United Pentecostal Church
of Mizoram

PUIPA Committee

Mizoram UPC Puipa Committee vawi 294-na chu September 2 Nialini khan General Secretary room, General Headquarters Office-ah neih a ni a, Relief Fund atanga tanpuina pek tur leh District hrang hranga Inkhawmpui rorelna hmanpui dan turte an rel.

Puipa Committee chuan Kohhran member tanpui ngai nia a hriat, unaupa Lalbiakmawia Chanmari West, Aizawl; Chaltlang panna kawngpui sira footpath tur lungrem mek chimin an chenna in a den chhiat leh Tirhkoh J.Rinnaliana, Meidum khuaa rawngbawl tura rawih mek vanduaithlak taka Covid-19 veite chu Relief Fund atangin tanpuina sum pek nise a ti a,

Heng bakah hian meeting chuan District hrang hrang Inkhawmpui rorelna hmanpuitu turte hetiang hian a ruat bawk:-

Upa Andrew Laldingliana Executive Chairman hian Lunglei District, N.Mizoram District leh Myanmar District-te a hmanpui a nga,

Rev C.Lalremsanga, General Superintendent chuan Serchhip District, Tripura District leh Tuichangral District-te a hmanpui ang.

Rev Hc.Lalthlamuana, General Secretary hian Manipur District, Khawthlang District leh Hmarthlang District-te a hmanpui dawn a,

Rev Gospelthanga General Treasurer chuan Siaha District, Ramthar District leh Hmarchhak District-te a hmanpui a nga,

Rev Dr.Ngurthanpara Sailo, Area Secretary hi Lawngtlai District rorelna hmanpui tura tih a ni bawk.

Pastoral Board thutkhawm vawi 91-na in a rel angin, Pastor pahnih lak tur chu Puipa Committee chuan October 2020 thleng dilna hawn nise a ti a, Advertisement hi a rang lama tihchhuah thuai a ni ang.

General Treasurer

Rev.Gospelthanga General Treasurer chu September ni 7 Thawhtanni hian Khawchhak tlangdung fangin a zinchhuak dawn a, Ruantlang leh Keifang Bialtu Pastor Quarters sak tan turte leh Champhai Bialtu Pastor Quarters sak mek a hmunah kalin a enpui ang.

General Treasurer hi Upa J.Lalramliana Chairman Planning & Financial Board leh unaupa F.Lalramhmachhuana Kohhran Driver-ten an tawiawm ang.

Area Secretary

Rev Dr.Ngurthanpara Sailo, Area Secretary Southern Zone chuan Lungsen bial, Zehtet khua a, September Ni 1 Thawhlehni atang a Work camp neih chu a telpui a, Area Secretary hi Lunglei South Bialtu Rev B Lalchhanhiman a țawiawm.

Lungsen bial atangin Bialtu Pastor Lalhmingchhuanga leh kohhran member tlawmngai mipasarih te an thawk chhuak bawk a, Zehtet khuaah hian Tirhkoh Quarters leh Biak in tun din an tum a ni.

Area Secretary-hi a tuk September ni 2 khan Lunglei-ah a let leh ani. 

Manipur District

Manipur District Committee chu August ni 23 Pathianni khan an thukhawm a, District inkhawmpui chungchang sawiho a ni.

Manipur District Committee chuan Kum 2020

kum chanve Executive Committee-in Covid-19 hrileng avanga kan hun tawnin a zir tak loh avangin District Inkhawmpui, revival programme anga kalpui rih loh nise a tih chu, kan him tlan zawk nan zawm tha a ti a, Kum 2020 District inkhawmpui chu Rorelna chauh nei turin ruahmanna a siam.

Committee chuan Kum 2020 Manipur District inkhawmpui rorelna chu Rengkai Kohhran Biak Inah a nghat a,

November Ni 1 (Pathianni) ah an nei ang.

Rorelna ah hian Member boraltate sunna hun hman a ni dawn a, Pastor Lalnunzama, District Superintendent chuan he rawngbawlna hi a nei dawn ani.

Meeting-ah hian Rorel palai chungchang ngaihtuah a ni bawk a, Mizoram UPC Danpuiin rorel palai tur a pek sa chu hman nghal mai nise an ti a, District Committee member zawng zawng, District chhunga Upa leh Tual Upa, Licence nei zawng zawng, Bial Department hruaitute leh District chhunga General Huap Department leh Executive Board member ten ro an rel ang.

District chhung atanga

Rawngbawlna Licence dil an awm chuan, rorel inkhawm zanah written exam buatsaih ni se, District hruaitute bawhzui atan meeting chuan a rel bawk a, a tuk November ni 2-ah District Committee hmaah, Personal Interview an nei dawn ani.

Manipur District Committee chuan, District rorel inkhawm lo awm tur atana Agenda neite chu October ni 17 ral hmain District Secretary hnenah thehlut vek turin a ngen bawk.

Distict inkhawmpui Rorel ni hian Missions Department pualin thawhlawm lakkhawm a ni dawn a ni.

Dinthar Bial

Covid-19 hrileng avanga inkhawmna leh rawngbawlna peng hrang hrang chhunzawm theih anih tak loh avangin Bial hrang hrangah chuan Biak In, Pastor Quarters leh SS Hall-te thawmthat hnatlang neih a ni a, Dinthar Kohhran te pawhin Sunday School Hall ah Baptisam khur tha tak an siam thar a, lockdown chhungin biakin thawmthat ngai lai engemaw zat an siamtha bawk.

Dinthar kohhran chuan Beihrual thla anih angin, chhungtinte mahni remchan dan anga hmang turin a ngen a, Kohhran In tinah Beihrual Bu hi a thlawnin an sem vek bawk a ni.

Dinthar Kohhranin

Silver Julibee hmang tura ruahmanna engemaw chen akalpui tawh chu hrileng avanga fimkhur a ngaih tak zel avang leh kan him zawk nan Jubilee lawmna chu neih loh mai nise an ti a, Jubilee puala T.shirt siamte, jubilee lungphun te erawh chu hun tawn mek ngaichang chunga tihhlawhtlin an tum a ni.

Dinthar Kohhran hian Jubilee pual hian kum tir lam khan Calendar an lo buatsaih tawh bawk a ni.

UPPER ASSAM

Tezpur (Upper Assam field) ah member thar-1 (pakhat) Mizoram UPC ah lawmluh ani.

May ni 17 a SESSA / PANBARI hmuna Crusade programme neih zawh takah khan mithar 13 Mizoram upc ah sengkhawm an ni a, hemi ni a lawmluh tum nupa tuak khat, unaupa Tartius te nupa khaw dang a awm chu rampuma lockdown kalpui anih tak avangin lawmluh hman an ni ta lova, Kohhran hruaituten hun remchang hmasa berah lawmluhna hun buatsaih an tum laiin, August ni 2 khan unaupa Tartius nupui Surpina chu dam lohna avangin a boral a, inbiak pawhnate a that loh avangin Kohhran hruaitute pawh hian an hre mai lo a ni.

Unaupa Tartius-a te nupa hian Mizoram upc a lawmluh an nih hma atangin an in rel lai, la sakzawh loh leh an la luah miah loh chu Mizoram UPC a lawmluh an nih hnuah inkhawmna tur Biak In atan an pe bawk a, lawmluh an nih hma atangin Lockdown phelh karah Kohhran miten inkhawmna an nei thin a ni.

August ni 28 khan Tezpur-a kohhran member pathumte nen Upa LB Thanga hovin Trhkoh C.Lalruatfela te chuan Kohhran mite tlawhna leh inkhawmna hun an nei a,

Hemi ni hian

unaupa Tartius chu a nupuiin boral san tawh mahsela Isua hmingin Baptisma a chang a, Tirhkoh C.Lalruatfela chuan Mizoram UPC-ah a senglut ta a ni.

Mithar lawmluhna hian Kohhran hote lawmna thlen mahsela, lawmluh tak nupui Surpina, Mizoram UPC a lawmluh ani ve hmanta lo erawh chuan kohhran hote zingah lungchhiatna a thlen bawk.

Bethlehem Vengthlang kohhran member tlawmngaite hnen atanga pawisa an dawn hmang a Holy Bible an lei chu Tirhkoh C.Lalruatfela te hian kohhran memberte hnenah an sem nghal a ni.

SIAHA BIAL

Rawmibawk khuaah mizoram upc kohhran thar a ding ta.

September ni 1 (Thawhlehni) zan khan Rawmibawk khuaah member 68, chhungkaw 14 te chu Mizoram UPC-a awm turin, Siaha District Superintendent Pastor C.Lalhmingsanga'n Lalpa Isua hmingin a lawm lût.

Lawmluh takte zingah hian an lawina hmasa a kohhran Upa leh Mission Secretary nilai te bakah Naupang pawl lam hruaitute pawh an tel a ni.

He lawmluhna inkhawmah hian Siaha Bialtu, Pastor F.Lalthakima chu inkhawm kaihruaitu niin, Siaha atangin Upa paruk bakah Rev.H.Halai (Rtd) te kalin, Thiahra lam atangin upa leh kohhran member engemaw zatin an telpui bawk.

Rawmibawk hi a Mara hming chu Amotlah (official-a hming thlak a ni tawh a) Siaha bial chhung niin, Siaha atang hian Km 30 bawr vela hla awm a ni a,

He khuaah hian Unaunu C.Chite ( Chhaingo Nu tia kan hriat lâr) te nupa chu rinawm takin thuthlung an vuana, Kum 1998 khan a pasal hi lo boral tawhin,

kum tam tak amah chauhvin

Mizoram UPC kohhranah a awm a, sawichhiatna leh dodalna tam tak karah a thihni June ni 11 thleng khan Thuthlung chu rinawm takin a vuan a ni.

A that lai hun zawng zawng Thuthlung puan nan a hmang a, khawhar inah te thahnemngai tak a Thuthlung leh Isua chauh Pathian a nih thute a sawina rah chu a takin a lang chho ta a ni.

Unaunu C.Chite a boral hnu hian rawngbawlna inhawng chho zelin, SDCC (Siaha District Crusade Committee) chuan Tirhkoh Lalnunthara Thuampui, Aizawl chu July ni 1 atang khan rawngbawl turin a ruai a,

revival crusade neih chho nghal a ni .

Rawngbawlna ngawrh taka chhunzawm chhoh zel a nih laiin,

Pathianin hna a thawk a, mi 68 lai mai chu Mizoram UPC-ah seng an ni ta a ni.

Unau thar lawmluh takte pual hian Baptisma chan runpui buatsaih tum a ni a, hemi rual hian

Pathian hnena ran talha lawmthu sawina neih nghal a ni ang.

Lawmthu sawina atana senso ngaite leh Tirhkoh chenna in luah mante chu Upa Lalthlamuana Hnamte, Chaltlang chuan a tum dawn a ni.

Pi Chite-i te nupa rinawmna leh chhelna avanga Amotlah hmuna Kohhran a ding tur chu Siaha Bial mipuite an phurin an lawm hle a ni.

Sairang Bial

Sairang bial LAD te chuan bial inkhawmpui a an rorelte chak takin an bawhzui zel a,

Tualchhung tin ten Bethani children home ah tanpuina thil pek hlan nise an tih chu, tualchhung tin LAD te chuan an pe tawh a,

ATI ah pawh Tualchhung thenkhat LAD te chuan thilpek an hlan a, kumin a ATI sesson an tihtawi tak avangin Tualchhung thenkhat chuan an la tihlawhtling ve theilo a ni.

Bial huapin LAD te chuan Bible ralchhan Tirhkohte thiltih bu, Tk C.Malsawmsanga bial chairman buatsaih hmangin an nei mek bawk a ni.

Sairang Bial LAD te chuan

General budget leh general a lut tur chi sum te pawh lakhawm tawhin, tlak vek tumin hma an la a, tunah hian General Headquarters-a chhun theihin an peihfel tawh a ni.

September ni 2 Nilaini khan bial rorelna bawhzuiin Sairang Public Health Centre-ah poor fund atan ₹ 5000/- chu Sairang Bial LAD hruaitute chuan Damdawiin ah kalin, thawktute hnenah an hlan bawk.

Khawzawl Vengpui Bial

Khawzawl Vengpui kohhran chuan, UD&PA atanga, kawng siamna tur an hmuh hmangin, July thla khan Biak In leh Pastor Quarters a Motor luh theihna turin kawng an lai a, tunah hian cement concrete a chhun vek niin, ke a kalna tur pawh Checker Tile an phah zo tawh a,

vawn ban siam hna an thawk mek bawk.

Khawzawl Vengpui Kohhran Biak In pawh sak chhunzawm mek zel a ni.

Khawzawl Vengpui kohhran atanga in dangta, Lungvar kohhran chuan August thla tir atang khan Biak In sa turin an in buatsaih a, Kar thar lo awm tur September ni 7 chhoah hian Biak In lungphum phumin, biak In sak tan an tum a, tunah hian Biak In ban phun mai turin Kohhran hote an in peih tawh a, Biak In hi a dung ft 36 leh a vang ft 24 a lian a sak an tum a ni.

Lungvar kohhran hi February Ni 19, 2020 khan Khawzawl vengpui kohhran atang a indang a, member 36 an awm mek a ni.

Khawzawl Vengpui Bial Missions Department board chu July thla tawp khan an thukhawm a,

General budget an tlin ngei theih nan a hmalak dan turte an ngaihtuah.

Meeting chuan Bial hruaitute bakah mi engemawzat ruatin, tualchhung tinten Missions budget an tlin theuh theihna tura ruahmanna siama hmala turin a ngen a,

chu hmalakna kal zelah chuan Tualpui kohhran Missions department chuan budget tuak nan thing lain hnatlang an nei a ni.

Khawzawl Vengpui bial LAD chuan August thla khan bial board neiin, kum 2020 Bial inkhawmpui Rorel bawhzui dan turte an sawiho a, Pastor Quarters-ah carpet thar phah leh Khawzawl Damdawiin tana Poor fund chu pek thuai nise an ti a ni.

Khawzawl Vengpui Bial LAD Board Meeting chuan LAD General Board atan

Bial aiawha rorel palai turin Unaunu Lalrinthangi an ruat bawk.

Khawhai Bial

Covid-19 Hrileng avang a Kohhran Inkhawm theih rihloh mahse, Khawhai Bial chhunga Kohhran te chuan mahni remchan dan ang zelin, Rawngbawlna an chhunzawm.

Tlangpui kohhran chuan Pathianni Zing Dar 10:30 Am apiangin Tawngtai inkhawmna an nei thin a,

Inkhawm apiang hian thlaithar thawhlawm kengkhawmin Kohhran hote zingah Lilam leh thin a ni.

Suday School naupangte pawh mahni Department tin Zirtirtute in ah kalin , SS Zirlai an zir thin bawk.

Khawhai Kohhran pawhin Inrinni zan, Pathianni zing leh Pathianni Zanahte Tawntaina hun an hmang a,

Tulchung thenkhatah Inkhawm theih rihloh mahse kohhran hmasawnna atan Kohhranpui leh Department hrang hrang te chuan sum tuak hnatlang an nei thin a,

A tul ang zelin Kohhran in ah te rawngbawlna an nei a ni.

Senvon Bial

Senvon Biala Lailak kohhran chuan September ni 1 (Thawhlehni) khan an tualchhung kohhran din champha kumkhatna an lawm.

Kohhran kumkhat lawmna hi ruai nen an hmanga,

Chhun leh zanah bialtu pastor Ramdinsanga'n Pathian thuchah sawiin, he hun hi

kohhran dangte pawhin an ţawiawm a ni.

Senvon Lailak kohhran hi kum 2019 September ni 1 khan Pastor Paul Lallianmawia hmalaknain bul țan a ni a, Rev.Gospelthanga, General Treasurer chuan Kohhran member -te lawmluhna hun a hmang a, Kohhran hi din a ni.

Lailak Kohhran Biak In hi General Headquarters chuan leisakin, a tirah hian mi 40 velin bul an tana, tunah hian Mizoram UPC member mi 62 an awm mek a ni.

Mualthuam N

Mualthuam N Bial-ah pawh a theih anga rawngbawlna kalpui mek zel a ni a,

Mualthuam North Kohhran bikah hian Mic Service hmanga Pathian thu puan chhuahna Bialtu Pastor RT Laltanpuian a nei thin a, Inkhuahkhirhna khauh taka kalpui anih avangin Bial fan a theih rih loh ani.

Covid 19 hri avang hian Mualthuam North khaw chhungah pawn lam mi luh phal a nilo a, a khawchhung a mite pawh khaw dang a vah chhuah a remlo a ni.