United Pentecostal Church
of Mizoram

PUIPA Commitee

Puipa committee vawi 295-na chu October ni 7 Nilaini chawhnu khan neih a ni a,

Kohhran hmalakna tur hrang hrangte sawiho a ni.

Puipa thukhawm chuan

Kum tawp ro relna hrang hrang chu hetiang hian neih hun tur a ruat a:

1) Pastoral Board - December ni 7, 2020

(Thawhtanni 10:30 am)

2) Executive Committee - December ni 8 & 9, 2020

(Thawhlehni & Nilaini 10:30 am)

3) Assembly Ro rel - December ni 10&11, 2020

(Ningani & Zirtawpni 10:30 am)

leh 4) Nomination Committee- December ni 7, 2020

(Thawhtanni zan 6:30 pm) ah te a ni ang.

Heng bakah hian Thawktute GPF puk dil mi parukte hnenah an dil angin puktir phalsak an ni a,

Kum tawp General Assembly thlen dan tur chungchangte sawihoin, a thlengtu tur bial, Bazar bial hruaitute nen October ni 11 hian inkawmna an nei bawk ang.

General LAD atanga ram pum huap Buhfai tham, tham tha lawmman pakhatna atanga pathumna leh a tham tha zual mi 10 hnena consolation prize pekna tur an dil chu Puipa Committee hian a remtih sak bawk.

Puipa Committee chuan North Khawlek bial Phuaibuanga Tirhkoh dahsak leh tura ngenna chu Phuaibuang dinhmunte ngaihtuahin an dil ang hian rem tih sak a ni a,

Ngopa-a Full Time Evangelist rawih lai, Tirhkoh Lalrindika chuan Ngopa chhuahsan chuang lova vil leh enkawl rih mai turin ruahmanna a siam a ni.

Puipa Committee chuan Pastor Chart – 2020 chu chak taka bawhzui a siam ni se an ti bawk a ni.

Foreign Mission Board meeting chu October ni 6 khanneih a ni bawk a,

Foreign Missions rawng bawlna hrang hrang an thlir ho a,

Shan ram (Myanmar)-a thawktu Tirhkoh Robert-a Chuap Cancer avanga dam lo enkawl mek chu chhawmdawlna pek rem tih a ni.

Thawktu tanpui nan hian Upa Dr Saingura Sailo te chhungkua Headquarters kohhran a lawiten Rs. 10,000/- leh Lal ram hmangaihtute (Keifang) chuan Rs. 21,200/- an pe bawk a, Foreign Missions Board-te an chungah an lawm hle a ni.

General SS Department

General SS Department chuan General Board rorelna tluang takin an nei.

October ni 1 Ningani a neih zawh tak General Board thutkhawm vawi 24-na hi Conference Hall, General Headquarters Office-ah nghah a ni a, Rev F.Lalnghakliana, Chairman General SS Department chuan a kaihruai.

Mizoram UPC Executive Chairman Upa Andrew Laldingliana’n telpuiin hunserh a hmang a,

SS Department chu Kohhranin Department a neihte zinga pawimawh tak ani a, Pathian thu zirna Sikul anih avangin, bul kan tan dan atanga a kal fuh a ngai a ni a ti.

Thangthar zawkte mi puitlinga chhertu Department anih angin Pathian thu in zirtirna kawngah thahnem ngai lehzual turin hemi ni hian kalkhawmte a chah bawk.

General Board meeting-ah hian General SS Department hmalakna tur hrang hrang chhawpchhuahte

Sawiho a ni a,

Puitling SS zirlaibu-ah SS Day thuchah dah remtih a ni a,

SS thil tumte pawh Mizoram UPC Danpui a dah anih theih nan hmalak an rel bawk.

General Board meeting chuan Kum 2021 ah hian ram pum huapin SS naupangte tan Bible hmanga Quiz inelna buatsaih a rel a,

Heng bakah hian Naupang SS-ah Pre Sunday School dinte,

Naupang SS Department puala Thuthlung lam hawi Animation video/Movie siam nise tihte leh

Naupang SS zirlaibu tanpuitu atana zirlai lam hawi Zir Bu ah milem chart dah nise tihte chu rorel langsar zualte an ni a, Zirbu a milem dah dan tur erawh chu Executive Board-in a ngaihtuah leh ang.

General Board chuan kum 2021 General SS Department Budget atan Rs. 23,20,000/- (cheng Nuai sawmhnih pathum leh singhnih) a ruahman a ni.

General Board rorel inkhawmah hian Kum 2021 PTSS zirlai tur “Joshua Lehkhabu zirna” Rev Saienga Sailo buatsaih chu Rev C.Lalremsanga General Superintendent Mizoram UPC chuan a tlangzarh a, Pathian hnenah a hlan nghal a ni.

SS Department General Board thutkhawm-ah hian palai an kal tha hle a, Mizoram UPC Puipaten telpui vekin, Planning & Financial Board Chairman Upa J.Lalramlianan a hmanpui bawk.

Hripui lengin harsatna thlen mahse, kumin hian PTSS Department kum tawp Exam chu kaltlang pui ani dawn a, Exam Question pawh peihfel a ni tawh bawk.

General SS Department hian kumin hian a theih chin chinah SS Seminar leh Financial Campaign a nei thin a, Covid-19 avangin hmachhawp hrang hrang an neihte tih hlawhtlin hman loh engemaw zat an nei a ni.

Rorelna tluang taka neih zawh anih hnuin, Rev Hc Lalthlamuana, General Secretary, Mizoram UPC chuan tawngtaina nen General Board meeting chu a khar a,

Rorel palai ten tlai lamah chawhlui an kilho nghal a ni.

North Mizoram District

Kum 2020 North Mizoram District inkhawmpui rorelna chu Ocotber ni 2 Zirtawpni khan Headquarters Kohhran biak inah tluang taka neih zawh a ni.

Hrileng avangin kum danga inkhawmpui Revival nen a hman thin chu kumin hian neih theih ani lova, North Mizoram District inkhawmpui hi ruahman lawk ang chuan Reiek biala nghah a ni a, hripui avanga harsatna ram pumin kan tawh tak avangin sawrkar leh Kohhran rorelna sang Executive Committee duh danin, mipui awmkhawm tlem theih dan tura ruahmanna siam a ni a, rorel palai pangngai ni lovin, District Committee-te leh Tualchhungtin Kohhran Chairman ten ro an rel a ni.

Rorel inkhawm hi Upa Lalnienga, District Chairman chuan kaihruaiin,

Mizoram UPC Puipa committee-in District inkhawmpui hmanpui tura a ruat angin, Puipa Upa Andrew Laldingliana Executive Chairman chuan a telpui a, rorel turte hlanin hunserh a hmang a ni.

Rev. H. Laltlankhuma, North Mizoram District Superintendent chuan kum 2019-2020 inkhawmpui inkara member boralte sunna hun hmang velehin, rorel inkhawm hi Puipa Rev. Hc Lalthlamuana General Secretary chuan a hmanpui bawk.

North Mizoram District rorel inkhawmpui ah hian Agenda 12 chhawpchhuah a ni a,

General Assembly a thlen chhoh tur Agenda pahnih leh District chunga hmalakna tur tha tak takte relin, rorelna chuan Agenda 6 a passed ani.

North Mizoram District rorelna chuan Kum 2020-2021 budget atan (cheng nuaikhat singthum sanghnih zanga sawmthum) Rs 132,530/- a pawm bawk.

North Mizoram District chhungah hian Pastor Bial 6 awmin Tualchhung Kohhran 31 leh Preaching Station 3 a awm mek a.

Bial hrang hrang report ațanga a landanin,

1.Member 4364 an awm mek a,

Upa 117, Tual Upa 71, Licence nei mi 26 awmin,

mi thar 78 seng an ni tawh bawk.

Kum 2021 District inkhawmpui chu October Pathianni hmasa ber hmangin Reiek bialah nghah leh a ni.

Inkhawmpui Rorel ni hian palai 39 an kal a,

Aizawl khawpui pawn atanga palai kalte tan tukțhuan buatsaih a ni a, rorel zawhah palai zawng zawng ten zan riah an kilho bawk a ni.

Tripura District

Tripura District chhunga Kanchanpur bial Bolpera ah September ni 27 khan Tirhkoh Lalfakzuala Reang kut ah mi 4 in Lalpa Isua hmigin baptisma an chang a, an zinga mi 2 hi Hindu sakhua atangin a ni a, hemi ni vek hian Tirhkoh Lalfakzuala hian mitharte hi Mizoram UPC-ah senglut nghal a ni.

Zemabawk Bial

Zemabawk Bial a Tuirial Kohhranah October ni 4 (Pathianni) khan

bialtu Pastor Rev.V.Rothuamluaia’n Kohhran dang atangin mithar Pu Lalfamkima chu Mizoram UPC-ah a senglut bawk.

KEIFANG BIAL

Keifang Bial a kohhran hrang hrangte pawhin kan hun tawn mek karah, a theih ang angin hma an la mek zel a,

Keifang Kohhran te chuan, hri lêng avângin inkhawmna nei theilo mahse,

Pathianni zing apiangin, Kohhranpui huapin, ṭawngṭai inkhawm urhsûn takin an nei ṭhin a,

Second Sunday tih lohah chuan, inkhawm apiangin Tualchhung SS Department pualin thilpêk an lakhawm ṭhin a ni.

Keifang kohhran te hian, Kum 2020 atana an project pakhat, Tui zem lian siam chu

An bawhzui chho mek a, kartin Thawhṭanni apiangin hnatlang an nei ṭhin a,

kar tluana thawhchhuah tum pawh an nei fo a ni.

Lockdown lai mah nise, thilpek rawngbawlna lamah pawh Kohhran hoten hma an sawn nasa hle a ni.

Keifang Kohhran chuan October Ni 4 (Pathianni) khân, Rulchawm khuaa leimin tuar te ṭanpuina atân, Relief fund aṭangin, ₹ 5000/- an hlân bawk a ni.

Tualbung Kohhran te pawhin, beihrual thupui pawh hlawk tak leh hlim takin an zir zo thei a, chu mai bakah Kohhranah Pathian Thlarau hnathawh a lo thlen zêl theihna turin, Tualchhung PYD te chuan, Kohhran In tinah, Home Crusade an nei chhuak vek bawk a,

He rawngbawlna aṭang hian, kohhran hoten malsawmna an dawng nasa hle a ni.

September ni 21 (Thawhṭanni) khân, Tualbung Kohhran LAD leh PYD te chuan Sawhthing hmun a hran ve ve a an siam chu, a hu hova zawhna hun an siam a, Sawhthing hmun thlawh zawh hnatlangah hian, mi 30 thawk chhuakin hlim takin hun an hmang a ni.

Tualbung kohhranah hian, October Ni 6 Thawhlehni zan khan kohhran dang aṭangin, Mi thar 2 Bialtu Pastor C.Lalramnghaka'n Mizoram UPC ah a seng a,

A tuk Ni 7 Zingkârah kohhran dang atangin mipakhat Bialtu Pastor hian Mizoram UPC ah a lawmlut bawk a ni.

Tualbungah hian, kohhran bakah Unaunu Lalṭhazuali, Chawlhhmun, Aizawl te chuan theihtawp chhuahin rawngbawlna an nei a, Pathian malsawmna lo langin, an rawngbawlna kaltlangin mitharte hi sengkhawm an ni ta ani.

Tualbung kohhranah a lawi S.Upa Tawnliana te chhungkua chuan Ni 10 (Inrinni) lo thleng turah hian, ran talhin Pathian chawimawina neih an duh thu, kohhran hnenah an thlen a,

Kohhran Committee ten Khawtlang thuneitute dawrin, hun hman theih dan tur kawng an dap mêk bawk a ni.

Rulchâwm kohhran te pawh, tunlai hian Biak In sak hna an bei ngawrh hle a,

Kartin Thawhṭanni apiangin, kohhran hoten hnatlang an nei ṭhin a, member thawk chhuak an ṭhahnem thei hle a ni.

Rulchawm kohhranah hian, October Ni 3 (Inrinni) zân khân, Kohhran dang atangin Nupa tuak khat chu Bialtu Pastor C.Lalramnghakan Mizoram UPC ah a lawm lut bawk.

A tuk Ni 4 (Pathianni) tlaiah Pathian pakhat thu leh Chhandamna thuthlung puanchhuahna mual inkhawm neih a ni a, Unaunu Lalṭhazuali, Chawlhhmun Aizawl chuan thuhril rawngbawlna a nei a ni.

Mual inkhawmah hian Rulchawm leimin tuarte chhawmdawlna atân, thilpek lakkhawm a ni bawk a, ₹ 3200/- hmuh niin, Kohhran hruaitute chuan Rulchawm VC te hnenah an hlan nghal a ni.

Keifang Bial a Leitan Kohhran te pawhin, September ni 21 (Thawhṭanni) khân, Biak In leh a chheh velte tifaiin an hnatlâng a, Kohhran Sum hmuhna tur atân, Anṭam huan ṭha tak an siam nghal bawk.

He hun hi Bialtu Pastor chuan telpuiin tlai lamah Chawhlui an kilho nghal a ni.

Maite Kohhran pawhin, a remchan dan ang zelin hma an la chho zel a, sum tuak nan hnatlang te neiin, department hrang hrangte pawhin Budget an neihte tlin ngei an tum a ni.

LUNGLEI 'S' BIAL

October ni 4 (Pathianni) khan Lunglei ‘S’ Bial Inkhawmpui rorelna bawhzuiin Hrangchalkawn ah Area Secretary Rev.Dr.Ngurthanpara Sailo leh Bial Hruaitute kalin rambeih dan turte an thlirin an sawiho.

Bial hruaitu kalkhawmte hian Ṭawngṭaina hunte an nei a, Area Secretary chuan Pathian thuchah puanchhuahna a nei bawk.

Hemi ni vek hian Chanmari Kohhranah mithar 2 kohhran dang atangin lawmluh anni bawk a, Bialtu Pastor B.Lalchhanhima’n Lalpa Isua hmingin Baptisma a chantir nghal a ni.

Chanmari PYD te chuan an member pui Tirhkoh Emmanuel Lalchhanhima, Bial PYD Secretary ni bawk leh unaunu Lalhmunsiami, Dawrpui Vengthar (Social Wing Committee Member GPYD) te Inneih lawmpuina hun an buatsaih bawk.

SIAHA BIAL

Siaha Bial Missions Department Board-te chu, Bial inkhawmpui rorelna bawhzui dan turte ngaihtuahin September ni 21 Thawhtanni khan an thukhawm a,

Kum 2021 bial Missions Inkhawmpui dil duh tan November Ni 15 thleng dilna hun an hawng.

Meeting chuan Siaha Bial chhungah Bible track a tam thei ang ber sem nise a ti a,

Tirhkoh K.Lalhmangaiha Bihar State a Missionary hna thawk mek chu, a rawngbawlna puih nan bial chhung Tualchhung tinah thawhlawm khawn sak turin

ruahmanna siam an tum bawk.

Siaha Bial PYD chuan

Bialtu Pastor Quarters ah property heng

Dining chair – 10, Water filter -1

Leh Long chair cushion – 1 te an dah a ni.

Siaha Bial chhunga Kohhran hrang hrangte chuan anmahni remchan dang angin hma an la chho mek zel a,

New Siaha kohhran chuan September Ni 25 leh 26 khan Biak In an thawm tha a, a chhuat plaster-in hnatlang an nei a, thawkchhuak an thahnem hle.

New Siaha LAD te chuan Kohhran ding thar Amotlah (Rawmibawk) hnenah thilpek thahnem tak an hlan a,

Kohhrante hman tur Thleng - 60

Thingpui in na No - 60

Leh Lukhum var kohhran member hmeichhia te daih tur an pe a ni.

New Siaha East II Kohhran te chuan Covid 19 hri avanga inkhawmna neih theih nilo mahse, Pathianni apiangin biak In ah tawngtaina hun an hmang thin.

New Siaha East II Kohhrante hian an tualchhunga lawi Tirhkoh K.Lalhmangaiha Missionary to Bihar State pualin bawm in leng an siam a, tanpuina sum an la khawm thin a ni.

Thiahra kohhrante pawhin Beihrual tluang takin an nei zo a, zan 11 chhung Kohhran in tinah hmangin, inkhawm ah hian thawhlawm an la khawm thin a ni.

Thiahra Kohhran PYD te pawhin tunlai hian Sound tha tak lei nan sum tuak hnatlang an nei thin a, thalaite an phurin hnatlang thawkchhuak an thahnem thei hle a ni.

Siaha Bial chhunga Kohhran ding thar

Amotlah Kohhran ah October Ni 4 Pathianni khan mi thar 2 lawmluh leh an ni a,

Tun dinhmunah Amotlah ah hian member 79 an awm mek a ni.

Amotlah kohhran hi engmah nei lo a, bul tan an ni a, mithahnem ngaiten property mamawh turte pe in, hma an sawn ve zel a,

A vawi khat nan September ni 27 Pathianni khan Thiahra kohhran te tlawh in an feh chhuak a, hlawk thlak an ti hle a ni.

Amotlah ah hian kohhran a din ngei theih nan Siaha District Crusade Committee ( SDCC ) chuan rawngbawl turin Tirhkoh Lalnunthara chu a ruai a,

Kohhran a din hnuah pawh rawngbawlna chhun zawm zelin ram lak beihpui an thlak mek zel a ni.

Phura kohhran a lawi unaupa S.Lalfakzuala chu September Ni 26 khan a boral a,

Tirhkoh K.Lalthansangan a vui a ni.

Phura Kohhranah hian October Ni 4 Pathianni khan mithar 5 chhungkaw khat chu kohhran dang atangin Tirhkoh K.Lalthansangan Mizoram UPC ah a senglut bawk.

LAWNGTLAI BIAL

Lawngtlai Bial chuan October ni 7 khan Vengpui Kohhran Biak In-ah bial Inkhawmpui rorelna an nei.

Lawngtlai Bial ah pawh Covid-19 hrileng avangin inkhawmpui chu dan pangai angin kalpui a theih loha, rorel inkhawm chauh neih a ni.

Bial rorel inkhawm hi Upa Lalengzauva, bial chairman chuan a kaihruai a, kum 2020-2021 chhunga Lawngtlai bial Kohhran hmalakna tur thil pawimawh tak takte an rel.

Kum 2021, bial Kohhran Inkhawmpui chu October ni 9 -11 chhung a neih turin Bethel veng Kohhran Biak In-ah a nghat a,

"Kum 2021 chhung a salvation camping neihte,

Mampui khuaah Kohhran tha tak a din theih nan a bial huapa hmalakte,

Kum 2021-a General PYD buatsaiha live crusade Lawngtlaia neih tur atana inbuatsaih nan a Rs.15000/- budget-ah dahte an rel a,

"Kum 2021 Lawngtlai bial kumpuan thupui atan "Dikna leh thianghlimna" an thlang bawk.

Heng bakah hian "Kum 2021 chhungin Lawngtlai bial tualchhung Kohhran tinah chhungkaw kima Inkhawm hun neihte,

Chumi atana kaihhruaina bu siamte,

"Kohhran kalphung hriat zelna atana Centralization system leh District autonomy system danglamna lehkhabu a siam nise tih leh

"Kum 2021-a, Lawngtlai bial silver jubilee lawmna tur atana hma latu tur Organising committee dinte chu rorel alngsae\r zualte an ni a,

Lawngtlai Bial inkhawmpui rorelna chuan Bial chhunga Kohhran la din lohna veng/khuaah te Mizoram UPC a din ngei theih nan chak lehzual a hmalak nise an ti bawk.

Kum 2020-2021 bial budget atan rorelna chuan Rs.2,36,600/- an passed bawk a ni.

NIAWHTLANG BIAL

Niawhtlang Bial ah October ni 3 (Inrinni) Zan khan Niawhtlang kohhran a lawi tur chhungkaw 3 Member 14 te chu Bialtu Pastor C. Lalhmingsanga'n kohhran dang atangin a lawm lut.

Niawhtlang Kohhrante hian hri leng avangin, Beihrual an nei thei lova, he hun hi ram beih nan a hmangin, Upa te leh Pastor ten nasa takin hma an la a, kohhran dang atangin September thla atanga October vawiin ni thleng hian mithar 28 Sengkhawm an ni tawh a ni.

Niawhtlang 3 (Km10 ) Kohhran te chuan, September thla beihrual chu kohhran in tin ah an hmang a, thawhlawmte lakhawmin kohhran ten hlawk takin hun an hmang a ni.

Lungzarhtum kohhrante chuan, Pathianni zing tawngtai inkhawmah beihrual an hmang thin a, zirlai te zirhoin hlawkthlak an ti hle a ni.

Tun lai hian Biakin sak hnatlang ngawrh takin an nei mek bawk a ni.

Churachandpur bial

Churachandpur Bial a Venglai Kohhran chu September Ni 27 Pathianni khan bialtu Pastor K.Lalhmingsangzualan a tlawh a, beihrual kharna inkhawm a hmanpui.

Hemi ni hian Sual ngaihdamna baptisma Lalpa Isua hmingin mi pakhat chantir a ni a,

Mizoram UPC-ah sengluh a ni.

Venglai kohhrante hian in tinah beihrual hmangin, hlawk takin zirlai an zirho thei a ni.

L.Muolhoiphai Kohhran te chuan awmni khamin beihrual kharna hun an hmang.

October Ni 7 khan L. Muolhoiphai tualchhung chuan awmni khamin beihrual kharna hun an hmang a, Chhun lam programme hun hnihah ṭhenin Pathian thu zirho na an nei.

Hun hmasa zawkah T.Upa Lalthlamuon cchuan "Pathian pakhat thu" thupuia hmangin zirtirna a nei a,

Chawhnu lamah bialtu Pastor-in "Sual ngaihdamna baptisma" tih thupuia hmangin kalkhawmte zirtirna a pe thung a ni.

Hemi ni hian baptisma khur hawn a ni a, mi 3-in Lalpa Isua hmingin sual ngaihdamna baptisma an chang a ni.

Programme zawhah zan riah an kilho bawk.

He hun hi Zan lamah revival inkhawm a chhunzawm a ni a,

Thlarau lam hlapui nen hlim takin Kohhran hoten an hmang a,

Pastor Lalnunzama, Saikawt bialtu chuan thuhril rawngbawlna a nei a ni.

Bial chairman Upa S. Lalsonlien chuan he hun hi a hmanpui bawk.

Churachandpur Bial PYD te chuan tualchhungtin PYD tlawh chhuahna hun hmang mek.

Kum 2020 bial PYD inkhawmpui rorelna bawhzuiin September ni 27 khan Kangvai Kohhran an tlawh a, October ni 11 Pathianni lo awm hmang hian Venglai Kohhran an tlawh leh ang.

Bial PYD hian he intlawh tawn hi kalpui chhoh zel a tum a, Kumtir lam khan Leijangphai Kohhran PYD an lo tlawh tawh bawk a ni.

Chhattisgarh Field

Chhattisgarh Field a Pandripani Kohhranah October ni 8 khan ringthar mipahnih te chu Lalpa Isua hminga Baptisma chan tir an ni a, Pastor Ramesh Manikpuri chuan Mizoram UPC ah a senglut a ni.