduzawl a Kohhran In tinah kalin ṭawngṭai rawngbawlna an nei.

He ṭawngṭai rawngbawlna hi Kohhran mipuiten an hlut hle a, miṭhahnemtakin an ṭawiawm a, Bial hruaitute hi Group thumah inṭhen darhin, Kohhran in tinah kal kualin ṭawngṭai rawngbawlna hi an nei a, Biak Inah ṭawngṭaihona neiin hnu an khar a ni.

Rabung Bial hruaitute hian Bialtu Pastor hovin Bial chhung khaw tinah ṭawngṭai rawngbawlna hi neih chhunzawm zel turin ruahmanna an siam bawk.