United Pentecostal Church
of Mizoram

General Headquarters Office, Tuikhuahtlang pawh Lockdown thlahdul anih tak avangin

Dan pangai anga hawn leh a ni a, mipui a duh apiangte tan dawr theih a ni e.

General Superintendent Rev C.Lalremsanga chuan kan hun tawn mekin a zir loh avangin Kohhran mipuite fimkhur taka awm turin min chah a, kan hmalawka Beihrual kan hman tur pawh Tualchhungtinten ruahmanna felfai tak siama, hlawk thei ang ber a hmang turin min ngen.

Area Secretary

Lunglei District-ah Preaching Point hawn a ni.

Rev Dr.Ngurthanpara Sailo, Area Secretary Southern Zone chu August ni 12 khan rammut thla denchhenin, Lunglei District chhung, Tlabung bul Chawnpui khuaah a Rammua, Area Secretary feh chhuak hi, Pastor Zionramngaia, Lunglei “N” Bialtu, Pastor Lalhmingchhuanga Lungsen Bialtu leh Upa Vanlalsanga, Lungsen bial chairman te chuan an tawiawm.

Chawnpui khuaah hian rawngbawlna an neih atangin,

Mizoram UPC zawm duh mi engemawzat an awm a,

Chung mite nen chuan inkawm khawmnate neiin,

Mi 21 lai maite chu Mizoram UPC ah sengkhawm an ni ta a ni.

Chawnpui khuaah hian kohhran ding nghalin, Tirhkoh David Lalsawmliana chu Kohhran hruaitu atan ruat a ni a,

Chawnpui khua chu Mizoram UPC hnuaia Preaching Point pakhatah siam nghal niin, Lungsen Bialin a enkawl ang.

Thla thar lo awm tur kar tir lam hian Southern Zone huam chhunga Bial hrang hrangte tlawh pahin Area Secretary kaihhruaina hnuaiah Mizoram UPC Sub Office, Lunglei a Staff te chuan Beihrual Bu an sem bawk ang.

General SS Department

General SS Department Executive Board thutkhawm vawi 177-na chu

August ni 26 Nilaini khan Conference Hall, General Headquarters Office-ah neih a ni.

Meeting hi Rev F.Lalnghakliana Chairman, General SS Department chuan a kaihruai a,

Mizoram UPC Puipa ten an telpui bawk.

General SS Department-in kumin a hmalakna tur hrang hrang a neihte bawhzui dan tur meeting-ah hian sawiho a ni a,

Kumtin a neih thin Puitling SS leh Naupang SS Exam chu hrileng avanga kan hun tawn mek thlir chungin Puitling SS exam chu neih tura tih a ni a, Naupang lam erawh Beginners Department atanga Doctrine Department-te chuan kumin atan exam neilo mai turin Executive Board chuan a rel a ni.

Heng bakah hian General Board lo awm tur atana Offcial Agenda turte an ngaihtuahho a, SS kaikim hriatpuina leh Zuk leh hmuam chungchanga fihlim tura Naupang SS Zirtirtute ngenna Circular siamte an passed bawk.

General SS Department Executive Board meeting-ah hian Kohhran Pakua atanga SS Hall sakna tur tanpui dilna lo lutte chu ngaihtuah a ni bawk a, an dilna ang hian meeting chuan pek vek tha a ti a.

SS Hall sak tanpuina dawng turte chu,

Tualvungi veng Kohhran, Thenzawl Bial,

Niawhtlang Kohhran, Niawhtlang Bial,

Pangbalkawn Kohhran, Bairabi Bial,

Vaseikai Kohhran, Vathuampui Bial,

Rengtekawn Kohhran, Kolasib Diakkawn Bial,

Thingsulthliah Kohhran, Thingsulthliah Bial,

P Moriah Kohhran, Saikot Bial,

Zemabawk Kohhran, Zemabawk Bial leh Kangrengdor Kohhran, Barak Valley Bialte an ni.

Planning & Financial Board

Planning & Financial Board chu August ni 28 Zirtawpni khan Conference Hall, General Headquarters Office-ah an thukhawma, sum kaihhnawih hmalakna tur hrang hrangte an sawiho.

Meeting-ah hian kum chanve Audit neih zawh taka Audit note-te thlirletna an nei a,

Mizoram UPC hnuaia Board hrang hrang leh Bial hrang hrang atanga hmalakna tur sum hman dilna lo lutte chu uluk takin an sawiho bawk.

He meeting hi Upa J.Lalramliana, Chairman Planning & Financial Board chuan a kaihruai a ni.

Missions Field tan luangchhuak:

Dinthar Bial a Dinthar Kohhran a lawi Pu C.Malsawma te chhungkua chuan Ramthim pual atan General Missions Department Secretary hnenah sum an hlan.

Pu C.Malsawma hian an chhungkuain vawk an vulh atanga malsawmna sum an hmuh Rs.46,000/- chu August ni 26 Nilaini khan General Headquarters Office-ah kalin Rev Pc Laltanpuia, Secretary General Missions Department kutah a hlan a, heng sumte hi Nagaland Field a New Thewati Kohhran Biak In, sak tanna atan hman a ni ang.

He hun hi Pastor Vanlalchama leh Missionary Lalmuanpuia Vaiphei ten an telpui a, Rev Pc Laltanpuian heng sumte hi Pathian henah hlanin lawmthu a sawi a ni.

N VANLAIPHAI BIAL

N.Vanlaiphai Bial Bial LAD leh Bial PYD Inkhawmpuiin Bial chhunga Tualchhung tinah Bialtu Pastorin Seminar min neihpui se , A thupui ah 'Isua Pathianna ' leh 'Thuthlung ' nise tia an rel ve ve chu tluang taka neih zawh a ni.

August ni 9 Pathianni khan Lungchhuan Kohhran Sunday school Hall-ah Lungchhuan Kohhran LAD leh PYD te chuan Joint Seminar an nei a, Bialtu Pastor HV.Lalzuithanga chu Resource Person niin, zirtirna hlawktak a neihpui a, Unaupa PC Lalbiaknia ATI Zirlai chuan Bialtu Pastor hi a tawiawm a ni.

Khawlailung Dinthar Biak In ah pawh August ni 16 Pathianni khan Khawlailung Kohhran LAD, PYD leh Khawlailung Bunghmun Kohhran LAD te chuan a huhovin seminar an nei bawk a, Bialtu Pastor HV.Lalzuithanga'n zirtirna pe in,

T.Upa H.Lalthlamuanpuia (Bial PYD President), Tirhkoh K.Laldingngheta (Bial PYD Secretary) leh Unaupa PC.Lalsangmawia ten Bialtu Pastor hi an tawiawm bawk.

Seminar hnukharna hi N.Vanlaiphai Kohhran Biak In ah

August ni 23 Pathianni khan N.Vanlaiphai LAD te chuan Bialtu Pastor HV.Lalzuithanga zirtirna hnuaiah hlawhtling takin an nei bawk a, heti hian N.Vanlaiphai Bial LAD leh Bial PYD ten Seminar nei tura ruahmanna an siam chu Pathian hruainain Tualchhung tinah an nei kim thei a ni.

N.Vanlaiphai Bial PYD Board chu

August ni 10 Thawhtanni khan Lungchhuan Sunday School Hall ah an thukhawm a, Bial PYD hmalakna tur hrang hrang an sawiho.

Kum 2021 Bial PYD Inkhawmpui N.Vanlaiphai Kohhranah an nghat a, Palai lawmna leh Inkhawmpui hlanna Kum 2021-2022 chhung atana thlan N.Vanlaiphai Bial Kohhranpui Chairman-in a nei ang.

Kum 2020 September thla atangin Pathianni vawihnihna apiangah Chawnghei tawngtai neih an tum bawk.

N.Vanlaiphai Bial PYD Board meeting chuan

Kum 2021-2022 General PYD kumpuan thupui atan TAIMAKNA (II Petera 1:10) chu PYD General Board-ah rawtna thlen nise an ti bawk a ni.

N.Vanlaiphai Bial Kohhranpui Committee chu

August ni 17 Thawhtanni khan Lungchhuan Kohhran Sunday School Hall-ah an thukhawm a, an thurel langsar zual zingah,

kum 2021 N. Vanlaiphai Bial Inkhawmpui, N Vanlaiphai Kohhrana nghahte, March ni 26-28, 2021 chhunga neih tur,

leh Bial Inkhawmpui a Speaker( thuril rawngbawltu) tur ruatte a tel a ni.

N.Vanlaiphai Bial Committee chuan Kum 2021 Bial inkhawmpuiah Bialtu Pastor HV .Lalzuithanga chu Speaker –atan a ruat a, N.Vanlaiphai Bial inkhawmpui hi Bial Missions Department Inkhawmpui nen a ruala neih thin a nih avangin Pathianni chawhma inkhawm thuhril hna chu Bial missions Department chanpualah an dah thin a ni.

Imphal Bial

Imphal Bial K.Twikun-ah August ni 16 - 18 chhung khan member thar mi 20 chhungkaw Nga (5) te chu Mizoram UPC-ah sengkhawm an ni a, hrileng avanga lock down kalpui mek karah heti zat mai mithar seng leh ani hi Imphal Bial kohhrante an lawm hle a ni.

He mithar lawmluhna inkhawm hi Bialtu Pastor Alex Thangrolian chuan kaihruaiin, Mizoram UPC-ah a lawmlut a,

Thlarau bo mekte sengkhawm an nih theih nan a theitawp chuahtute K Twikun kohhran Upa, T/ Upa leh Tirkoh te chungah Bialtu Pastor hian Lalpa Isua hmingin lawmthu a sawi a ni.

Heng mithar lawmluh takte pual hian Baptisma rawngbawlna neih thuai an tum bawk a ni.

Headquarters Bial

Headquarters Bial Missions Department Board chu August ni 15 khan Pastor Quarters Tuikhuahtlangah, an thukhawm a, Upa Lalduhawma Chairman Bial Missions Department chuan a kaihruai.

Meeting-ah hian Bial hmalakna tur hrang hrang sawiho a ni a, Voluntary Missionary Bishnupur a awm mek unaupa Lianhmingthanga leh Gauhati Missions Field-a rawngbawltu Philip Hmar te chu Bial hminga tanpuina pek nise an ti a,

Heng bakah hian Bial Missions Inkhawmpui rorelna in a lo pass tawh, Missions Field-te Chirstmass hlim taka an hman theih nan tanpuina sum pek nise tih chu kaltlangpui nise an ti a, Kumin chhunga Bial huap Revival neih tum erawh kan hun tawn mekin a zir loh avangin thulh a ni.

Headquarters Bial PYD Board chu August ni 26, Ningani zan khan Headquarters Kohhran Biak In ah an thukhawm a,

Kum 2020 General Board thutkhawm awm tur atana Agenda turte an ngaihtuah.

Meeting-ah hian Samtlang Kohhran PYD member boral ta, unaupa Vanlalnghaka ral chungchangte an sawiho bawk a, Tualchhung hruaitute nen inbe rawnin Bial PYD hian ralna hun an hmang ang.

Keifang Bial

August Ni 20 (Ningani) zingkâr khân, Keifang Kohhran Biak In ah, Unaupa Eddie Lalrinmawia (Saitual) leh Unaunu Vanengpari (Lungkawlh) khua a mi te chu, Lalpa Isua hminga Baptisma chantir an ni a, kohhran dang a lawi thin niin, Keifang Bialtu Pastor C.Lalramnghakan Saitual Kohhran a lawi turin Mizoram UPC-ah a lawmlut a ni.

Ni 26 (Nilaini) zingkarah kohhran dang atangin Unaunu Lalsaimawii leh Unaunu Rochanhlui te chu, Keifang kohhran a lawi turin, Pastor C.Lalramnghaka'n a lawmlut bawk.

Keifang Bial a Maite kohhran hman atan Pulpit ṭha tak mai chu, Unaupa Lalthanzuala te chhugkua, Keifang a mi te chuan, a thlawnin an siam sak a,

Maite kohhran an chungah an lawm hle a ni.

Keifang Bial a Kohhran hrang hrangte tunlai hian an tul hle a,

N.Lungpher Kohhran Missions Department chuan, Ramthim tih hmasawn zelna atan hnatlang neiin sum an tuak thin a,

Kohhran member tam lohna ni mahse

Kan khawvel hun tawn mek karah pawh hnatlang thawkchhuak thanemtak an awm thin chu Missions Department hruaituten ropui an tiin, kohhran mipuite chungah an lawm hle a ni.

Tualbung Kohhran te pawhin, An Biak In sakna atana hmanrua tul leh pawimawh tur Chakte lain, Thingzai hnatlang tunlai hian an nei thin a,

Kohhran member nawlpui te tibuailo zawngin, Kohhran Committee ten, Chawlhkar tin, Thawhṭanni apiangin, Hnatlangin an thawkchhuak thin a ni.

Lunglei N Bial

Lunglei N Bial Committee chu August ni 22 Inrinni khan an thukhawm a, Bial hmalakna tur hrang hrangte an sawiho bakah Lunglei N Bial in General leh Bial Budget an neihte thlirhona neiin, chak taka bawhzui an tum.

Inrinni hian Bial huap hnatlangin Pastor Quarters ramri an hung tha bawk.

Lunglei N Bial PYD Board pawh ni 25 Thawhlehni zan khan thukhawmin, Budget an neihte an thlirho a, hun tawn mek thlir chungin Budget tlak dan turte an sawiho a ni.

General Headquarters ngenna angin, Lunglei N Bial chuan Beihrual, hlawk thei ang berin hman an tum a, hrileng laka him tlan zawk nan Bial chhunga Tualchhungtin ten hun tawn mek thlir chungin ruahmanna siam an tum ani.

Bawngkawn Bial

Bawngkawn Bial SS Board August ni 15 khan Thuampui Kohhran Biak In ah an thukhawm a,

Chairman Upa H.Lalrintluanga’n meeting a kaihruai.

Meeting thurel chuan Covid-19 avanga puipunna lam thil huathawt a theih tak loh avangin Bial SS inkhawmpui chu rorelna chauh neih nise a ti a, September ni 6 Pathianni lo awm tur hmang hian Zuangtui Kohhranah Biak In ah an nei ang.

Chaltlang Bial

Rammut thla anih angin Chaltlang Bial chhungah Rev B.Kapmawia Bialtu Pastor chuan rawngbawlna a nei mek a, Ramhlun Sports Complex leh Chaltlang Kohhran chhungkaw tinte a tlawh chhuak tawha, rawngbawlna hmachhawp a neih mek laiin Aizawl khawpui chhungah hrikai an pung zel si a, tunah hian Tualchhung pathum ah rawngbawlna nei turin a inbuatsaih mek a ni.

Bethlehem Bial

Bethlehem Bial a Bethlehem Vengthlang Kohhranah Baptisma rawngbawlna August ni 22 khan buatsaih ani a, Lalpa Isua hmingin mi pangain Baptisma an chang.

Baptisma chang thar zinga pahnih hi kohhran dang niin, hemi ni hian Bialtu Pastor Rev.Pc Parliana’n Mizoram UPC ah a lawmlut nghal a ni.

Baptisma rawngbawlna hi August Rammut thla Bial chhunga kalpui mek rahchhuah niin, Bialtu Pastor hian a remchan dang angin rawngbawlna a neih chhunzawm zel a ni.

Bethlehem Bial LAD pawhin tunlai hian Bethani Childrens Home pualin Tualchhung tinah thawhlawm an khawm mek a, Bial hruaitute ruahmannain thawhlawm tling khawm hi Bethani Childrens Home hruaitute hnenah hlan a ni ang.

Kolasib Diakkawn Bial

Kolasib Diakkawn Bialtu Pastor Rev R.Lalparvula leh Bial hruaitute hmalaknain, kar kalta khan Rengtekawn Kohhranah mithar pathum chhungkaw khat a mite chu Mizoram UPC-ah lawmluh an ni a, Tuitha vengah pawh kohhran dang atang vekin mithar pali awmna chhungkaw khat lawmluh an ni bawk.

August thla tir lam khan mi paruk chhungkaw khat a mi chu Mizoram UPC ah lawmluh an lo ni tawh bawk a, tihian

Kolasib Diakkawn Bialah kumin chhungin mithar 31 sengkhawm an ni tawh a ni.

Kolasib Diakkawn Bial LAD ten Pastor Quarters thawmthat nan a Rs.20000 budget an neih atangin August ni 22 khan property tha tak an lei.

August ni 25 Thawhlehni khan Diakkawn Kohhranah Baptisma khur hawn a ni a, Pi Khumi kum 60 mi, Cancer natna in a tlakbuak mek chuan damna beiseiin, Lalpa Isua hmingin Baptisma a chang nawn leh a ni.

Khawzawl Vengthar Bial

Khawzawl Vengthar Bial Neihdawn Kohhrante chuan ni 23 Pathianni khan

An kohhran Sr Upa H.Thankhuma leh Sr.Upa Vanhnuainghinga te chawimawina hun an hmang.

Neihdawn Kohhrante chuan an hruaitu hmasa pahnihte hi Kohhran hmasawnna atana tha leh zung an sente chu ropui an ti a, thangthar zawkte tana entawn tur hnutchhiah tha tak tak an neite chu chawimawi tlakah ngaiin, an pualin hun hman a ni a, Kohhran hoten lawmthu an sawina leh chawimawina thuziakte hi hlan an ni ta a ni.

Mamit Bial

Mamit Bialah pawh Rammut thla anih angin Bialtu Pastor H.Lalthankima chu Pathian tlang (Vawngawnzo) hmunah tunlai hian rawngbawlin a awm mek.

Mamit Bial chhunga Kohhranpui leh Department tam zawk chuan General-a Budget an neihte an tlak fel tawh bawk.

Bial Committee thukhawm chuan, Bial chhung Kohhran la din lohna khuaah din turin hmalak nise a ti a, chumi hmun a rawngbawl turin Bial Kohhranpui leh Bial Missions Department-in rawngbawltu pakaht ve ve ruai turin ruahmanna an siam a ni.

Mamit Bial committee chuan Pentecostal Jubilee Bial chhunga Kohhran in tin a thlen theih nan, Subsidy a lak nise a ti a, chanchinbu man 50% Bial Kohhranpuiin a tum ang.

Missions pualin kumin chhung hian Bial huap Crusade buatsaih an tum a,

Kum 2020 chhung ngeiin Bial huap tawngtai Bethel neih an tum bawk.

Damdiai Kohhran Biak In Mamit Bial a mi, ft 36 ft 18 bial a sak chu tunah hian luah theih a peihfel thawkhat a ni a, Inrinni hian kawngkapuite vuahin hnatlang a sak chhunzawm a ni. Pulpit, thutna leh Electric wiring-te a tul anga hmalak chhoh an tum bawk.

Damdiai Kohhran Biak In leh a sakna hmun te hi Bial chhunga Kohhran mipui thahnemngaite sum thawhkhawm atanga sak leh lei a ni a, General Headquarters atangin tanpuina an dawng hranlo a ni.

Durtlang Bial

Durtlang Bial chuan August thla atang hian Inkhawm la theih loh mahse, Kohhran In tinah Sunday School thawhlawm an khawn tan dawn a, Sawmapakhat leh ramthim pual thawhlawmah pawh nasa takin tan an la mek bawk.

Bial SS Department inkhawmpui rorelna chuan naupangte pualin Media kaltlanga intihsiakna thianghlim buatsaih a tum a, category 2 ah thenin Beginner atang a Primary leh Junior atanga Senior Department te an ni.

Durtlang Bial chhunga naupang SS Department-te hian Recitation leh solo hmangin inelna an nei dawn a, mahni awm hmun theuhah video Contest ang a buatsaih tur a ni a,

Solo leh recitation-te video camera a record chu Bial SS hruaitute hnenah September thla chhungin an thehlut anga, chuta tang chuan result siam a ni dawn ani.

Durtlang Bial ah hian August thla chhungin mithar pahnih sengkhawm an ni bawk.

Dilkawn Bial

Dilkawn Bial chhungah hrileng avangin tunlai hian rawngbawlna lam hawiin hmalak a harsa hle a,

August ni 3 khan Pastor Quarters siam that hnatlang neiin, a bangte thlak a ni a, tuizem dahna turte an siam a ni.

Delhi

Delhi Kohhran te erawh chu Inkhawmna an la nei thei zela, kohhran member Mizoram lama haw chho mi 40 chuang an awm avang erawh chuan tunlai hian inkhawm an thahnem thei vaklo thung.

Delhi kohhranah hian chhungkaw khat member pali awmna chu tun hnai hian lawmluh an ni bawk.

Bial dang ang bawkin, Delhi Kohhran ah pawh Audit tluang takin an nei zo thei a ni.

Khawhai Bial

Khawhai Bial Pastor Quarters sak thar chu luah theih a peihfel a ni.

Cheng nuaisawmpanga senga sak Pastor Quarters hi August ni 26 Nilai zan khan Kohhranho ten

Pathian hnenah hlanna an nei.

Khawhai Bial Pastor Quarters hi kum 2018 atanga sak tan niin, General Headquarters atanga tanpuina an hmuh atanga hmalak chhoh a ni a,

Pastor Quarters tha tak mai an neih theih nana tha leh zung sengtute chungah Bial hruaitute an lawm hle a ni.

Kawrthah Bial

Kawrthah Kohhran ten July thla atanga Home Crusade an neih chu, an la chhunzawm mek zel a,

September thla tir lam hian an zo fel ang.

General ngenna bawhzuiin Kawrthawh Kohhran Committee chuan Beihrual chu hlawk thei ang bera hman an tum a, In tinah Beihrual bu zirna hi neih ngei an tum a ni.

Kawrthah SS Department te pawh sum tuak hnatlang neiin ni 26 Nilaini khan huan an sam a, member thahnemtak an thawk chhuak a ni.

August Ni 9 Pathianni khan Kawrtethawveng kohhranah mithar pakhat Mizoram UPC ah seng luh a ni a, he lai hmunah hian Bial Kohhranpuiin a rawih, Tirhkoh Zionramngaihzuala Venghlui chuan rawng a bawl mek a ni.

Bial PYD rorelna bawhzuiin Kawrtethawveng PYD te chuan Ni 23 Pathianni khan Khaw chhungah Bible Track semin an hnatlang.

Hrileng avanga Biak In te khar a nih tak avangin Pathianni hian mipuite mahni chenna in ah an awm deuh vek thin a, Bible Track hmanga rawngbawlna hian hna a thawh ngei an beisei a ni.

LUNGLEI 'S' BIAL

Lunglei ‘S’ Bial PYD hmalaknain August ni 23 (Pathianni) chawhnu khan Lalhlupuii te In,Electric Vengah Bial huapin Fehchhuahna leh fellowship an nei.

He hun hi C.Lalṭanpuia, Ramthar Veng PYD Secretary chuan kaihruaiin Fehchhuahna aṭang hian ₹4705 a tlingkhawm a, thalai kalkhawmte hian inkawmna leh items hrang hrang hmangin hun an hman chhunzawm bawk.

Lunglei 'S' Bial PYD te hian Bial PYD Inkhawmpui rorelna bawhzuiin August ni 28 (Zirtawpni) khan ATI pual thawhlawm ₹3000 Dean Rev.Zoramthara hnenah an hlan bawk.

August ni 24 (Thawhṭanni) khan Sr.Upa R.Lalmuana, Kum 87, Electric Veng Kohhran ami chu Semi Stroke avangin a boral a, a tuk ni 25 (Thawhlehni) khan Electric Veng thlanmualah vuiliam ani.

Lunglei ‘S’ Bial Committee chu August ni 25 (Thawhlehni) zan khan Pastor Quarters ah an thukhawm a,

Upa PL Biakmawia, Bial Chairman kaihhruai meeting chuan Bial Inkhawmpui rorelte bawhzui dan turte an ngaihtuah a, heng bakah hian Senior Upa boral tate ralna hun hman dan tur an ngaihtuah bawk.

Lunglei 'S' Bial chhunga Kohhran hrang hrang Electric Veng, Ramthar Veng leh Ṭhangpui Kohhrante chuan tunlai hian Biakin an sak chhunzawm mek zela, kohhran hnatlanga thawkchhuak an thahnem thei hle a ni.